Jenesesi 47 - Mazu Otchena a Mulungu

Jako ohowatcheliwa na mwene Farawu

¹ Evale mulombwana Joze ohovenyaga dowa muwandela mwene Farawu eraga: <<Babaga na abalaga kohoza kuma ilambo ya Kana. Aliwa kohozana mabila, mbuzi na ng'ombe na jatene jinna atu. Eni anafwanyeya ilambo ya Gozeni.>>

² Evale Joze ohodowa atukula abalaye atanu, liye adowana vamentoni va mwene Farawu ira aaone.

³ Mwa enne Farawu ohafukaga Joze abalaye ale, liye ira: <<Kodi nyo munahinda mabasa nni?>> Aliwa kohomuwakula, aliwa ira: <<Hiyo anamalaba enyu nili anamakumbuza jifuwo nnga jairile makolo ehu.>>

⁴ Kohowongagave na Farawu keraga: <<Hiyo nizele ira nikale mwilamboni mwinyu muno. Tchoira hiyo anamalaba enyu wanihu kaliwo mpinda ofuna ira nidjihe anavinyama ehu. Tchoira ndala inafwanyeya ilambo ya wanihu Kana kahi ya masika. Mwa eno, hiyo nnouvepani ira munihiye hiyo anamalaba enyu nikalege ilambo ya Gozeni.>>

⁵ Evale Farawu ohowonga na Joze eraga: <<Voira babawo na abalawo kohoza ira kakalege na weyo,

⁶ ilambo ya Ijipitu tchenna. Usakulre pandi yenno inauriyele ira babawo na abalawo atene kakalege wewo. Miyo nnoarumeliha ira aliwa kakale ilambo ya Gozeni. Eto nnouvepa ira weyo waona ira mwa aliwa kohokalamo alombwana anawanda pama mabasa a jifuwo, waasakulre ira kaze kasogolrelrege jifuwo jaga.>>

⁷ Noira enne, Joze ohovenyaga, liye mutukula babaye Jako, mudowana vamentoni va mwene Farawu. Evale Jako ohomureliha mwene Farawu.

⁸ Eto mwene Farawu ohonfuka Jako, liye ira: <<Andimuwa, eni ante peno nyo munna yaka dingasi?>>

⁹ Jako ohomurumelaga, liye ira: <<Yaka daga dowendawenda mwilamboni ya vati dinna 130. Yaka daga kahi dinene eto ti yaka da makatamiho pwi. Miyo kadifiyihile nnga yaka da makolo aga damanle atu kawendaga mwilamboni ya vati.>>

¹⁰ Noira enne, Jako ohomurelihaga mwene Farawu fendo yanembinli. Nomala liye venyavo vamentoni va mwene vale, liye dowaga.

¹¹ Mwa enne mulombwana Joze ohonvaha babaye na abalaye nimburo mwilamboni mwa Ijipitu mule, ilambo yapama, mwilamboni mwa Ramesesi, nnga mwemo mwawongele mwene Farawu ira asakulre pandi yamuzivele. Aliwa roma kalamo.

¹² Eto mulombwana Joze omurumihedetcha babaye na abalaye atene jodja, aharihaga no indjiva wa ahimiwa.

Makalelo airile Joze tempu ya ndala

¹³ Mwa tempu yenne mwilamboni mwatene atu kohomaleliwa jodja. Mwasiwa ndala yafwanyeya emule yali ndala yohokala ya masika. Ante fiyeda akuda Ijipitu na akuda Kana kohomala gobowa, hakagana kopolo na mwasa wa ndala yafwanyeyana atu.

¹⁴ Mwa tempu yenne Joze ohowatchela kobiri datene dali ilambo ya Kana, nari kobiri datene dali Ijipitu muwari moaguliheda jodja, liye dowagana kobiri dile vande va Farawu.

¹⁵ Evale akuda Kana na akuda Ijipitu atene kobiri diwa dagaamalenle, akuda Ijipitu atene kohodowaga muwongana mulombwana Joze keraga: <<Nnauvepani ira munivahe jodja. Nyo kamunihiye ira hiyo nikwe vamentoni venyu. Hiyo na ibaribari kaninna yengo. Kobiri nanna hiyo dihinimalela.>>

¹⁶ Evale Joze ohawakula eraga: <<Akala nyo kamunna kobiri, muzegena anavinyama munna nyo ira miyo duvahegeni jodja.>>

¹⁷ Evale akuda Ijipitu kohoroma tukula anavinyama ewa, kavalo, mabila, mbuzi, ng'ombe na aburu, aliwa dowa nvahaga Joze ira katchindje na jodja. Evale liye oavaha jodja yaka yatene yenne motchindja na anavinyama kanna atu.

