Jenesesi 39 - Mazu Otchena a Mulungu

Joze agali vande va Potifare

¹ AJomayili kagamugunle Joze, kohomudowana Ijipitu, aliwa muguliheda musogolrelri wa agwarda atene a mwene Farawu, aitaniwa Potifare.

² Potifare agamugunle Joze, ohomudowana vande vaye, kala muzari waye. Yehova omusogolrelra Joze. Mwa enne jatene jene jomuwendela pama, liye kalagave vande va muIjipitu ule.

³ Potifare ohoona ira Yehova ali na Joze eto Yehova omureliha zela mabasa matene alaba liye.

⁴ Na mwasa wenne, Potifare ohomufwewela murima Joze. Mwa enne ohomutikela Joze ira akale mundimuwa osogolrelra jatene ja vande vaye.

⁵ Roma vevale Joze vahambihiwe liye kala mundimuwa osogolrelra vande va Potifare vale, Yehova ohoreliha jatene ja vande va muIjipitu ule na mwasa wa Joze. Yehova ohoreliha jatene roma jengo ja vande vamohi na ja mmundani mwaye.

⁶ Mwa enne mulombwana Potifare omuhiyeda Joze johinda jatene ja vande vale ira asogolrelrege. Potifare kabalra yengo yali yatene ya vande vale, so yaye ali yodja yadja liye bahi.

⁷ Jatene eji jagaireyile, vagamanle malambo, mwadi Potifare ohoroma musilrilra Joze, liye kwi: <<Kaza ugone na miyo.>>

⁸ Mbwenye Joze ohokonda eraga: <<Miyo ejo nari. Muing'ane, patarawu udivaheda jatene jene ja vande vano. Kanabalra yengo ili yatene.

⁹ Eto vande vano kalivo odikwaranya miyo. Zela nyo mbwenye, miyo kadihiyediwe ira digone na nyo, mwasiwa nyo muli muhiyanaye. Eto kavili jowandeya ira miyo dimutegele Mulugu waga moirana yengo yotakala nnga yenno.>>

¹⁰ Mwa enne malambo matene mwadi Potifare omukanyihedetchave Joze ira kagone vamohi. Mbwenye Joze ohokalelave konda mugonana nne ira amuwandame kakale vamohi.

¹¹ Mbwenye siku nimohi Joze ohovolowaga mmba ira adowe ahinde mabasaye. Tempu yenne mmba mule kamwafwanyeyaga nne namalaba mmohi. Alimo ali Joze ekave.

¹² Mwa enne mwadi Potifare ohinda yowara ya Joze, liye ira: <<Miyo nnafuna ugone na miyo.>> Mbwenye Joze ohomuhiyedaga mwadi Potifare yowara yaye mmandani, liye kuma mmba mule, tawela unde.

¹³ Evale mwadi Potifare agaonne ira: <<Joze utawa eto udihiyeda yowara yaye>>,

¹⁴ ohoromaga kuwa, aaitanaga anamalaba kali vande vale eraga: <<Kaing'anani nyo! MuEberewu wenno mamunaga umuzilena liye vande vano ira adilabege miyo, peno eto uroma nipudja. Uza wa miyo mofunafuna ira adigonena. Miyo roma kuwa na makalelo ohokala a masika eni.

¹⁵ Agaonne ira miyo dihiroma kuwa, liye uhufiyeda dihiyeda yowara yaye ila, liye tawela unde.>>

¹⁶ Mwa enne mwadi Potifare ohokoyaga yowara ile, fiyeda mamunaye twanyuwa.

¹⁷ Potifare agazile, muhiyanaye ule ohomuwandela mmohive emule, liye wonga eraga: <<Muzari muEberewu wenno mmuzilena nyo ira anilabege mabasa a vande vano, uhuza wa miyo ira adipudje, agone na miyo.

¹⁸ Mbwenye miyo dagaromile kuwa, liye udihiyeda yowara yaye ila, liye tawela unde.>>

¹⁹ Mwa enne Joze patarawaye ule agavwile mazu a muhiyanaye, ira: <<Muzari wenyu jidiirele liye ti jeji>>, ohotakaleliwa na makalelo ohokala a masika.

²⁰ Mwa enne patarawaye ule oharuma atu, aliwa muhinda Joze, dowa muhela kadeya. Kadeya yamuhenle atu ali yenno mwafwanyeya anyakadeya ale kamutegela mwene wa Ijipitu.

²¹ Mbwenye Yehova alive na Joze, liye muirelaga upama eto ohosakanya ira musogolrelri wa kadeya ule amuona Joze, amufwewele murima.

²² Mwa enne musogolrelri wa kadeya ule ohonvaheda Joze utongi ira akale mundimuwa oaing'anela anyakadeya afwaye atene. Mwa enne Joze gwasogolrelra mabasa matene a kadeya ule.

²³ Eto musogolrelri wa kadeya kakukumuwela mabasa amuhiyedile liye Joze, voira Yehova ali na Joze eto omureliha zela jatene jahinda liye.