Jenesesi 36 - Mazu Otchena a Mulungu

Ahima a Ezawu

¹ Ula gu muselu wa nlogo na Ezawu wenno unaitaniwa Edomu.

² Ezawu aatenle ahiyana a ilambo ya Kana. Muhiyana mmohi ali Ada mwana Eloni, nkuda Eti. Mmohiwa ali Olibama mwana Anaya. Anaya ule babaye ali Zibeyawu nkuda Evi.

³ Muhiyana mmohiwa ali Basemate mwana Jomayili, Nebayoti murongoliye.

⁴ Mwadi Ezawu mmohi aitaniwa Ada ule ambanle Elifaji. Eto muhiyana mmohiwa aitaniwa Basemate ule ambanle Reuweli.

⁵ Eto muhiyana mmohiwa aitaniwa Olibama ule ahima aabanle liye ba ala: Jeyusi, Jalawu, na Kora. Ahima anna Ezawu aabanle agali ilambo ya Kana.

⁶ Noira eno, Ezawu ohatukula ahiyanaye, ahimaye a anapongwe na anavihiyana, vamohi na atwaye atene a vande vaye, jifuwo jaye jatene, na jokana jaye jatene jejo japatile liye ilambo ya Kana, liye tamela ilambo imohiwa, mwalana na mbalaye Jako.

⁷ Tchoira aliwa tchawanda kala vamohive na mwasa oira atenene kohokana jorayela jidjindji. Ilambo yowendela ile, tchanna nimburo nlukulu nofwanela ira atene anne kakale wewule, na mwasa oindjiva wa anavinyama kanna atu.

⁸ Na mwasa wenne, kohomwalana, mulombwana Ezawu dowa kalaga pandi ya Seyire, wewo wafwanyeya mwango didjindji. (Ezawu mmohive wenne eto oitaniwa na nzina na Edomu.)

⁹ Ula gu muselu wa nlogo na Ezawu, wenno ali nikolo na akuda Edomu, anno kafwanyeya pandi ya Seyire, wewo unafwanyeya mwango didjindji.

¹⁰ Mazina a ahima a mulombwana Ezawu ba ala: Elifaji wenno ambanle liye na muhiyanaye Ada, na Reuweli mwana wa muhiyanaye Basemate.

¹¹ Ahima a Elifaji ba ala: Temani, Omare, Zefu, Gayetani, na Kenazi.

¹² Elifaji mwana Ezawu ohomukana mwendaye aitaniwa Timina. Liye ohombala Amaleki. Ahima anna kakumile mwa Ada, Ezawu muhiyanaye.

¹³ Ahima a Reuweli mwana Ezawu ba ala: Nahati, Zera, Sama, na Miza. Ahima anna kakumile mwa Basemate, Ezawu muhiyanaye.

¹⁴ Eto ahima a Olibama mwana Anaya, muzula wa Zibeyawu, aabanle liye na Ezawu ba ala: Jeyusi, Jalawu na Kora.

¹⁵ Ala ba mazina a asogolrelri a malogo anno kakumile muwari mwa ahima a Ezawu. Muwari mwa nlogo na Elifaji, wenno ali mwana murandji wa Ezawu, mazina a asogolrelri ewa ba ala: Temani, Omare, Zefu, Kenazi,

¹⁶ Kora, Gayetani na Amaleki. Ala bafwanyeya kagali asogolrelri a nlogo na Elifaji mwilamboni mwa Edomu, anno kakumile mwa Ada, mwadi Ezawu.

¹⁷ Muwari mwa nlogo na Reuweli, mwana mmohiwa wa Ezawu, mazina a asogolrelri ewa ba ala: Nahati, Zera, Sama na Miza. Anna bali asogolrelri a ahima a Reuweli, mwilamboni mwa Edomu, anno kakumile mwa Basemate, mwadi Ezawu.

¹⁸ Muwari mwa nlogo na ahima a Olibama, wenno ali mwadi Ezawu, mazina a asogolrelri ewa ba ala: Jeyusi, Jalawu, na Kora. Anna bali asogolrelri muwari mwa ahima a mwadi Ezawu wenno aitaniwa Olibama, mwana Anaya.

