Jenesesi 30 - Mazu Otchena a Mulungu

¹ Rakeli vaonne liye ira: <<Miyo kannawanda mbala mwana na mamunaga>>, ohoromaga mukalela nrima mbalaye Leya. Mwa enne ohowonga na mamunaye Jako eraga: <<Udivahe garavida ira dimukayena mwana. Wahafune, miyo nnokwa.>>

² Evale Jako ohotakaleliwaga na mazu a Rakeli, liye ira: <<Weyo unaumbuwela ira miyo dili vamalroni va Mulugu? Mulugu guirilena ira wahabalege, hiya kala miyo.>>

³ Evale Rakeli ohowonga na mamunaye Jako, liye ira: <<Miyo nnouvaha namalabaga Bila. Umutukule urome mugonana, ahima anaabalege liye na weyo, kakalege anaga ira na miyene dikayena ahima muwari mwa liye.>>

⁴ Mwa enne Rakeli ohonvaheda namalabaye Bila ira akale muhiyanaye, Jako liye roma mugonana.

⁵ Noira enne, Bila ohokana vambani, liye mbala mwanapongwe na Jako.

⁶ Evale Rakeli ohoira: <<Mulugu uhuditonga mwapama, uvwa yovepa yaga, uhudivaha mwana wa mwanapongwe.>> Mwa enne ohonvaha mwanole nzina na Dani [ku wonga tonga].

⁷ Noira enne, Bila ohokana vambani akoka, liye mbalela Jako mwana mmohiwa wa mulombwana.

⁸ Evale Rakeli ohowonga eraga: <<Dohokana wana undimuwa na mbalaga, mbwenye dihimugondjiha.>> Mwa enne ohonvaha mwanole nzina na Nafitali [ku wonga wanawana].

⁹ Eto Leya agaonne ira eniva dihigoma, kannawelela bala akoka, ohomutukula namalabaye Zilpa, liye nvaheda mamunaye Jako ira akale muhiyanaye.

¹⁰ Evale Jako ohoromaga mugonana Zilpa, fiyeda kana vambani, liye mbala mwanapongwe.

¹¹ Evale Leya ohoiraga: <<Dihikana ngari.>> Mwa enne ohonvaha mwanole nzina na Gadi [ku wonga ngari].

¹² Noira eno, Zilpa namalaba wa Leya ule, ohombalela mulombwana Jako mwana mmohiwa wa mwanapongwe.

¹³ Mwanole agabaliwile, Leya ohowonga eraga: <<Miyo dihikana hagalala. Eto ahiyana amohiwa kadiona, anoona ira dihikana hagalala.>> Mwa enne ohonvaha mwanole nzina na Azeri [ku wonga hagalala].

¹⁴ Tempu yorenda tirigu, siku nimohi Rubeni mwana Leya agadowile minda, ohoonaga yomela imohi yofuneya yaitaniwa mandaragora, liye tukula dowa nvaha mmaye. Evale Rakeli agaonne enne, ohomuwongana Leya, liye ira: <<Nnouvepa ira udivahemo mandaragora uzilena mwanawo.>>

¹⁵ Evale Leya ohomuwakula eraga: <<Kodi mamunaga udiwakile we ule kaukwakwanne? Eto unafuna udiwake mandaragora a mwanaga?>> Evale Rakeli ohomuwakula, liye ira: <<Udivahe mandaragora ayo, mahiyu anna Jako unoza agone na weyo.>>

¹⁶ Tchiguwoni uwa Jako akumaga minda, Leya ohomuharela ndila, liye ira: <<Peno weyo uli waga tchoira dihimala ugula na mandaragora a mwanaga.>> Evale mahiyu anne Jako ohogona na Leya.

¹⁷ Noira eno, Mulugu ohovwa lobela wa Leya, liye kana vambani, mbala mwanapongwe wanetanu na Jako.

¹⁸ Leya agabanle, ohowonga eraga: <<Mwanola Mulugu gudivahile moditambilriha, voira mamunaga dihimuhiyeda namalabaga.>> Mwa enne ohonvaha mwanole nzina na Isakari [ku wonga yotambilra].

¹⁹ Noira enne, Leya ohokagana vambani akoka, liye mbala mwanapongwe wanetanu na mmohi na Jako.

²⁰ Agabanle ohowonga eraga: <<Mulugu uhudivaha yengo yapama. Eni mamunaga unerege diriheda mwasiwa dihimbalela anapongwe atanu na mmohi.>> Nomala enne, ohonvaha nzina na Zebuloni [ku wonga rihediwa].

²¹ Magomelo uwa Leya ohombala mwana wa muhiyana, liye nvaha nzina na Dina.

²² Evale Mulugu ohomuumbuwela Rakeli eto ohovwa yolobela yaye. Mwa enne ohosakanya ira abale.

²³ Evale Rakeli ohokana vambani, liye mbala mwanapongwe. Agabanle ohoiraga: <<Mulugu uhukumihamo manyazo aga!>>

²⁴ Ohowonga eto ira: <<Nnafuna nnga Yehova adiwendjede mwana mmohiwa wa mwanapongwe!>> Mwa enne ohonvaha mwanole nzina na Joze [ku wonga wendjeda].

