Jenesesi 31 - Mazu Otchena a Mulungu

Mulugu ohomuruma Jako ira awelele ilambo ya ababaye

¹ Jako ohovwa ira ahima a anapongwe a moyaye Labawu kowonga iraga: <<Jako uhutukula jengo jatene jene jali ja babihu eto uhumala rayela na mwasa wa jengo ja babihu utukunle liye.>>

² Eto Jako ohoiziwa ira malambo anne Labawu kamuziveliwa nnga jeretcha liye voroma vene.

³ Evale Yehova ohomuwandela Jako eraga: <<Venya uwelele ilambo ya ababawo na ilambo ya atu a nlogo nawo. Miyo nnokala na weyo.>>

⁴ Mwa enne Jako ohaitanihaga ahiyanaye ambinlene, Rakeli na Leya ira kaze kokolani wafwanyeya liye adjihaga anavinyama.

⁵ Aliwa kagazile, ohawandelaga eraga: <<Miyo nnaona ira malambo anna babinyu kanadiziveliwa nnga veretcha liye wanle. Mbwenye Mulugu wa babaga ulive na miyo.

⁶ Eto nyo muhuiziwa ira miyo nnomulaba babinyu na kopolo daga datene.

⁷ Mbwenye babinyu ohofiyeda dinyengaga, liye tchindjaga yotambilra yaga fiyeda fendo kumi dene. Mbwenye mwa jatene jejo, Mulugu waga kamuhiyile ira liye adiirele yabure ili yatene.

⁸ Babinyu adiwandela ira: <Anahima a donga donga anabaliwege anakalege awo>, mabila matene kaarela ahima a donga donga. Eto adiwandela ira: <Hehi, ahima atene a malremba anabaliwege anakalege awo>, mabila matene kabala ahima a malrembave.

⁹ Ayo ali makalelo Mulugu asakanya liye, atukulaga anavinyama a babinyu, divahaga miyo.

¹⁰ Siku nimohi, tempu yagumana mabila ale, miyo dohorohaga. Darohilege dagavenyihile meso aga, daonnege ira mbuzi datene da alombwana dagumanne vamohi na ahiyana, datene dali da malremba na da donga donga na da kore mbinli.

¹¹ Evale mungelro wa Mulugu ohodiitanaga morohani, liye ira: <Jako!> Miyo dohowakula miyo ira: <Miyo vano!>

¹² Liye ohodiwandelaga ira: <Kaing'ana, anavinyama atene a alombwana anagumana na anavinyama a ahiyana atene ba a malremba na a donga donga na a kore mbinli. Unairana jatene ejo gu miyo, mwasiwa dihiona jatene Labawu jinauirela liye.

¹³ Miyo dili Mulugu wenno dautwanyuwele ilambo ya Beteli, vevo vakutulenle we makura vanibweni noimela nnga nimbozo, vevo vasakannye we yolumbela na miyo. Uvenye tchineneva, ukume ilambo yenna, uwelele ilambo ya atu a nlogo nawo.> >>

¹⁴ Noira enne, Rakeli na Leya kohomuwakulaga mamuniwa Jako, aliwa ira: <<Hiyo nihirumela jatene jiwongile nyo. Tchoira uno hiyo kaninnawo yehu, nne pandi imohi ya jorayela ira babihu unonivaha.

¹⁵ Babihu unanisakanya nnga nili atu oza. Eto liyene uhufiyeda niguliha, liye mala nonga kobiriwa yatene yafuna kala yehu.

¹⁶ Tchoira jorayela jatene Mulugu jimuwakile liye babihu, jinakala jehu, vamohi na ahimihu. Hiyo peno nnorumela ira mwirena jatene nnga mwemo Mulugu muuwandenleni liye.>>

¹⁷ Evale Jako ohagweliha ahiyanaye na ahimaye vaakameloni

¹⁸ eto liye atukula anavinyamaye atene na jorayela jaye jatene japile liye agali ilambo ya Padani-Arani, liye gundeya ira adowege wa babaye Izaki, ilambo ya Kana.

¹⁹ Fwanyeya ira tempu yavenyihanaga atu, Labawu aligi pandi imohiwa, asataga mabila. Evale Rakeli ohoba vikwamutu josema ja babaye, liye dowagana.

Labawu ohomuhara Jako ira amuirele yabure

²⁰ Mwa enne Jako ohowanda muxangaxanga moyaye Labawu, nkuda Aramu, liye tawa vande vaye Labawu ahaiziwaga.

