Jenesesi 43 - Mazu Otchena a Mulungu

Joze abalaye kohodowa Ijipitu fendo yanembinli

¹ Ndala yali ilambo ya Kana yosimbwagave.

² Kagamanle dja jodja jazilena atu Ijipitu, Jako oharuma ahimaye ale eraga: <<Venyani, mudowe Ijipitu akoka, mwagule jodja ja vang'onove.>>

³ Mbwenye mwanaye Juda ohowakulaga, liye ira: <<Papa! Maliba guliha jodja wewule ohonikokomeza ira: <Mwahamuzena mbalinyu wa ng'onong'ono, kamuwelele vamentoni vaga akoka.>

⁴ Mwarumela ira nnomutukula mbalihu nimudowegena, hiyo nnoyawo nauguleleni jodja.

⁵ Mbwenye mwahamurumelihe dowa, hiyo kannayawo. Mwasiwa mulombwanole ohonikokomeza ira: <Para muwelele Ijipitu uno, muze vamentoni vaga, mmuzena mbalinyu wa itongohi.> >>

⁶ Evale Izarayeli ohowakula eraga: <<Kodi mwasiwa gwa nni muza mmuwandelaga mulombwanoyo ira: <Nihimukana mbalihu mmohiwa>, mudizelagana ubure eni?>>

⁷ Mbwenye aliwa kohomuwakula, aliwa ira: <<Tchoira mulombwanole gwaromilena nifuka zela hiyo eto zela muibalini mwehu, liye ira: <Babinyu ukalawo?> Eto, liye ira: <Kodi muhukana mbalinyu mmohiwa?> Mwa enne hiyo nohomuwakula nnga mwemo mwanifukele liye. Kodi hiyo nafuna niiziwe avi ira liye unoniwandela ira: <Miyo nnafuna mmuzena mbalinyu.>?>>

⁸ Evale Juda ohowonga na babaye Izarayeli, liye ira: <<Muhiyeni muzombwe Benjami adihare ira hiyo vamohi na nyo na ahimihu atene nahakwe ndala.

⁹ Miyo gunafuna murumelela. Miyo dahamuzena liye agali wapamene, muditonge na makalelo munafune nyo. Nyo podi dibalra miyo nnga mutu wabure vamentoni venyu kalawo waga watene.

¹⁰ Ahakanlege nahadibeliwa, eni nogodowa, niwelewo, fendo mbinli dene.>>

¹¹ Evale babiwa Izarayeli ule ohowonga eraga: <<Akala tchi eno, iranani. Eto mwadowaga, mutukule mivaho dapama, jengo jofuneyetchetcha jinna hiyo mwilamboni muno, muhele mmasakwini mwinyu ira mudowe mwanvahe mulombwana unaguliha jodja wewule. Jengo jiwa mutukule balsamu wa vang'ono, na nuwi vang'ono, na matakuru a vang'ono onukela pama okana makura, na mira, na jovaha jimohi jiwa ja vang'ono japama ira mudowe mwanvahe.

¹² Eto mwadowaga mutukule kobiri dafwanyile nyo mmasakwini ira mwawelihe, afwase podi ira aliwa kere viringaniha. Eto mutukule kobiri dimohi diwa nnafuna nyo dowa gulana jodja.

¹³ Mmutukule eto mbalinyu ula ira mudowege wa mulombwanoyo.

¹⁴ Mulugu wa Kopolo Datene airena ira mulombwanoyo auwendeleni tangaranga, auhiyedeni abalinyu Simeyawu na Benjami ira mwaazegena vamohi. Zela wa miyo, akala nnoapuzeya ahimaga, malringana, nnagomela apuzeya.>>

¹⁵ Mwa enne ana Jako ale kohomutukulaga mbaliwa Benjami ule vamohi na mivaho dile, na kobiri doweliha na dogulana jodja, aliwa maruwa dowaga Ijipitu, aliwa dowa fiya vamentoni va Joze.

¹⁶ Joze agaonne ira kohomuzana Benjami, ohomurumaga musogolrelri wa vande vaye, liye ira: <<Waatukule alombwanala, waadowena vande. Wafiya vande, wamutukule mwanainyama mmohi umpe, mwasiwa peno miyo nnafuna didje alrimoso na atu anna.>>

¹⁷ Evale namalaba ule ohoirana nnga mwemo mwawongele Joze. Ohomaruwaga na Joze abalaye ale, adowana vande va Joze.

