Jenesesi 41 - Mazu Otchena a Mulungu

Yoroha ya mwene Farawu

¹ Vagavirile yaka mbinli dompumbula, siku nimohi mwene Farawu ohorohaga. Liye arohilege agali mutcherelani mwa muhindje Nilu.

² Evale ohoonaga ng'ombe tanu na mbinli da ahiyana, dapama eto dagali doruva, dagatavuwile muNilu mule, roma dja mpinda mutiti afwanyeya mutcherelani mwa muhindje mule.

³ Eto vohodibeliwa ohoonaga ng'ombe dimohi diwa tanu na mbinli da ahiyana dotakala eto dagali dowonda ditavuwaga muNilu mule. Dagatavuwile, dohodowaga imela vamohi na ng'ombe doroma dile, mutcherelani mwa muhindje mule.

⁴ Evale ng'ombe dotakala, dowonda dile dohoroma dja ng'ombe dapama, doruva dile. Noira eno, mwene Farawu ohorurumuwa.

⁵ Agawelenle gona, ohoroha akoka. Yoroha yowelela ile aonnege mangala matanu na menli malukulu eto apama a tirigu, mutati mmohive.

⁶ Vohodibeliwa ohoonaga eto mangala amohiwa matanu na menli kamelaga mwemo mwali tirigu wapama mule, kagali a mavembo eto onyala na nipevo nokaha nokumela makumelo wa nzuwa.

⁷ Eto mangala a mavembo ale kohoromaga dja mangala malukulu apamale. Mwa enne Farawu ohorurumuwa, liye ona ira: <<Dera roha.>>

⁸ Unde wagatchile, na mabebehi liye ohokalaga okukumuwene zela joroha jile. Mwa enne ohaitanihaga ang'anga okwima vamohi na aliba iziwa mirombwe a Ijipitu ule ira kaze kamutapulele joroha jaye jile. Aliwa kagazile, mwene Farawu ohawandela joroha jaye jile, mbwenye muwari mwa aliwa kalivo awandile tapulela.

⁹ Mwa enne mundimuwa wa aliba sakanya jong'wa ule ohowongaga na Farawu, ira: <<Miyo, so mwene, peno nnoumbuwela joviringaniha jaga.

¹⁰ Tchoira tempu yenne yatakaleliwe nyo na hiyo anamalabinyu, mudowa mwadihela miyo vamohi na mundimuwa wa aliba wotcha pawu mukadeya mwa mundimuwa wa agwarda,

¹¹ siku nimohi, mahiyu mamohive miyo na nfwagole nohorohaga eto kada yoroha yanna yotapulela yaye yaye.

¹² Eto mukadeya mwafwanyeya hiyo mule mohokala muzombwe mmohi namuwandenlemo hiyo joroha jihu jile, liye nitapulela. Muzombwe ule ali muEberewu, muzari wa mundimuwa wa agwarda.

¹³ Mwa ibaribari aganitapulenlemo, jatene johokwakwanelaga nnga mwawongele liye. Nyo mohodiweliheda miyo mabasaga. Nfwagole mundimuwa wa aliba sakanya pawu ohomangeleliwa.>>

Joze ohotapulela joroha ja mwene Farawu

¹⁴ Evale Farawu ohomuitaniha Joze. Mobaranya kohonkumihamo mukadeya mule, liye sata ndevu daye, wara jowara jimohi jiwa, liye dowa vamentoni va mwene Farawu.

¹⁵ Evale Farawu ohomuwandelaga Joze eraga: <<Miyo dire roha. Mbwenye kalivo unawanda ditapulela. Noira eno, miyo vwa ira weyo wavwa yoroha, unowanda tapulela.>>

¹⁶ Joze ohomurumela Farawu eraga: <<Unafuna wanda tapulela joroha jenyu kahi miyo. Mbwenye Mulugu gunafuna uwandelani yotapulela iwa mwapama, so mwene.>>

¹⁷ Evale Farawu ohoromaga muwandela Joze joroha jaye, eraga: <<Miyo dirohile dagali mutcherelani mwa muhindje Nilu.

¹⁸ Evale dohoonaga ng'ombe tanu na mbinli da ahiyana, dapama eto dagali doruva, dagatavuwile muNilu mule, roma dja mpinda mutiti afwanyeya mutcherelani mwa muhindje mule.

¹⁹ Eto voharela dohoonaga ng'ombe dimohi diwa tanu na mbinli da ahiyana dotakala eto dagali dowonda ditavuwaga. MuIjipitu mwatene kannababihege ona ng'ombe dotakala nnga ha dedile.

