Jenesesi 37 - Mazu Otchena a Mulungu

Muselu wa Joze

¹ Jako akala ilambo ya Kana wewule wakaletcha babaye nnga mutu oza.

² Ula gu muselu wa Jako na mwanaye Joze. Joze aganna yaka 17, ali namakumbuza wa jifuwo ja babaye. Liye akumbuza vamohi na abalaye amohiwa anno kabaliwe na Bila na Zilpa, anno kafwanyeya kagali ahiyana amohiwa a Jako. Muzombole Joze odowetcha wongaga wa babaye jengo jotakala jaira abalaye ale.

³ Jako wenno aitaniwa na nzina na Izarayeli, asimbwetcha muziveliwa Joze kwaranya ahimaye amohiwa, mwasiwa liye ambanle Joze agaulunle. Mwa enne ohomusonela bata yoriyetchetcha.

⁴ Mbwenye Joze abalaye ale kagaonne ira: <<Baba unamuziveliwa bure Joze kwaranya hiyo vano>>, kohoroma mutakaleliwa fiyeda aliwa hawandaga tapanya na liye mwa makalelo apama.

Joroha ja Joze

⁵ Siku nimohi, Joze ohoroha. Noira eno, ohodowa wa abalaye, liye awandela ira:

⁶ <<Dihiroha. Nnouvepani ira muvuruwane irohile miyo.

⁷ Miyo dirohile nagali mmindani, nimangaga mapitika. Evale nipitika naga nohoimela okave. Eto vohodibeliwa mapitika mwamangile nyo kogumana, aliwa werewera nipitika naga, aliwa nikokorela.>>

⁸ Abalaye kagavwile enne, kohowongaga keraga: <<Mwa ibaribari weyo unafuna ukale mwene wehu ira unitongege hiyo?>> Mwa enne abalaye ale mutakaleliwa wewa wohosimbwagave na mwasa wa joroha jawonga liye jile.

⁹ Siku nimohi niwa, Joze ohoroha akoka, liye awandela abalaye ale eraga: <<Miyo dihiroha akoka. Fendo ila morohani, dionne nzuwa, mwedi, vamohi na nyenyedi kumi na imohi, jatene ejo johoza aliwa diwerewera miyo, dikokorelaga.>>

¹⁰ Mbwenye liye agamuwandenle babaye vamohi na abalaye ale yoroha yenne, babaye agavwile ohomusumulula eraga: <<Kodi yoroha yenno, yoroha nni? Weyo unaumbuwela ira miyo na mmawo na abalawo atene nnoza nukokorelege weyo nifiyihe miru dihu vati?>>

¹¹ Mwa enne abalaye ale komukalela nrima nlukulu. Mbwenye babaye agarati, oumbuwela jengo jatene jene jawongile mwanayele.

Gulihiwa wa Joze na abalaye

¹² Tempu imohi Joze abalaye kohodowaga djiha jifuwo ja babiwa pandi ya Sikemu.

^13-14 Mwa enne, siku nimohi Izarayeli ohowonga na Joze, liye ira: <<Abalawo anadjiha jifuwo Sikemu. Miyo nnafuna durume udowe waaone akala aliwa kali apamene na jifuwo jiwa jene. Wamala, uwelele uno, uze udiwandele.>> Joze ohorumelaga ira: <<Tabo.>> Mwa enne liye ohogundeya ndabo na Eboroni, adowaga pandi ya Sikemu wewo wafwanyeya abalaye.

¹⁵ Joze agafiyile Sikemu ule, ohoromaga wendawenda kokola da wewule, aavendaga. Mwa enne ohokala mulombwana anfwannye, liye nfuka ira: <<We unasaka nni?>>

¹⁶ Liye ohowakulaga kwi: <<Nnaavenda abalaga, anno anadjiha mabila. Nnouvepani, mudiwandele uli atu, akala muhaona.>>

¹⁷ Mulombwanole ohowongaga eraga: <<Uno kohokwaranyawo. Daavwile kawongaga ira: <Kambeni ilambo ya Dotani.> >> Evale Joze ohoromaga dowa Dotani ule, fiyeda afwanya waligi atu.

¹⁸ Mbwenye Joze ule ahanafiye valigi atu vale, abalaye ale kohomuona liye azelaga olapela wene. Mwa enne kohoromaga mpanganela ira kampe.