¹⁸ Evale aliwa kohoromaga ova na mwasa odowa vande va Joze vale, aliwa roma wonga oka oka keraga: <<Afwase para hiyo ziwagana vande va eni mwasiwa gwenne wa kobiri dedo dali mmasakwini mwihu mule fendo yoroma. Eni unafuna anihindele mmalrangoni, nikale azari aye, aniwake aburu ehu.>>

¹⁹ Evale kagafiyile vande vale, kohomukwivelaga musogolrelri wa vande vale va mulango,

²⁰ aliwa muwandela keraga: <<Pepani mbwiyeni! Hiyo nohoza fendo ile, hiyo gula jodja.

²¹ Mwa enne nagamaruwile, nagafiyile nimburo nafuna hiyo gona, nagatapunle masakwi ehu, nafwannye kobiri yenno nagunlena hiyo yagali wanoni wa sakwi ule, kada mutu na kobiri dagunlena liye. Hiyo mbwenye kobiriwa nihiwelana ira nize nuuvahedeni.

²² Eto nihizana kobiri imohiwa inafuna hiyo gulana jodja fendo ila. Tchoira hiyo kobiri yafwanyile hiyo mmasakwini mwehu, kaniwandile muiziwa wenno ahenlemo.>>

²³ Evale musogolrelri wa vande va Joze ule ohawakula eraga: <<Kamukukumuwe, hagalalani. Mulugu wenyu na Mulugu wa babinyu, guhenlemo kobiriyo mmasakwini mwenyu. Miyo mbwenye kobiri mwagunlena nyo dohotukula.>> Noira enne, ohodowaga, liye mukumiheda unde mbaliwa Simeyawu ule, liye muzana vevale vafwanyeya abalaye vale.

²⁴ Nomala enne, ohatukulaga, liye adowana mmba, avaha mahindje ira kahuwe manyalo ewa eto ohavaha jodja aburu ewa.

²⁵ Evale Joze abalaye ale kohomalaga sakanyeda mivaho dedo dazilena atu ira kanvahe mulombwana Joze ora ya alrimoso yafiya. Tchoira aliwa kohoiziwa ira Joze afuna aze adje alrimoso na aliwa vande evale.

²⁶ Evale Joze agazile vande vale, aliwa kohotukulaga mivaho dile, aliwa dowana mmba mwali liye, aliwa nvaha. Nomala eno, kohomukokorelaga, kafiyihaga kove diwa vati.

²⁷ Evale Joze ohalondjelaga eto ohafukaga eraga: <<Nnga babinyu mwamuwonga nyo ira uhulula uli wapamene?>>

²⁸ Aliwa kohomuwakulaga, aliwa ira: <<He, babihu namalaba wenyu uhukalawove eto uli wapamene.>> Noira enne, kohowelelave mukokorela kafiyihaga kove diwa vati.

²⁹ Joze agaaing'anne, ohomuonaga Benjami, mbalaye wenno ali obaliwana ingulu imohive. Mwa enne ohofukaga eraga: <<Kodi mbalinyu wa itongohi mwamuwonga nyo gwenna?>> Noira eno, ohowongaga eraga: <<Mwanaga Mulugu aurelihe.>>

³⁰ Joze na mwasa omuona mbalaye ule, ziveliwa waye wohotabwaga ante liye fiyeda jofunaga ira anle. Evale ohobaranyaga, liye dowaga kwartuni waye, roma nla wewule.

³¹ Agamanle nla, ohopuputaga wintoni waye, liye huwawo, nomala eno oholimbihaga murimaye adowaga vamentoni va abalaye. Ohawandelaga anamalabaye eraga: <<Kazanani jodja.>>

³² Evale anamalabale kohotandaga mamburo kafuna atu djaga. Joze nimburo naye kahenle vaye vene, nomala aliwa tanda nimburo na abalaye ale vewa vene. Eto kohotandaga nimburo nimohi niwa vewa vene para aIjipitu amohiwa anno kadja vande evale. Mwasiwa aIjipitu tchadja vamohi na aEberewu, tchoira yenno yafwanyeya yagali yengo yotakaletchetcha vamentoni va aIjipitu.

³³ Evale mulombwana Joze ohagaratihaga abalaye ale, kada mutu mpando waye, aliwa kala sogolro waye. Eto agaratiha uwa, aagaratihile moharana, romela murandji baliwa fiyeda ogomiheda baliwa. Evale aliwa kohoromaga ing'anana katikinaga.

³⁴ Kagamanle garati enne kohoromaga vahiwa jodja, jagali jimohive na jejo jadja Joze. Eto Benjami ohovahiwa fendo tanu ya jodja jile akwaranya abalaye atene. Mwa enne kohodjaga pwando vamohi na Joze eto kohong'waga malringana kada mutu vafunele liye.