Jenesesi 40 - Mazu Otchena a Mulungu

Joze ohotapulela joroha ja atu ambinli mukadeya

¹ Jatene eji jagaireyile, vagamanle malambo, mundimuwa wa anamalaba osakanya jong'wa ja Farawu mwene wa Ijipitu, vamohi na mundimuwa wa aliba wotcha pawu dadja mwene Farawu, aliwa kohomutegela mwene Farawu.

² Mwa enne mwene Farawu ohotakaleliwaga na anamalabaye ambinli ale.

³ Evale liye ohahela kadeya ya vande va mundimuwa wa agwarda, mwemo mwafungeliwe Joze.

⁴ Mundimuwa wa kadeya ule agavahediwe atu ambinli ale, liye ohavaheda mmandani mwa Joze ira aaing'anelege. Evale kohomala malambo madjindjene mukadeya mwemule.

⁵ Siku nimohi mundimuwa wa aliba sakanya jong'wa na mundimuwa wa aliba sakanya pawu, anno kali anamalaba a mwene wa Ijipitu, kohorohaga. Kada mutu annaga yoroha yaye yaye, mahiyu mamohive eto kada mutu yotapulela yaye yaye.

⁶ Mmetcheloni muwa na mabebehi, Joze agaaing'anne, ohaonaga atene kagali okukumuwene.

⁷ Evale ohafukaga anamalaba a Farawu ale, eraga: <<Kodi mwasiwa gwa nni siku na peno kove dinyu kala dokumbanya dene?>>

⁸ Aliwa kohomurumela keraga: <<Hiyo niire roha mahiyu eto kalivo unawanda nitapulela joroha jehu.>> Evale Joze ohawandelaga eraga: <<Unaavaha atu iwandelo yotapulela joroha gu Mulugu! Kawonganimo joroha jenyu, nivwe.>>

Yoroha ya mundimuwa wa aliba sakanya jong'wa ja mwene

⁹ Mwa enne mundimuwa wa jong'wa ule, ohoroma muwandela Joze yoroha yaye eraga: <<Miyo yoroha yaga, dirohile muratchi mmohi ovaha uva agali sogolro waga.

¹⁰ Muratchi ule ohokana tambi diwa taru. Evale dohopuwa, tondo diwa tapuwa, vaha mazamwa a uva. Evale jovaha jile johoitwa.

¹¹ Mwa tempu yenno miyo dafwanyeya dagahidedile kopo ya Farawu mmandani mwaga. Mwa enne dohotukula uva, miyo kamulrelaga nkoponi mule, miyo nvahaga mwene Farawu mmandani mwaye.>>

¹² Evale Joze ohomuwandelaga eraga: <<Yotapulela ya yoroha yenno, tchi ila. Tambi taru ku tapulela malambo mararu.

¹³ Vavira malambo mararu, Farawu unoukutcha mukadeya mu ira auwelihede mabasa walaba we. Era eno, unerege nvaha Farawu kopo yaye mmandani mwaye na jong'wa jaye nnga waira we tempu wali we mundimuwa wa jong'wa.>>

¹⁴ Evale Joze ohowongagave eraga: <<Mbwenye nnouvepa ira waona jawo jauwendela pama, udiomele murima ira udowe wamuwongena mwene Farawu ira adikutche mukadeya muli miyo muno.

¹⁵ Tchoira miyo dibiwile ilambo ya aEberewu, miyo ziwana Ijipitu uno. Eto dagazile Ijipitu uno, kilivo yabure isakanyile miyo yofwanela fungeliwa mukadeya eni.>>

Yoroha ya mundimuwa wa aliba sakanya pawu da mwene

¹⁶ Evale mundimuwa wa aliba sakanya pawu ule agaonne ira Joze ohotapulela pama yoroha ya nfwayele, ohomuwongana Joze eraga: <<Na miyene dihikana yoroha yaga. Miyo dirohile dagapwatenle vamuru vaga mitanga miraru da pawu.

¹⁷ Mutanga ogomiheda wa vazulu ule mohokala ntundu watene wa pawu dedo nnaziveliwa mwene Farawu. Mwa enne eto wohokala mbalrame dazile aliwa ngovolaga jowotcha johiyana hiyana jejo jali mmutangani dapwatenle miyo ule.>>

¹⁸ Mwa enne Joze ohowongaga eraga: <<Yotapulela ya yoroha yenno, tchi ila: Mitanga miraru ku tapulela malambo mararu.

¹⁹ Muwari mwa malambo mararu, Farawu unoukutcha mukadeya ira agwade muru wawo, automeye vaimirini. Era eno mbalrame nnerege za dingovolege mutembo wawo.>>

²⁰ Noira enne, nikwakwanaga siku naneraru, aligi siku nabaliwe mwene Farawu, siku nakwakwaniha liye yaka daye. Mwa enne ohasakanyelaga pwando anamalabaye atene. Siku nenne mwene Farawu ohonkumihamo mukadeya mule mundimuwa wa jong'wa na mundimuwa osakanya pawu, liye azana vamentoni va anamalabaye atene.

²¹ Liye mutukula mundimuwa wa jong'wa, muweliheda mabasaye, roma nvahaga Farawu kopo yaye akoka mmandani mwaye.

²² Mbwenye zela mundimuwa wa aliba sakanya pawu ule, mwene Farawu oharumaga atwaye ira kammangelele, nnga mwemo mwawongele Joze atapulelaga yoroha yaye.

²³ Mbwenye mundimuwa wa aliba sakanya jong'wa ule agamanle welihediwa mabasaye, kamuumbuwenle Joze zela yovepa yaye. Ohofiyeda mwezo omudiwala wene.