Labawu ohosakanya nipangano nixa na Jako

²⁵ Rakeli agambanle Joze, Jako ohomuwandela moyaye Labawu, liye ira: <<Nnafuna diwelele wanihu.

²⁶ Mudivahe ahiyanaga ambinlene anno daalabenle miyo vamohi na ahimaga daadowegena. Tchoira nyo muhumala iziwa makalelo apama dulabenleni miyo.>>

²⁷ Evale Labawu ohomuwakula eraga: <<Akala munodifwewela murima, dera mukalege wewuno vamohi na miyo. Tchoira makanga kohodiwandela ira Yehova uhudireliha na mwasa wa nyo kala vamohi na miyo.

²⁸ Mudiwandele yotambilra inafuna nyo, miyo nnerege utambilrihani yenno.>>

²⁹ Jako ohowakulaga, liye ira: <<Nyo muhumala iziwa makalelo apama dulabenleni miyo na makalelo diwendihile miyo anavinyama enyu.

³⁰ Miyo dahanaze, anavinyama mwanna nyo tchali anene. Mbwenye peno makalelo karelanne atu kahi a masika. Eto Yehova uhurelihani na mwasa wa mabasaga nnalaba miyo. Mbwenye peno miyo nnafuna didowe darome laba ja vande vaga.>>

³¹ Evale Labawu ohonfuka, liye ira: <<Munafuna ira dutambilriheni avi?>> Jako ohomurumela, liye ira: <<Kamuditambilrihe yengo. So mbwenye miyo nnerege adjihave anavinyama enyu, malringana mwarumela yengo nnafuna miyo wonga veva.

³² Miyo peno nnafuna didowe kolrani wenyu ule, dasakulrelre mabila a maganga na a donga donga na ana mabila odiba vamohi na mbuzi da donga donga na da maganga. Anavinyama anno banafuna kala yotambilra yaga.

³³ Era eno nyo vasogolro mwaza mufuna ira muone yotambilra yaga, munofwanya dagamanle asakulrelra anavinyama atene, pa evo vanafuna nyo kana ibaribari ira miyo kannaudjelrani. Mbwenye muwari mwa anavinyama nnafuna miyo atukula, mwaza mufwanyamo mbuzi dohokana maganga na da donga donga nari ana mabila ohokala odiba, munoiziwa ira jejo dire ubelani.>>

³⁴ Evale Labawu ohowakula eraga: <<Tabo, jihikala pama. Jikale nnga mwemo munawongela nyo.>>

³⁵ Mbwenye siku nimohive nenne mulombwana Jako ahanadowe ira arome asakulrelra anavinyama ale, Labawu ohosakulrelragamo mbuzi da alombwana dokana malremba na da donga donga na mbuzi datene da ahiyana da maganga na da donga donga, nari mwanainyama uli watene okana maganga otchena nari mabila mang'onong'ono odiba. Labawu ohatukula anavinyama atene anne aasakunlremo liye ale, avaheda ahimaye.

³⁶ Evale oharumaga ahimaye ale eraga: <<Anavinyama anna, mudowe mwaadjihege olapela wene na wewo unadjiha mulombwana Jako eto lapela uwa ukale ofiyeda malambo mararu muwendaga.>> Jako ohalaga akumbuzaga anavinyama atene ohala a Labawu.

Makalelo asakanyile Jako ira awande akana anavinyama adjindji

³⁷ Evale Jako ohotukula tambi dititi da mitengo miraru dohiyana, liye tuwa marisku tembe na unde nne, jotchena ja muwari ja imirile fiyedaga oneya unde.

³⁸ Jimiri jile liye ohotimbela sogolro wa nimburo neno nang'wetcha atu. Liye airelena eno mwasiwa anavinyama ale kagumanetcha nimburo nenne tempu yong'wa.

³⁹ Muwari mogumana mule, kagumana kaing'anaga jimiri jile. Mwa enne ahima kaabala atu kakala a malremba na a maganga na a donga donga.

⁴⁰ Evale Jako ohakumihamo anahima anno kabaliwa ale. Eto anavinyama a ahiyana a Labawu aye, Jako oaing'aniha anavinyama a malremba nari odiba. Jako eto ohadowiha anavinyama aye vewa vene ira kahagumane na anavinyama a Labawu aye.

⁴¹ Evale anavinyama a alombwana ale kagumanaga na anavinyama a ahiyana apama a kopolo, Jako otukula jimiri jile, liye reya sogolro wa anavinyama ale, mmamburoni mwemo mwang'wela atu. Evale kagumana kaing'anaga jimiri jile.

⁴² Mbwenye anavinyama ovuta, liye jimiri jile kaareyela. Na mwasa wenne, anavinyama apama karela, ahimiwa atene kakala aye. Eto anavinyama ovuta ale karela, kakala a Labawu.

⁴³ Mwa enne Jako ohosimbwa rayela, liye fiyeda akana anavinyama adjindji, vamohi na anamalaba a alombwana na ahiyana vamohi na akamelo na aburu.