¹⁸ Yaka yenne yohomala. Evale yaka imohiwa yagafiyile, atu kohodowaga nvepa mulombwana Joze keraga: <<Hiyo kannaukuwani nyo mbwiyeni ira kobiri dihinimalela eto anavinyama nanna hiyo atene benyu, eni hiyo kaninna yengo imohiwa. So mbwenye nnafuna nivivelele hiyo annya vamohi na teya yenno inakala hiyo.

¹⁹ Kamunihiye ira hiyo nikwe vamentoni venyu mwilamboni muno na ndala. Munigule hiyo vamohi na vilambo dedo nnakala hiyo, nulabegeni ira munivahege jodja. Hiyo nnakala azari a mwene eto vilambo mwemo munafwanyeya hiyo nnakala daye. Munivahede jodja ira nahakwe eto munivahe mbewu ira nizalege ira teyela yahakale kokola.>>

²⁰ Evale Joze ohogula teya da akuda Ijipitu atene, liye nvaheda mwene Farawu. Akuda Ijipitu atene kohoguliha minda diwa mwasiwa ndala yohotabwa. Mwa enne teya yatene yali ya mwene Farawu.

²¹ Evale atu atene kakala Ijipitu, mwene Farawu ohasakanya azari aye ira kalabege mabasaye.

²² So mbwenye teya yohala ali ya anamakuta. Teya ya anamakuta mbwenye mwene Farawu kagunle. Tchoira anamakuta katambilrihiwa jodja na mwene. Aliwa kadja jodja javahiwa atu jile. Na mwasa wenne, aliwa tchagulihile teya yewa.

²³ Evale Joze ohowongaga na atu atene eraga: <<Peno miyo duhugulani vamohi na minda dinyu dene ira mukale a mwene Farawu. Mbewu nnafuna miyo uvahani muzale mmindani mwinyu.

²⁴ Mwamala zala, tempu yohanda yafiya, muzegena yanetanu ya johanda jatene ira jikale ja mwene. Mbwenye jimohi jiwa johala, jikalege jenyu ira muzalege mmindani mwinyu, jimohi mudjege na ahiminyu vamohi na atene anakala vande vinyu.>>

²⁵ Evale aliwa kohowakula keraga: <<Mbwiyeni muhuvulumutcha vingumi dehu eto muhunifwewela murima. Hiyo nnokala anamalaba a Farawu.>>

²⁶ Mwa enne Joze ohokumihaga nlamulo zela minda dile eraga: <<Yanetanu ya johanda jatene jiveleliwege wa mwene Farawu.>> Fiyeda ante peno eni nlamulo nawongile mulombwana Joze nne nnaireyave mwilamboni mwa Ijipitu. Mbwenye anamakuta nari, tchoira minda diwa tchagulihile.

Jako ohovepa ira akwa, makuvaye kadowena Kana

²⁷ AIzarayeli kakala mwilamboni mwa Ijipitu pandi ya Gozeni. Kohoroma kana ilambo yewene eto kohobalihana aliwa fiyeda indjiva na makalelo ohokala a masika.

²⁸ Mulombwana Jako amanle mwilamboni mwa Ijipitu yaka 17. Mwa eno, Jako kalawo waye watene amanle yaka 147.

²⁹ Evale Izarayeli agaonne ira: <<Eni yaka da ingumi yaga nnaya mamalelo>>, ohomuitana mwanaye Joze, liye muwandelaga eraga: <<Akala munodifwewela murima, dera muhele ndanda ninyu vatambalani vaga va, mulumbele ira munodiirela upama na makalelo anafuna miyo uvepa. Miyo yovepa yaga, nnauvepani ira dakwa, kamudikoye ilambo ya Ijipitu ila.

³⁰ Mbwenye nnafuna dakwa, didowe dakale vamohi na makolo aga. Nona nnavepa ira dakwa, mudikumihemo muIjipitu muno, mwadikoye masiye wewo wakoyiwe makolo aga kakwile wanle.>> Evale Joze ohomuwakulaga, liye ira: <<Miyo nnoza diirena nnga mwemo muwongele nyo.>>

³¹ Mbwenye Jako ohokalelave ntindi eraga: <<Kalumbelani!>> Evale Joze oholumbela vamentoni vaye. Eto Izarayeli ohokokorelaga miruzuni wa kama yaye.