Jenesesi 26 - Mazu Otchena a Mulungu

Nabwiya ohomutwanyuwela Izaki ilambo ya Jerari

¹ Ilambo yafwanyeya Izaki yohozawo ndala, nnga jaireyile voroma, tempu ya Abarahamu. Evale mulombwana Izaki ohodowa Jerari, wewo wakala mulombwana Abimeleki, mwene wa aFilistewu.

² Evale Yehova ohomutwanyuwela Izaki, liye muwongana eraga: <<Weyo kudowe Ijipitu. Mbwenye ukale ilambo yenno inafuna miyo utonyiheda.

³ Inafwanela ukale ilambo yenna nnga mutu oza. Miyo nnakala na weyo eto nnoureliha. Tchoira miyo nnouvaha weyo na ahimawo ilambo yatene yenna, dikwakwanelihedaga lumbela walumbenle miyo na babawo Abarahamu.

⁴ Miyo nnoza duvahe ahima adjindji nnga nyenyedi da zulu eto nnoza daavahe vilambo datene dedi. Malogo matene a ilambo ya vati anoza karelihiwe mwa ahimawo unaabalege we.

⁵ Mwasiwa Abarahamu ohodivwelela jawongile miyo eto ali oharihamo jamuwadenle miyo, na mangano aga, na jofundjiha jaga jatene vamohi na malamulo aga.>>

Izaki ohomuira muhiyanaye nnga murongoliye

⁶ Mwa enne Izaki ohoroma kala ilambo ya Jerari.

⁷ Evale alombwana a wewule kanfuka zela muhiyanaye, liye awakula ira: <<Ula gu murongolaga.>> Awongela enne mwasiwa aova ira awonga ira: <<Gu muhiyanaga>>, anampe ira kamuhalena muhiyanole mwasiwa Rebeka ohosimbwa riya.

⁸ Mbwenye voira Izaki ohomala wewule tempu ilukulu, siku nimohi Abimeleki mwene wa aFilistewu agali mmba mwaye vajanelani, ohomuonaga mulombwana Izaki awalredaga na muhiyanaye Rebeka.

⁹ Mwa enne ohomuitanaga Izaki, liye ira: <<Na ibaribari Rebeka kahi murongoliyo, gu muhiyanawo! Kodi mwasiwa gwa nni uza uwongaga ira: <Gu murongolaga?> >> Izaki ohomuwakula, liye ira: <<Miyo daova ira anaze kadipe mofuna ira kamuhalena muhiyanaga.>>

¹⁰ Abimeleki ohowonga ira: <<Kodi uniirele nni jeji? Ahakanlege mutu mmohi mwa hiyo araruwa na muhiyanawo, weyo wafuna unitegihe.>>

¹¹ Mwa enne Abimeleki ohokumiha nlamulo para atu atene, liye ira: <<Mutu wenne unamuirele ibure mulombwanola Izaki nari muhiyanaye, unopiwa!>>

Mulugu ohomurayeliha Izaki ilambo ya Jerari

¹² Mulombwana Izaki oholima munda mwilamboni mwemule mwakala liye. Agalimile yaka imohive yenne, ohanda jodja jidjindji johokala ja masika mwasiwa Yehova ohomureliha.

¹³ Izaki rayela waye wodowave musogolro, ante liye fiyeda kana jorayela jidjindji.

¹⁴ Ohokana mabila na ng'ombe didjindji vamohi na anamalaba adjindji. Evale aFilistewu kohoroma musilrilra.

¹⁵ Muwari momusilrilra mule, aFilistewu ale kohovuhelela visime daye dedo datimbile anamalaba a babaye Abarahamu tempu yali liye ahanakwe.

¹⁶ Eto Abimeleki ohowonga na Izaki eraga: <<Ukwaranyemo mwilamboni muno mwasiwa uhutabwa kala wa kopolo nikwaranya hiyo.>>

¹⁷ Evale Izaki ohosusa, liye dowa manga misasa daye ndabo na Jerari, liye kalaga wewo.

¹⁸ Agafiyile wewule, Izaki ohovuhula visime dedo datimbile anamalaba a babaye Abarahamu ahanakwe, nomala Abarahamu agakwile aFilistewu kavuhelela. Izaki agavuhunle, ohoroma itana visime dile na mazina anno avahile babaye Abarahamu.