²¹ Atawaga, atawile na atwaye na jatene janna liye, aliwa lambuwa muhindje Eufarati, dowa mwango da Jileyadi.

²² Vagavirile malambo mararu, Labawu ohowandeliwa ira: <<Jako uhutawa.>>

²³ Evale Labawu agavwile enne, ohatukulaga abalaye, aliwa maruwa, roma mutamangelaga Jako. Kagamanle malambo matanu na menli kawendaga, kohonfwanya mwango wa Jileyadi.

²⁴ Mbwenye Mulugu ohomutwanyuwela Labawu nkuda Aramu ora ya mahiyu morohani, liye muwandela eraga: <<Polre polre, unamuirele Jako yabure ili yatene!>>

²⁵ Labawu ohonfwanyaga Jako agagaratile, agakungile misasa daye mwangoni ule. Evale Labawu na abalaye ale kagafiyile, na aliwene kohokunga misasa diwa mwangoni wewule muwari mwa ilambo ya Jileyadi.

²⁶ Mwa enne Labawu ohonfuka Jako eraga: <<Kodi mwasiwa gwa nni udizembaga, waatukulaga ahimaga nnga atu ohindiwa kondoni?

²⁷ Mwasiwa gwa nni utawaga, udinyengaga wahadiwandela ira: <Nnafuna didowege.>? Ahakale udiwandela, miyo dogosakanya pwando yopanganyana yohagalala, na nyumbo na makotcho na arpa.

²⁸ Mbwenye weyo kudihiyile miyo daalanya anaga na azulaga. Weyo mbwenye usakanyile ja uzimora jawo!

²⁹ Miyo dogouirela yotakala, mbwenye Mulugu wa ababawo gudiwandenle mahiyu ira: <Polre polre inafuna we wonga na Jako. Mwagumana, kuwonge yengo yabure nne yengo yapama!>

³⁰ Akala weyo wohokana yofunafuna yodowa vande va ababawo, kavali makani. Nnga mwasiwa gwa nni utukulaga amilugu aga?>>

³¹ Evale Jako ohomuwakula Labawu, liye kwi: <<Miyo diza duzembagani, dera uovani ira munadiwake na kopolo ahiminyu daatenle miyo ala.

³² Mbwenye zela vikwamutu josema munawonga nyo jo, mwanfwanyana veva mutu utukunle, nyo podi mpa. Musayele yatene ili yenyu, vamentoni va abalihu atene, muvitule yenno itukunle miyo, mutukule.>> Jako awongaga enne kaiziwile ira muhiyanaye Rakeli gwabile.

³³ Evale Labawu ohovolowaga mmusasani mwa Jako, liye sayelamo, kafwannyemo. Liye dowa mmusasani mwa Leya, kafwannyemo. Liye dowa mmusasani mwa anamalaba ambinli a ahiyana ale, funa sayelamo kafwannyemo. Noira eno, ohodowaga volowa mmusasani mwa Rakeli.

³⁴ Fwanyeya ira mwa tempu yenne Rakeli vikwamutu josema jile ahenlege muwari mwa yengo inagarateliwa vakameloni eto ohotukulaga liye garatela. Evale Labawu agavolowile, funa venda mwatene emule kafwanyilege.

³⁵ Noira enne, Rakeli ohomuwandelaga babaye ule, liye ira: <<Babani munadiumbuwelegena jotakala. Miyo mwadiona dahavenyaga, kahi ira dire tukula nari. Miyo hawandaga venya tchoira peno kadili pama.>> Evale Labawu ohokalelagave ntindi avendaga vikwamutu josema jaye, mbwenye kaonnege.

³⁶ Mwa enne Jako ohotakaleliwaga, liye roma musumulula Labawu eraga: <<Kodi yotakala tchivi isakanyile miyo? Ditegile nni, ante nyo fiyedaga dihara na makalelo anna?

³⁷ Kodi mwa jengo jaga jatene jimanle nyo bwanyula ji, muhufwanyavo yengo imohi nibile hiyo vande venyu? Akala muhufwanya yengo ili yenyu, kavitulani vamentoni va atwaga na atwinyu atene anafwanyeya eva ala ira kanitonge mwa hiyo atu ambinli mutu guvi umutegenle nfwaye.

³⁸ Miyo dali waninyu yaka 20 dulabagani. Mabila na mbuzi denyu kajitatinle ahimiwa. Miyo eto kaditakunne nne mwana nibila nenyu nimohi.

