Jenesesi 4 - Mazu Otchena a Mulungu

Muselu wa Kayini na Abeli

¹ Evale Adawu ohomugonana muhiyanaye Eva. Agamugonnena, Eva ohokana vambani, liye mbala mwana wa mwanapongwe. Nzina naye kala Kayini. Evale Eva kwi: <<Peno mbwenye Yehova udikamiheda. Dihinkana mwana mulombwana.>>

² Noira eno, ohombalela eto mbalayiwa, nzina naye Abeli. Kagaulukunle, Abeli ali namakumbuza wa mabila. Kayini ali namalima.

³ Siku nimohi Kayini ohotukula ja mmundani mwaye, dowa velela wa Yehova.

⁴ Mbwenye Abeli ohotukula mwa jifuwo jaye, mwanainyama wapama, oroma baliwa, liye pa. Agapile, ohotukula jonuna japama, liye velela wa Yehova. Mwa enne Yehova ohomurumela Abeli na yovelela yaye.

⁵ Mbwenye Yehova kamurumenle Kayini vamohi na jovelela jaye. Na mwasa wenne, Kayini ohotakaleliwa valukulu, liye pota makwizi vakoveni vaye.

⁶ Evale Yehova ohonfuka Kayini eraga: <<Utakaleliwele nni, upotaga makwizi vakoveni vawo?

⁷ Kodi weyo wasakanya yengo yapama kunarumeliwa? Mbwenye wahasakanye yapama, uiziwe ira yotega imala fiya vamulangoni vawo eto inafuna yugondjihe. Mbwenye weyo inafwanela uigondjihe.>>

Kayini ohompa mbalaye Abeli

⁸ Evale Kayini ohomuwongana mbalaye Abeli kwi: <<Ndowe minda.>> Mwa enne kagadowile minda ule, Kayini ohomurungunuwela mbalaye, mpa.

⁹ Evale Yehova ohonfukaga Kayini, liye kwi: <<Mbalawo Abeli uli waani?>> Kayini ohowakulaga eraga: <<Miyo kadiiziwile uli liye. Kodi miyo dili maliba muing'anela mbalaga?>>

¹⁰ Evale Yehova ohonfukaga akoka, liye ira: <<Kodi weyo usakanyile nni? Sangiri na mbalawo neno nitatiyile vateyani, nnodiitana.

¹¹ Na mwasa wenno weyo eni uhumala tembelrelreya zela pandi ya teya yenno ihunle wanoni iwatchela sangiri na mbalawo umpile we na ndanda nawo.

¹² Weyo walima, jolima jawo kajinakumege. Weyo eni unerege wendawenda mwilamboni wagali mutu otawa eto wagali mutu opupuruwa.>>

¹³ Evale Kayini ohowonga na Yehova eraga: <<Matongelo mudivahile nyo kohosimbwa ulukula! Miyo kannawanda!

¹⁴ Kaing'anani, nyo peno munaditamangiha vateyani volima eto miyo kadiza dikala vamentoni venyu akoka, so mabasaga nnakala mutu otawa eto mutu opupuruwa mwilamboni ya vati. Eto mutu uli watene unadifwanye unagomela dipa.>>

¹⁵ Mbwenye Yehova ohomuwakulaga eraga: <<Nari. Yeniyo mbwenye kinaireya. Tchoira mutu wenne unaupe weyo, atu atanu na ambinli a muibalini mwaye anokwa.>> Noira eno, Yehova ohomuhela Kayini sinale ira mutu uli watene anfwanya, ahampe.

¹⁶ Noira eno, Kayini ohokumaga vamentoni va Yehova, liye maruwa dowaga makumelo wa nzuwa wa Edeni, dowa kalaga ilambo ya Node.

Ahima a Kayini

¹⁷ Kayini ohomugonana muhiyanaye, muhiyanayele kana vambani. Mwa enne ohombala mwana wa mwanapongwe, liye nvaha nzina na Enoki. Noira eno, mulombwana Kayini ohomanga sidadi imohi, liye vaha sidadile nzina na Enoki, nzina neno nanvahile liye mwanaye ule.

¹⁸ Enoki ohombala Irade, Irade ohombala Mewujayeli, Mewujayeli ohombala Metusayeli, Metusayeli ohombala Lameki.

¹⁹ Lameki aatenle ahiyana ambinli. Muhiyana mmohi aitaniwa Ada eto muhiyana mmohiwa aitaniwa Zila.

²⁰ Ada ohombala mwanapongwe eriwa Jabali, wenno ali mundimuwa wa atu anno anawendawenda na misasa diwa kadjihaga ng'ombe.

²¹ Jabali ohomukana eto mbalaye aitaniwa Jubali, wenno ali mundimuwa wa atu anne anaimba arpa na falauta.

²² Eto muhiyanaye Zila ohombala mwanapongwe aitaniwa Tubalikayini, wenno ali maliba hana fwaramento dohiyana-hiyana, na mukuwa, na momba. Eto Tubalikayini ohomukana murongoliye aitaniwa Naama.

²³ Siku nimohi mulombwana Lameki ohawongana ahiyanaye ale, liye kwi: <<Ada na Zila, mudivuruwane pama. Nyo ahiyana a Lameki, muvwe yengo nnafuna miyo uwandelani. Inafuna miyo wonga tchi ila. Miyo dihimpa mulombwana mmohi na mwasa odiporotcha bahi. Eto dihimpa mwana muzombwe mmohi na mwasa odinyingala!

²⁴ Akala mutu wenne afune mpa mulombwana Kayini, abalaye atanu na ambinli kogokwa, zela miyo, mutu wenne unadipe, anakwa abalaye 77.>>

Mwana waneraru wa Adawu na Eva

²⁵ Adawu ohowelela mugonana muhiyanaye Eva akoka. Noira enne, Eva ohombala mwanapongwe mmohiwa, liye nvaha nzina na Seti, eraga: <<Mulugu uhudivaha mwanapongwe mmohiwa ira akale vamalroni va Abeli wenno Kayini umpile liye.>>

²⁶ Evale mulombwana Seti agaulukunle, ohombala mwana wa mwanapongwe. Liye nvaha nzina na Enosi. Mwa tempu yenne paromile atu lobelaga nzina na Yehova.