¹⁹ Siku nimohi anamalaba a Izaki kohodowaga, aliwa roma timba isime ndabo nenne na Jerari, evale kohofwanyaga mahindje apama owenda.

²⁰ Mbwenye anamakumbuza mabila a ilambo ya Jerari ule kohoroma kangana na anamakumbuza mabila a Izaki keraga: <<Mahindjala behu.>> Na mwasa okangana, Izaki ohovaha isimele nzina na Ezeki [ku wonga kangana].

²¹ Noira eno, anamalaba a Izaki kohotimba isime imohiwa. Kagatimbile, anamakumbuza mabila a ilambo ya Jerari kohokanganelave akoka na anamakumbuza mabila a Izaki. Na mwasa wenne, Izaki ohovaha isime yenne nzina na Sitina [ku wonga idana].

²² Noira enne, Izaki ohotamavo, liye dowa timba isime imohiwa. Mbwenye isime yenne tchatatamunle kangana. Evale Izaki ohovaha isimele nzina na Rehoboti [ku wonga Nimburo Novuma], awongaga ira: <<Yehova uhunivaha nimburo novuma eto nnoza niindjivemo mwilamboni.>>

Yehova ohomutwanyuwela akoka Izaki agali Beriseba

²³ Izaki ohokuma vafwanyeya liye vale, liye dowa Beriseba.

²⁴ Agafiyile wewule, mahiyu a siku nimohive nenne, Yehova ohomutwanyuwela eraga: <<Miyo dili Mulugu wa babawo Abarahamu. Kuove! Miyo dili na weyo. Na mwasa wa namalabaga Abarahamu, miyo nnoureliha eto nnouvaha ahima adjindji.>>

²⁵ Mwa enne mulombwana Izaki ohomangavo ibuwa ya mukuto nimburo nenne, liye lobelaga na nzina na Yehova vevale. Ohomangavo musasaye, anamalabaye aliwa roma timba isime.

Mwene Abimeleki ohosakanya yopangana yowandana na Izaki

²⁶ Siku nimohi mwene Abimeleki ohovenyaga ilambo ya Jerari na namawelruza waye Awuzati, vamohi na Fikoli musogolrelri waye wa anyakondo ira kadowe kagumane na Izaki.

²⁷ Evale aliwa kagafiyile wa Izaki, Izaki ohafukaga, liye ira: <<Kodi mwazela nni, agali munodiida eto muhuditamangiha ilambo yenyu?>>

²⁸ Aliwa kohomuwakulaga keraga: <<Tchoira nihiona ira na ibaribari Yehova uli na weyo. Mwa eno, nihifiyeda umbuwela ira: <Tchapama nidowe nagumane na liye ira niwandane.> Nnafuna ira nisakanye yopangana yowandana na weyo.

²⁹ Hiyo kanauirele yotakala eto nohofiyeda ugunya mwa murendele. Nona nnafuna ira weyo wahaniirele yotakala eto ukayena makalelo apama nnga nauirele hiyo. Tchoira weyo peno uli mutu orelihiwa na Yehova.>>

³⁰ Evale Izaki ohasakanyela pwando, aliwa dja vamohi no ng'wa.

³¹ Mwa enne kohogonaga. Mmetcheloni muwa na mabebehene, koholumbelihana ira kawandane mmohi na nfwaye. Noira eno, Izaki ohagunya, aliwa dowaga mwa murendele.

³² Siku nimohive nenne anamalaba a Izaki anno katimba isime kohomuwongagana Izaki, aliwa ira: <<Isime yatimba hiyo nihifwanya mahindje.>>

³³ Evale Izaki ohovaha isimele nzina na Seba [ku wonga lumbela]. Nona kuma siku nenne fiyeda peno sidadile inaitaniwa Beriseba.

Ahiyana a Ezawu

³⁴ Ezawu aganna yaka 40, ohatela ahiyana ambinli. Mmohi ali Juditi, mwana Juditi Beri. Mmohiwa ali Basemate Eloni. Ahiyana ambinlene anne ababiwa kali aEti.

³⁵ Izaki na muhiyanaye Rebeka kotakaleliwa joira ja Ezawu ahiyanaye ale.