Jenesesi 25 - Mazu Otchena a Mulungu

Ahima amohiwa a Abarahamu

¹ Abarahamu ohomutela muhiyana mmohiwa aitaniwa Ketura.

² Agamutenle muhiyana wenne, ahima kaabanle atu maziniwa ba ala: Zimirani, Jokisani, Medani, Midiyani, Isibaki na Suwa.

³ Jokisani ohombala Seba na Dedani. Dedani ali nikolo na akuda Asurimi, akuda Letusi, na akuda Lewumimu.

⁴ Midiyani anapongwe aabanle liye ba ala: Efa, Eferi, Inoki, Abida na Elida. Atene anna kali atu okumela mwa Ketura, mwadi Abarahamu.

⁵ Abarahamu jorayela jaye jatene amutikenle mwanaye Izaki.

⁶ Mbwenye ahima a ahiyanaye ang'ono, Abarahamu ohagawela jokana jimohi jiwa ahanakwe, liye amwalaniha na mwanaye Izaki, liye aruma pandi ya makumelo wa nzuwa.

Kwa wa Abarahamu

⁷ Mulombwana Abarahamu kalawo waye watene amanle yaka 175.

⁸ Aganna yaka dedi, ku vuma wogomiheda, ku kwa wene. Abarahamu ohokwa agaulunle, aganna idadi yapama, liye dowa gumana na makolo aye.

⁹ Noira enne, ahimaye Izaki na Jomayili, kohomukoya nifukweni na Makepela mmundani mwa Eforoni, wenno ali muEti, mwana Zowari, munda wenno afwanyeya makumelo wa nzuwa wa Mamere.

¹⁰ Mundiwa ali wenne Abarahamu agunle liye na akuda Eti. Abarahamu akoyiwile wewo wakoyiwe muhiyanaye Sara.

¹¹ Abarahamu agakwile, Mulugu ohomureliha mwanaye Izaki. Ora yenno Izaki akala wandamelana isime ya Beri-Layi-Royi.

Ahima a Jomayili

¹² Ula gu muselu wa ahima a Jomayili, mwana wenno Abarahamu ambanle liye na muIjipitu Agari, muzari wa Sara.

¹³ Ala ba mazina a anapongwe aabanle Jomayili roma murandji baliwa fiyeda ogomiheda baliwa. Oroma gu Nebayoti, owelela gu Kedari, Abideli, Mibisawu,

¹⁴ Mijima, Dumani, Masa,

¹⁵ Hadade, Tema, Jeturi, Nafisi na Kedema.

¹⁶ Anna bali anapongwe a Jomayili. Nzina na kada mwana ti nzina na nlogo eto ti nzina na tatamo mwakala atu na misasa diwa. Ku wonga asogolrelri kumi na ambinli otonga malogo kumi na ambinli.

¹⁷ Jomayili kalawo waye watene amanle yaka 137. Mwa eno, ohokwa, liye dowa gumana na makolo aye anno kakwile.

¹⁸ Ahima atene a Jomayili kafwanyeya roma Havila fiyeda Suri sogolro wa Ijipitu, kalaga nnga unadowa ilambo ya Asiriya. Mbwenye akuda Jomayili tchanna vwanana na atu amohiwa a muibalini mwa Abarahamu.

Baliwa wa Ezawu na Jako

¹⁹ Ula gu muselu wa ahima a Izaki, mwana Abarahamu. Abarahamu ambanle Izaki.

²⁰ Izaki aganna yaka 40 tchi tempu yamutela liye Rebeka mwana Betuweli wenno ali nkuda Aramu akala Padani-Arani, murongola wa Labawu, wenno eto ali nkuda Aramu.

²¹ Mbwenye agamutenle, Rebeka kabala. Mwa enne Izaki ule okaleletcha nvepa Yehova na mwasa wa muhiyanaye Rebeka. Evale Yehova ohovwa yovepa ya Izaki, muhiyanaye liye kana vambani.

²² Aganna vambani, fwanyeya ira mbani mwaye mule mwali anasambini. Evale mbani mwaye mohoroma zunguzeya, mwasiwa ahimale kowanawana mmohi na nfwaye. Mwa enne Rebeka ohoira: <<Kodi mwasiwa gwa nni ja mbani jinadiireyela ji?>> Evale ohodowa nfuka Yehova.

²³ Agafukile, Yehova ohomuwandela ira: <<Weyo mbani mwawo muli ahima ambinli anafuna kala malogo ogaweya eto muli vilambo mbinli. Nlogo na mwana mmohi nnokala na kopolo kwaranya nlogo na nfwaye. Eto muwari mwa aliwa, murandji baliwa unakala wenno unafuna mulabaga mbalaye wa ng'onong'ono.>>

²⁴ Mwa enne malambo obala kagafiyile, Rebeka ohabala anasambini.

²⁵ Mwana murandji ali ofila eto okana mawoya maningo aye matene. Na mwasa wenne, ohovahiwa nzina na Ezawu.

²⁶ Mbalaye oharela abaliwe agahidedile izondo ya Ezawu. Na mwasa wenno ohovahiwa nzina na Jako. Izaki anna yaka 60 muhiyanaye aabalaga ahimale.

²⁷ Ahimale kohoulukula. Kagaulukunle, Ezawu ali maliba saya, awendetcha mukokolani. Jako ali mutu opwaseya, liye ahaletchana mabasa a vande.

²⁸ Izaki asimbwetcha muziveliwa mwanaye Ezawu mwasiwa liye aziveliwetcha dja nyama dazetchana liye masayelo. Mbwenye Rebeka asimbwetcha muziveliwa Jako. Ora yenno muwari mwa ahima okana babiwa mmohive, murandji baliwa ovahiwa fendo mbinli mwa jengo jafuna hala ababiwa kagakwile. (Detoronomiyo 21:17) Ku wonga Ezawu muwari mokala murandji baliwa, ababiwa kagakwile, ora yogawa jorayela nnga ng'ombe, Ezawu ogovahiwa mbinli, Jako avahiwa imohi, dowagave sogolro ante fwaramento datene dimale.

Makalelo a murandji baliwa Ezawu ohomuguliheda mbalaye undimuwa

²⁹ Siku nimohi Jako apiyaga matambaye, mbalaye Ezawu ohodemulaga, akumaga masayelo, aganna ndala.

³⁰ Evale Ezawu ohowonga na mbalaye Jako, liye ira: <<Nnouvepa ira udivahe matamba ofila unapiya we ayo didje, mwasiwa dihisimbwa kana ndala.>> (Nona Ezawu aitaniwaga Edomu.)

³¹ Jako ohomuwakulaga eraga: <<Ira miyo duvahe yodja, nnafuna udivahe undimuwa unna we zela kala murandji baliwa.>>

³² Evale Ezawu ohoiraga: <<Miyo dihanle vang'ono ira dikwe na ndala! Kodi dakwa undimuwa waga unafuna udikamihede nni? Miyo nnouvaha.>>

³³ Evale Jako ohowongagave eraga: <<Akala uhurumela, nnafuna ubabihe lumbela.>> Evale Ezawu oholumbelaga, liye muguliheda undimuwa waye mung'onong'ono waye Jako.

³⁴ Noira eno, Jako ohonvaha pawu na matamba a bwanda apiya liye. Evale Ezawu ohodjaga, liye ng'wela mahindje. Agairile enne ohovenya, liye dowaga. Moira enne Ezawu oholuluviha undimuwa waye ozela kala murandji baliwa.