¹⁹ Kohowonga kada mutu na nfwaye kera: <<Namaroha ule, unaza.

²⁰ Tempu tchenna. Ndoweni nimpeni, amala nimutatileleni muwari mwa isime imohi, dedo nnafwanyeya vale. Nadowa vande, niwongeni ira mwanainyama owopiha gumutakunne. Nione joroha jaye jile jinafuna atu gomela!>>

²¹ Mbwenye Rubeni agavwile zelru da abalaye, ohovenda makalelo ira anvune, liye kwi: <<Kanimpeni.

²² Ira muvuvihe sangiri naye, kinakala pama! Mwafuna, mmuhinde, mmutatilele muisimeni yenno ili mukokolani muli hiyo mu. Eto mwanvokeda emule, kammuirele yabure.>> Rubeni awongaga enne, afunne ira amala azembe, adowe ankumihemo mbalaye ule, anvelele wa babaye.

²³ Kagamanle vwanana enne, Joze agafiyile vafwanyeya atu vale, kohomuhinda, aliwa muwungula bataye yoriya yenno yawarilege liye,

²⁴ aliwa dowa mutatilela muisimeni mwahali mahindje nne mwahali yengo.

²⁵ Noira eno, aliwa garati, roma dja. Evale kadjaga, kohaona aJomayili kaviraga. AJomayili ale, kakuma ilambo ya Jileyadi, kadowa guliha malrondiwa Ijipitu. Aliwa kohokana mitolro diwa doindjiva kagwelihile atu vazulu va akamelo ewa. Katukunlege makura onukela, balsamu, mira, kadowaga guliha Ijipitu.

²⁶ Evale Juda ohowonga na abalaye, liye ira: <<Kodi hiyo nampa mbalihu, nikuwa ukwa waye, jinanilabela nni?

²⁷ Ndoweni naagulihedeni aJomayili ale. Kanimuireleni yotakala, ineriha liye gu mbalihu wa sangiri nimohive.>> Liye agawongile enne, abalaye kohorumela.

²⁸ Mwa enne aliba malronda aJomayili ale kagafiyile vafwanyeya atu vale, abalaye ale kohonkumihamo Joze muisimeni mule, aliwa aguliheda na kobiri da parata 20, molingana na mapimelo kalabana atu tempu yenne. Evale aJomayili kohomudowana Joze Ijipitu.

²⁹ Abalaye ale tempu yamukumihamo atu Joze muisimeni mule kamugulihaga, mbaliwa Rubeni ule kalivo. Evale vazilege liye apatamela muisimeni mule ahanfwanyamo, ohokawula jowara jaye.

³⁰ Mwa enne ohowelela wa abalaye kwi: <<Muzombole muisimeni mule kalimo! Miyo nnafuna didowe waani?>>

³¹ Evale aliwa kohosiga mbuzi, aliwa tukula bata ya Joze yoriya ile, aliwa ibwiniha musangirini mule, mala zoliheya sangiri yatene yenne.

³² Noira enne, kohotukulaga batele, aliwa dowa muoniha babiwa, atu kwi: <<Kaing'anani babani batela. Nifwannye yagali vati gwembelre. Muing'ane akala tchenna ya mwaninyu.>>

³³ Evale Jako againg'anne, ohowongaga eraga: <<Mwa ibaribari batela tcha mwanaga Joze. Na ibaribari Joze mwanainyama wa mukokolani gumutakunne, liye munyenya.>>

³⁴ Evale Jako mokumbanya mwaye, ohokawulaga jowara jawarilege liye, tukula sakwi, liye mangiha mmwinini mwaye. Evale ohomala malambo madjindji amunlelaga mwanaye.

³⁵ Mwa enne anaye atene, anavihiyana, anapongwe, kofunafuna ira kammiyalihe babiwa ule. Mbwenye Jako kawanda miyaliheya. Ohowonga eraga: <<Nnerege nla eni fiyeda dikwe, didowe Nimburo na Anokwa dagumane na mwanaga.>> Mwa enne ohokalelave munlela mwanaye.

³⁶ Aliba malrondale kagamugunle Joze, kamudowilena Ijipitu, aliwa muguliheda mulombwana mmohi eriwa Potifare, wenno afwanyeya agali musogolrelri wa agwarda a Farawu, mwene wa Ijipitu.