²⁰ Evale ng'ombe dotakala, dowonda dile dohoroma dja ng'ombe dapama, doruva dile.

²¹ Eto masiki ng'ombe dowonda dile dagamidileve ng'ombe doruva dile, kadaoneya ira dohodja yengo. Dohokalave dotakala dene nnga mwakalele atu voroma. Mwa enne miyo dohorurumuwa.

²² Dagawelenle gona akoka, dohoroha mangala matanu na menli apama eto malukulu a tirigu, kagakumile mutati mmohive.

²³ Eto voharela kohotapuwa mangala mamohiwa, matanu na menli a mavembo eto onyala na nipevo nokaha nokumela makumelo wa nzuwa.

²⁴ Mwa enne mangala onyala ale kohodjaga mangala apamale. Jo ti joroha jirohile miyo. Nomala eno, miyo dahawandela ang'anga okwima, mbwenye kalivo uwandile ditapulela.>>

²⁵ Mwa enne Joze ohowongaga na Farawu eraga: <<Joroha jenyu jambinli jene, so mwene yotapulela iwa tchi imohive. Mulugu guirilena muwari mouwandelani jejo jinafuna liye irana.

²⁶ Ng'ombe tanu na mbinli doruva vamohi na mangala matanu na menli apama ku wonga yaka tanu na mbinli dokuma jodja pwi. Joroha jambinli jene yotapulela iwa tchi imohive.

²⁷ Eto ng'ombe tanu na mbinli dotakala, dowonda, dedo dali dogomiheda tavuwa vamohi na mangala matanu na menli a mavembo, onyala na nipevo nokaha nokumela makumelo wa nzuwa, ejo ku wonga yaka tanu na mbinli da ndala nnaza.

²⁸ So mwene, nnga mwemo muwongele miyo voroma, Mulugu gunauonihani yenno inafuna liye irana.

²⁹ Nnoza yaka tanu na mbinli dokuma jodja johokala ja masika ilambo yatene yenna ya Ijipitu.

³⁰ Eto yaka dedo damala, sogolro uwa unoza yaka tanu na mbinli da ndala. Yaka dedo dafiya, atu anoza kadiwale ira muIjipitu muno mohokala jodja johokala ja masika. Eto ndala yenno inoza iduwihe ilambwela.

³¹ Ndaliwa inaza ikale yohokala ya masika yofiyeda adiwaliha atu atene ira mwilamboni muno mohokala jodja johokala ja masika.

³² Para nyo rohaga yengo imohive fendo mbinli, tapulela ira Mulugu ulumbela ira airena eto unoirana vohodibeliwa.

³³ <<Nona, so mwene, inafwanela mmusake mulombwana wa zelru, oiziwetchetcha, mmurume ira akale musogolrelri wa ilambo yenna ya Ijipitu ira akoyege jodja.

³⁴ Mwamala mwaasakulre eto andimuwa amohi ira kalabege vamohi na musogolrelri ule ira kasokelege pandi yanetanu ya jodja jatene jinakumege muIjipitu muno, muwari mwa yaka tanu na mbinli dokuma jodja, kakoyege.

³⁵ Aliwa kasokelege jodja jatene ja yaka dapama nnafuna za, kakoyege muwari mwa sidadi datene na nzina na mwene.

³⁶ Jodja jinafuna atu koya ti jejo jinafuna za avulumutcha atu muwari mwa yaka tanu na mbinli da ndala nnafuna za. Era eno ndala yenno inafuna za muIjipitu muno yafiya, atu kinakwa.>>

Joze ohambihiwa ira akale musogolrelri wa Ijipitu

³⁷ Mwene Farawu na anamalabaye atene kohoziveliwa yowonga ya Joze.

³⁸ Evale Farawu ohowonga na anamalabaye eraga: <<Mwaonelramo, mwilamboni muno nnowanda nfwanya mulombwana ozaleliwa Munemba wa Mulugu nnga wenna? Miyo kannamuonamo.>>

³⁹ Evale ohomuwongagana Joze, liye ira: <<Voira Mulugu uhuwanda uiziwiha jatene jeji, hiyo nnaona ira kalivo mutu mmohiwa oiziwetchetcha eto okana zelru nnga weyo. Weyo gunafuna kala musogolrelri okoya jodja.

