Jenesesi 28 - Mazu Otchena a Mulungu

Izaki ohomureliha Jako fendo yanembinli

¹ Evale Izaki ohomuitanihaga Jako, liye mureliha. Eto Izaki ohomuwandelaga eraga: <<Kumutele muhiyana wa ilambwela ya Kana.

² Udowe Padani-Arani, vande va mbwiyawo Betuweli, mmawo babaye. Udowe wamutele muhiyana mmohi mwa ahima a mmawo murongoliye, wenno unaitaniwa Labawu.

³ Mulugu wa Kopolo Datene aurelihe, auvahe ahima oindjiva, auindjivihe ira mwa weyo mukume malogo madjindji.

⁴ Eto mareliho alumbenle liye nvaha Abarahamu kakale mwa weyo vamohi na ahimawo ira ilambo yenna inafwanyeya we wagali mutu oza, ikale yawo nnga Mulugu anvahile liye Abarahamu.>>

⁵ Ala ali makalelo Izaki amugunyile liye mwanaye Jako. Evale Jako ohovenya ayaga ilambo ya Padani-Arani vande va mulombwana Labawu, mwana Betuweli nkuda Aramu, murongola wa Rebeka, Jako na Ezawu mmiwa.

Ezawu ohomutela mwana Jomayili

⁶ Ezawu ohoona ira babaye ohomureliha Jako eto ohomuruma ilambo ya Padani-Arani ira amusayele wewo muhiyana afuna liye mutela. Eto ohoona ira babaye Izaki amurelihaga Jako, ohomuwandela ira ahamutele nkuda Kana.

⁷ Ezawu eto ohoiziwa ira: <<Jako uhuvwelela yowonga ya baba na mma, uhudowa ilambo ya Padani-Arani.>>

⁸ Mwa enne Ezawu agaiziwile ira ahiyana a ilambo ya Kana ile babaye Izaki kaafuna,

⁹ ohovenyaga, liye dowa wa Jomayili, mwana Abarahamu, liye mutela mwana Jomayili, wenno aitaniwa Malati, murongola wa Nebayoti. Mwa enne ohonvalanya na ahiyanaye amohiwa anna liye ale.

Mulugu ohomutwanyuwela Jako agali Beteli

¹⁰ Jako agavennye Beriseba vande va ababaye vale, adowaga Arani,

¹¹ agaonne ira nzuwa nihivira, ohosakaga nimburo ira agonevo. Liye tukula nibwe nafwannyege liye evale, liye samelihavo murwaye, liye gonaga.

¹² Mwa enne ohorohaga. Muwari moroha aonnege sikada nagaimetchiwe, kuma ilambo ya vati ante fiya ilambo ya zulu. Angelro a Mulugu kagwelaga, katitaga na sikada nne.

¹³ Eto Yehova afwanyeyaga vakwikwive na liye. Mwa enne ohomuwandelaga ira: <<Miyo dili Yehova, Mulugu wa babawo Abarahamu na Mulugu wa Izaki. Miyo nnouvaha weyo vamohi na ahimawo ilambo yenna igonatile we ila.

¹⁴ Ahimawo anoza kakale adjindji nnga tumbulru nnafwanyeya vati. Nyo munoza mmwadeyele makumelo wa nzuwa fiyeda mavirelo wa nzuwa, vamohi na pandi ya norti fiyeda pandi ya suli. Mwa weyo na ahimawo, anoza karelihiwe malogo matene a ilambo ya vati.

¹⁵ Na ibaribari miyo dili na weyo, nnerege uing'anela mwatene munayege we eto nnoza duwelihede ilambo yenna. Miyo kadiza duhiya, fiyeda dikwakwanelihede jatene juwandenle miyo.>>

¹⁶ Noira enne, Jako ohorurumuwa. Agarurumuwile ohoiraga: <<Na ibaribari Yehova uli nimburo neni, so mbwenye miyo kadaiziwile!>>

¹⁷ Evale ohoromaga ova, liye ira: <<Nimburo ni ti nimburo nowopiha. Eva pa vande va Mulugu eto gu mulango wa zulu.>>

¹⁸ Unde wagatchile na mabebehene, Jako ohotukulaga nibwe nasamenle liye agonaga nne, liye imetcha nnga nimbozo. Noira eno, ohokutulelaga makura vazulu va nibwe nne.

¹⁹ Mwa enne Jako ohovaha nimburo nenne nzina na Beteli [ku wonga vande va Mulugu] agali wanle sidadi yenne yaitaniwa Luji.

Jako oholumbela vamentoni va Mulugu

²⁰ Nomala eno, Jako ohosakanyaga yolumbela eraga: <<Nyo Mulugu mwakala na miyo, mudisogolrelra ulrendo waga, mudivaha jodja na jowara jejo jinafuna miyo,

²¹ eto diwelawo daganna ingumi, difiya vande va ababaga mwa murendele, na ibaribari nyo Yehova munokala Mulugu waga.

²² Nibwe neni nnaimeliha miyo nnga nimbozo ni, nnafuna nikale nnga Nyumba ya Mulugu ira dutamalelegeni eva eto divelelege veva yanekumi ya jatene jinadivahege nyo.>>