Jenesesi 35 - Mazu Otchena a Mulungu

Jako ohowelela Beteli

¹ Jagaireyile enne Mulugu ohomuwandela Jako eraga: <<Venya udowe wakalege Beteli, wasakanyede ibuwa ya mukuto wa Mulugu wenno autwanyuwele tempu wamutawa we mbalawo Ezawu.>>

² Evale Jako ohawandelaga ahiyanaye na ahimaye vamohi na atu atene kafwanyeya na liye vande vaye, liye ira: <<Mudowe mwaatatile amilugu a atu a unde anno munna nyo. Muvitchenihe, muware nguwo dimohi diwa dapama.

³ Nivenyemo mwilamboni muno, nidowe Beteli. Tchoira miyo nnafuna dasakanyede ibuwa ya mukuto wa Mulugu wenno udikamihedile tempu yasimela miyo eto unafwanyeyave na miyo movira mwaga mwatene.>>

⁴ Evale aliwa kohonvaheda Jako amilugu atene a atu a unde kanna atu vamohi na birinku dawarile atu baruni wewa. Kaganvahedile, Jako ohotukulaga jatene ejile, liye dowa timbela vati va mutengo wa karvaliyo afwanyeya wandamelana Sikemu.

⁵ Evale aliwa kohovenyihanaga, aliwa dowaga. Eto Mulugu ohosakanya ira sidadi dowandamana a ilambo yenne kaaovege. Mwa enne kalivo aaharile akuda Jako.

⁶ Evale Jako vamohi na atwaye atene kohofiyaga sidadi ya Luji yenno yanna nzina nimohi niwa na Beteli muwari mwa ilambo ya Kana.

⁷ Agafiyile wewule, ohosakanyaga ibuwa ya mukuto, liye vaha nimburo nenne nzina na Mulugu wa Beteli. Tchoira Mulugu amutwanyuwele Jako nimburo nenne tempu yamutawa liye mbalaye.

⁸ Eto ali wewo wakwile Debora wenno ali makayaya wa Rebeka, liye koyiwa wandamelana Beteli mutchindo mwa mutengo wa karvaliyo. Evale vamutengoni vale kohovaha nzina na Aloni-Bakute, [ku wonga Mutengo Onla Kuto].

Mulugu ohomutchindja Jako nzina

⁹ Jako agakumile ilambo ya Padani-Arani, Mulugu ohomutwanyuwela akoka, liye mureliha eraga:

¹⁰ <<Weyo nzina nawo unaitaniwa Jako. Mbwenye kuma peno dowa sogolro kunaitaniwegeve na nzina na Jako. Nzina nawo unaitaniwege Izarayeli.>> Mwa enne Mulugu ohonvaha nzina na Izarayeli.

¹¹ Noira eno, Mulugu ohomuwandelaga, liye ira: <<Miyo dili Mulugu wa Kopolo Datene. Weyo na ahimawo mubalihane, muindjivihane. Mwa weyo munoza mukume nlogo nimohi vamohi na malogo madjindji eto amwene anaza kakumelege mwa weyo.

¹² Ilambo yenno danvahile miyo Abarahamu na Izaki, nnouvaha weyo eto nnoza daavahe ahimawo a musogolro.>>

¹³ Mwa enne Mulugu ohovenyagavo vevale vawongaga liye na Jako vale.

¹⁴ Agavenyilevo, mulombwana Jako ohoimelihagavo nibwe nnga nimbozo ira nikale ionihedo zela nimburo neno Mulugu amuwongilena liye, liye kutulelavo yovelela ya jong'wa na makura.

¹⁵ Mwa enne nimburo nawonga Mulugu vamohi na liye nne, Jako ohovaha nzina na Beteli.

Baliwa wa Benjami

¹⁶ Evale aliwa kohovenyawo Beteli, aliwa dowaga sidadi ya Efarata. Mwa enne aliwa kagali mundila, kakwivelaga Efarata ule, tempu yenne Rakeli johomutatamuwa jopa jobala. Ira abale jali jorutcha jene.

¹⁷ Evale namabaliha agaonne katamiheya wa Rakeli, ohomuwandelaga, liye ira: <<Kuove! Tchineneva unombala mwana mmohiwa wa mulombwana.>>

¹⁸ Muwari mwa goyi yobala ile Rakeli ohofiyeda kwa. Mbwenye ahanamariheye, avumelaga vati vati, ohonvaha mwanaye ule nzina na Benoni, [ku wonga mwana wa goyi daga]. Mbwenye babaye ohonvaha nzina nimohi niwa na Benjami, [ku wonga mwana wa muwononi odjana].

Koyiwa wa Rakeli

¹⁹ Mwa enne Rakeli ohokwa, liye koyiwa wandamelana ndila inadowa Efarata, wewo unaitaniwa na nzina na Beleme malambwala.

²⁰ Nimburo nenne vakoyiwe Rakeli, Jako ohoimelihavo nibwe nnga nimbozo ira nikale ionihedo. Fiyeda ante peno eni, nimbozo nne nnafwanyeya evale, nitonyihedaga masiye akoyiwe Rakeli.

²¹ Noira enne, mulombwana Izarayeli ohokwaranyagavo, liye dowa manga misasa daye sogolro wa nyumba yolapa ya gwarda yafwanyeya Ederi.

²² Mwa enne Izarayeli akalaga ilambo yenne, mwanaye Rubeni ohodowa mugonana Bila, babaye muhiyanaye wang'ono. Evale babaye ohovwa jejo jairile Rubeni. Jako ahimaye atene a alombwana kali kumi na ambinli.

Ahima a mulombwana Jako

²³ Ahima aabanle liye na Leya ba ala: Rubeni wenno ali mwanaye oroma, Simeyawu, Levi, Juda, Isakari, na Zebuloni.

²⁴ Ahima aabanle liye na Rakeli ba ala: Joze na Benjami.

²⁵ Ahima aabanle liye na Bila namalaba wa Rakeli, ba ala: Dani na Nafitali.

²⁶ Ahima aabanle liye na Zilpa namalaba wa Leya, ba ala: Gadi na Azeri. Ahima atene anna, aabanle agali ilambo ya Padani-Arani.

²⁷ Nomala enne, Jako ohovenyihanaga, liye dowa kala wa babaye Izaki ilambo ya Mamere, ku wonga ilambo ya Kiriyati-Araba wandamelana Eboroni, wewo wakala Abarahamu na Izaki nnga atu oza.

²⁸ Mulombwana Izaki kalawo waye watene amanle yaka 180.

²⁹ Mwa enne Izaki ohokwa mwa murendele, agamanle ulula. Liye dowa gumana na makolo aye anno kakwile. Evale ahimaye Ezawu na Jako kohodowa mukoya.