⁴⁰ Miyo meka bahi gunafuna ukwaranya weyo ineriha miyo dili mwene. Mbwenye weyo unerege asogolrelra andimuwa atene analaba palasiyoni waga eto atwaga atene anerege uvwelela weyo.>>

⁴¹ Mwene Farawu ohowongagave eraga: <<Miyo eni peno duhambiha ira ukale musogolrelri wa ilambo yatene yenna ya Ijipitu.>>

⁴² Evale mwene Farawu ohowungula aneli waye wa umwene liye muwariha Joze muibunoni mwaye. Eto ohomuwarihaga nguwo dapama dosakanyiwa na usalru wapama, eto ohomuwarihaga kolare wa oru nkohini mwaye.

⁴³ Eto ohomugwelihaga aterelado waye wanembinli wa umwene, eto oharuma atu amohiwa aliwa kala vasogolro va Joze, aliwa kuwaga keraga: <<Nkokoreleni! Nkokoreleni!>> Kukala hambihiwa wa Joze musogolrelri wa ilambo yatene ya Ijipitu.

⁴⁴ Eto Farawu ohowonga na Joze eraga: <<Unawonga gu miyo vano dagali Farawu. Mwilamboni mwatene mwa Ijipitu mu, kalivo mutu unafuna hinda yengo ili yatene aharumelihiwe na weyo.>>

⁴⁵ Noira eno, Farawu ohonvaha Joze nzina na Zafenate Paneya eto ohomuteliha na muhiyana mmohi eriwa Asenati, mwana Potifera, namakuta wa Oni. Noira eno, Joze ohoroma wendawenda ilambo yatene ya Ijipitu.

⁴⁶ Joze aromaga laba mabasa a Farawu mwene wa Ijipitu afwanyeya aganna yaka 30. Mwa enne liye ohokumagavo vamentoni va mwene Farawu, liye roma vira mwilamboni mwatene mwa Ijipitu.

⁴⁷ Muwari mwa yaka tanu na mbinli da murendele dile, mwilamboni mwa Ijipitu mohokuma jodja johokala ja masika.

⁴⁸ Mwa enne Joze ohovenya roma gumaniha jodja jatene johala muIjipitu mule muwari mwa yaka tanu na mbinli dapama dile, liye koyaga muwari mwa sidadi. Kada sidadi akoyamo jodja jakuma minda dowandamelana.

⁴⁹ Na makalelo anne, Joze ohowanda koya jodja jidjindji, nnga miseva da mutcherelani mwa bara, liye fiyeda hiya kontari josokela jasokenle liye, mwasiwa kajawanda kontareya voira josimbwa indjiva.

Ahima oroma a Joze

⁵⁰ Yaka da ndala dahanafiye, Joze ohabala ahima ambinli na muhiyanaye Asenati mwana Potifera, wenno ali namakuta wa Oni.

⁵¹ Mwana oroma Joze ambanle liye, anvahile nzina na Manasesi [ku wonga diwala], liye ira: <<Mulugu uhusakanya ira didiwale goyi daga datene eto didiwale vande va ababaga.>>

⁵² Mwana wanembinli anvahile nzina na Efarayimi [ku wonga kana ahima] eraga: <<Mulugu uhusakanya ira dikayena ahima mwilamboni mwasimelihiwa miyo.>>

⁵³ Noira enne, yaka tanu na mbinli dile dokuma jodja pwi pwi muIjipitu, dohomala.

⁵⁴ Mwa enne dohoroma yaka dimohi diwa tanu na mbinli da ndala nnga mwemo Joze mwawongele liye. Evale muwari mwa vilambo datene mohozaga ndala yohokala ya masika. Mbwenye mwilamboni mwatene mwa Ijipitu mohokala jodja.

⁵⁵ Mwa enne mwilamboni mwa aIjipitu mule jodja jagaamalenle atu atene, mwagavolowile ndala, atu kohovenyaga, aliwa dowa nfwanya mwene Farawu ira kanvepe jodja. Mbwenye Farawu ohawandela eraga: <<Kamudiwongena miyo! Mbwenye mumaruwe, mwanfwanye Joze. Eto mwadowa, mwairena yenno inafuna liye wonga.>>

⁵⁶ Ndala yagamanle duwiha muIjipitu mwatene, Joze ohula nyumba dokoyamo jodja, liye roma aguliheda aIjipitu jodja, mwasiwa ndala yerave simbwa muIjipitu mwatene.

⁵⁷ Eto atu amohiwa a vilambo datene koza muIjipitu mule gulaga jodja na Joze mwasiwa ndala yohotabwa ilambo yatene ya vati.