Jenesesi 3 - Mazu Otchena a Mulungu

Tega wa Adawu na Eva

¹ Muwari mwa anavinyama atene a mukokolani anno Yehova aasakanyile liye, nyowa yali mwanainyama yoxangetchetcha akwaranya atene. Siku nimohi nyowele yohonfuka muhiyana ira: <<Kodi na ibaribari Mulugu uwongile ira: <Jovaha ja mitengo datene nnafwanyeya mmundani mu kamudje?> >>

² Muhiyanole ohowakula nyowele ira: <<Nari. Jovaha ja mitengo datene nnafwanyeya mmundani mu hiyo podi djaga.

³ So mbwenye jovaha ja mutengo mmohi unafwanyeya vari va munda, Mulugu uwongile ira: <Jovaha ja mutengo wenno kamudje, nne kamuhinde. Tchoira mwairana eno munokwa.> >>

⁴ Mbwenye nyowele yohomuwakula muhiyanole ira: <<Nari! Nyo mwadja, kamunakwa.

⁵ Tchoira Mulugu uhuiziwa ira siku nnadje nyo, meswinyu anohuleya. Era eno munokala nnga Mulugu, murome iziwa upama na ubure.>>

⁶ Muhiyanole agavwile mazu anne, agaonne ira jovaha ja mutengole jali jofwanela djiwa, joriyela meso eto jali jofuneya movaha zelru, ohatcha, liye dja, nvaha mamunaye, na liyene liye dja.

⁷ Kagadjile, ambinlene meso ewa kohuleya. Evale kohoroma ona ira: <<Nili mandave.>> Mwa enne kohotukula matakuru a mufigera, aliwa sakanyana jowara jiwa, mangelela mmwinini.

⁸ Siku nenne tempu ya tchiguwo, nzuwa nikupaga, kohovwaga nizu na Yehova Mulugu aviraga mmundani mule. Mwa enne ambinlene mulombwana na muhiyanaye kohotawa, dowa vitala muwari mwa mitengo dafwanyeya mmundani mule ira kahakale vamentoni va Yehova Mulugu.

⁹ Evale Yehova Mulugu ohomuitana Adawu eraga: <<Adawu, kodi uli waani?>>

¹⁰ Liye ohowakulaga eraga: <<Divwile nizu ninyu muviraga mmundani. Na mwasa oova, miyo tawa, za vitala. Tchoira dili mandave.>>

¹¹ Mulugu ohonfuka ira: <<Uuwandenle bani ira: <Uli mandave.>? Kodi wire dja yovaha ya mutengo wenne daukondihile miyo ira: <Kudje.>?>>

¹² Adawu ohowakula eraga: <<Muhiyana wenne mudivahile nyo ira akalege na miyo, gwenno udivahile yovaha ya mutengole, miyo dja.>>

¹³ Evale Yehova Mulugu ohonfuka muhiyanole ira: <<Wirele nni jejo?>> Muhiyanole ohorumela eraga: <<Tchi nyowa idinyengile miyo ira didje. Miyo dja.>>

Tembelrelriwa wa nyowa

¹⁴ Evale Yehova Mulugu ohowonga na nyowa ira: <<We nyowa na mwasa wa jejo jiirile we, muwari mwa vinyama datene dofuwiwa, vamohi na da mukokolani usimbwile tembelrelriwa gu weyo. Wenda wawo, unawendege na vambani eto unerege bwilra tumbulru kalawo wawo watene.

¹⁵ Miyo nnouidaniha weyo na muhiyana eto nnoaidaniha ahimawo na ahimaye. Mwana unafuna liye za mbala gwenno unafuna za uporotcha murwawo, we eto unoporotcha izondwaye.>>

Tembelrelriwa wa Adawu na Eva

¹⁶ Mulugu ohowonga na muhiyana eraga: <<Wakana vambani, miyo nnerege uwendjededa goyi dawo. Eto wafunaga bala unerege ona upa wohokala wa masika. Zela bandja nawo, weyo unerege nfuna mamunawo ira ukalege na liye eto liye gunausogolrelrege.>>

¹⁷ Mulugu eto ohowonga na mulombwana Adawu ira: <<Na mwasa oira uhuvwelela jowonga ja muhiyanawo, we dja yovaha ya mutengo daukondihile miyo ira: <Kudje>, eni teya itembelrelreya na mwasa wawo. Kalawo wawo watene weyo unerege lima mmindani mwa goyi ira ukayegena jodja.

¹⁸ Walimamo ira ukayena jalo jinadja nyo, munerege mela minga na makaruwe.

¹⁹ Ira ukayena udja, unerege kumela kalruma, fiyeda uwelele teyani wakoka wene. Mwasiwa teyani ku wewo ukumile we. Tchoira weyo uli teya, nona unowelela kala teya akoka.>>

²⁰ Vevale Adawu ohonvaha muhiyanaye nzina na Eva, [ku wonga ingumi] na mwasa okala mma wa atu atene a ingumi.

²¹ Evale Yehova Mulugu ohomusakanyela Adawu na muhiyanaye bata da matembe a anavinyama, liye awariha.

Adawu na Eva kohotamangihiwa muwari mwa munda afwanyeya muEdeni

²² Noira eno, Yehova Mulugu ohoira: <<Kaing'anani, eni mutu uhusanduwa, uli nnga hiyo vano. Tchoira uiziwa upama na ubure. Nahamutamangihe, unodowa ahatche jovaha ja Mutengo Ovaha Ingumi, adje ira akalewo kala no kala!>>

²³ Na mwasa wenne, Yehova Mulugu ohomutamangiha mutule mmundani wenno afwanyeya muEdeni, liye muhela unde ira alimege teya yakokene yenno yasakanyiwena liye.

²⁴ Agamutamangihile mutule amuhela unde wa Munda, ohahela makumelo wa nzuwa wa mundole angelro aneriwa akerubi eto ohelawo supada nokana munlo neno narungunuwa pandi datene na makalelo owopiha. Yehova airelena eno ira jiing'anelege ndila yodowa wewule wafwanyeya Mutengo Ovaha Ingumi.