¹⁹ Atene anna kali ahima vamohi na asogolrelri kakumile mwa mulombwana Ezawu wenno unaitaniwa eto na nzina na Edomu.

Ahima a Seyire

²⁰ Ala ba mazina a ahima a mulombwana Seyire, nkuda Hori, anno kafwanyeya kagali anamurala a ilambo ya Edomu: Lotani, Sobali, Zibeyawu, Anaya,

²¹ Disoni, Ezeri, na Disani. Ahima a Seyire ala, kali asogolrelri a akuda Hori mwilamboni mwa Edomu.

²² Eto Lotani ahima aabanle liye ba ala: Hori na Homani. Lotani ohomukana eto murongoliye aitaniwa Timina.

²³ Sobali ahimaye ba ala: Alivani, Manahati, Ebali, Sefo, na Onani.

²⁴ Ahima a Zibeyawu ba ala: Ayiya na Anaya. Anaya gwenne afwannye isime ya mahindje okaha bure kokolani adjihaga aburu a babaye Zibeyawu.

²⁵ Anaya aabanle ahima ambinli. Mwana mmohi ali wa mwanapongwe aitaniwa Disoni, mwana mmohiwa ali mwana muhiyana aitaniwa Olibama.

²⁶ Ahima a Disoni ba ala: Hamurani, Esibani, Itarani, na Kerani.

²⁷ Ahima a Ezeri ba ala: Bilani, Zavani na Akani.

²⁸ Ahima a Disani ba ala: Uzi na Arani.

^29-30 Eto akuda Hori, anno kafwanyeya kagali anamurala a ilambwele, asogolrelri ewa maziniwa ba ala: Lotani, Sobali, Zibeyawu, Anaya, Disoni, Ezeri na Disani. Anna bali asogolrelri katonga ilambo ya Seyire molingana na makalelo kaigawile atu.

Amwene a Edomu

³¹ Ala ba mazina a amwene katongetcha ilambo ya Edomu, Ana Izarayeli kahanakayena mwene wewa.

³² Mwene murandji ali mulombwana Bela mwana Beyori. Liye atonga ilambo ya Edomu eto ali wa sidadi ya Dinaba.

³³ Noira eno, Bela ohokwa. Agakwile, Jobabe mwana Zera wa sidadi ya Bozira gwahambile umwene vamalroni vaye.

³⁴ Eto Jobabe agakwile, mulombwana Huzawu wa ilambo ya akuda Temani, gwahambile umwene vamalroni vaye.

³⁵ Huzawu agakwile, mulombwana Hadade, mwana Bedadi wa sidadi ya Avite, gwahambile umwene vamalroni vaye. Mulombwana Hadade gwenno aagondjihile akuda Midiyani kawanaga muwari mwa ilambo ya Mowabe.

³⁶ Hadade agakwile, Samela wa ilambo ya Masareka, gwahambile umwene vamalroni vaye.

³⁷ Samela agakwile, mulombwana Sawuli wa Rehoboti, sidadi yenno inafwanyeya wandamelana muhindje Eufarati, gwahambile umwene vamalroni vaye.

³⁸ Eto Sawuli agakwile, mulombwana Bali-Anani mwana Akibori gwahambile umwene vamalroni vaye.

³⁹ Bali-Anani mwana Akibori agakwile, Hadari gwahambile umwene vamalroni vaye. Mulombwana Hadari ali wa sidadi yaitaniwa Pawu eto muhiyanaye ali Metabeli, mwana Materedi. Materedi babaye ali Me-Zahabi.

Mazina a asogolrelri kakumile muibalini mwa Ezawu

⁴⁰ Ala ba mazina a asogolrelri anno kakumile muibalini mwa Ezawu: Timina, Aliva, Jeteti,

⁴¹ Olibama, Ela, Pinoni;

⁴² Kenazi, Temani, Mibizari,

⁴³ Magidiyeli na Irani. Asogolrelri atene anna kali andimuwa a kada nlogo eto ilambo yakala kada mundimuwa yaitaniwa na nzina nimohive neno naitaniwana liye. Kada mutu ohokana ilambo yatonga liye. Eto babi wa akuda Edomu atene unafwanyeya agali mulombwana Ezawu.