³⁹ Miyo didjihaga, kadibabihile zana vande nibila nenyu nimohi nagahindiwe mwanainyama wa mukokolani nnga jinaireyetcha. Mwana nibila nenyu nimohi nahindiwa, vamalroni va mwana nibila nihindiwile nne, miyo dotukula mwana nibila naga nimohi, miyo welihedavo nnga mwadirumile nyo. Mabila matene kabiwa, akala ntana nari mahiyu, nyo modipagalriha.

⁴⁰ Yaka dedo, miyo ora ya ntana doja nzuwa, ora ya mahiyu kadagona, dakana ona goyi no didila.

⁴¹ Miyo dihilaba yaka 20 vande venyu. Yaka kumi na nnayi daalabela ahiminyu ambinli ira daatele. Yaka tanu na imohi dalabela ira divahiwe anavinyama. Mbwenye nyo modinyenga mutchindjaga yotambilra yaga fendo kumi dene.

⁴² Ahakalaga Mulugu wa makolo aga, Mulugu wa Abarahamu na Mulugu owopiha wa babaga Izaki adikamiheda, nyo peno mwadihiya didowege eno manda ve. Mbwenye Mulugu uhuona goyi daga na mabasa dalaba miyo, mwa eno, nzilo ora ya mahiyu, liye usumululani.>>

Labawu ohosakanya yopangana na Jako

⁴³ Evale Labawu ohomuwakulaga Jako eraga: <<Jatene jinna we jikumile mwa miyo. Ahiyanawo ala ba ahimaga eto ahimiwa anno kaabanle atu ba anaga. Eto anavinyama atene anna vamohi na jatene jeji jinaona we ji, jaga. Nnga miyo nnafuna daairele avi ahimaga ala vamohi na ahimiwa anno kaabanle atu?

⁴⁴ So yapamiwa, miyo na weyo nisakanye yopangana yowandana, ikale umboni zela weyo vamohi na miyo.>>

⁴⁵ Evale Jako ohotukulaga nibwe, liye imeliha nnga nimbozo.

⁴⁶ Nomala ohawandela atwaye eraga: <<Kagudelani mabwe madjindji vamohive.>> Evale aliwa kohogudelaga mabwe madjindji vamohive kala kamba indimuwa ya mabwe. Kagagudenle mabwale, aliwa kohodja wandamelana vamabweni vale.

⁴⁷ Evale Labawu ohovaha nimburo nenne nzina na Jegari-Saduta [ku wonga kamba ya umboni na iwongelo yaye], mbwenye Jako nimburo nne avahile nzina na Galedi [ku wonga kamba ya umboni na iwongelo yaye].

⁴⁸ Nomala Labawu ohowonga eraga: <<Kamba ya mabwe ila inalaba ira ikale umboni ozela miyo na weyo peno.>> Nona kamba ya mabwe ile iitaniwaga na nzina na Galedi.

⁴⁹ Eto ilambo yenne, Labawu ohovahaga nzina nimohi niwa na Mizipa [ku wonga nimburo noing'anelavo], liye ira: <<Yehova gunaniing'anela, masiki nagali olapela wene kada mutu na nfwaye.

⁵⁰ Weyo waaonihaga goyi ahimaga, nari waahiya ahimaga, udowa waatela ahiyana amohiwa, masiki vahali mutu unaniing'anela, inafwanela uiziwe ira Mulugu unokala mboni ozela miyo na weyo.>>

⁵¹ Evale Labawu ohomuwandela Jako eraga: <<Mabwala kagudeliwe va ala eto nibwe niimetchile miyo nnga nimbozo vari va weyo na miyo, ba madilre.

⁵² Nibwe nimohi niimetchihiwe nnga nimbozo ni na mabwe kagudeliwe vamohive ala anakala umboni ira miyo kadikwaranye mabwe ala diza duirela weyo yengo yabure. Eto na wenne ikale yengo imohive, kukwaranye mabwe ala vamohi na nibwe noimela nnga nimbozo ni uza udiirela miyo yengo yabure.

⁵³ Mulugu wa Abarahamu, Mulugu wa Nahori na Mulugu wa babiwa akale unafuna nitonga muwari mwa miyo na weyo.>> Mwa enne Jako oholumbela na nzina na Mulugu Owopiha wa babaye Izaki.

⁵⁴ Jako ohovelela mukuto mwangoni wewule, liye awandela atwale ira atene kadowe kadje pawu. Evale aliwa kohodjaga, aliwa gona evale.

⁵⁵ Mmetcheloni muwa na mabebehene, Labawu ohovenya dowa akumbarela ahimaye ambinli ale vamohi na azuliye, liye areliha. Noira eno, ohovenyaga, awelelaga mundulri, liye dowaga waniwa.