Jenesesi 23 - Mazu Otchena a Mulungu

Kwa wa mwadi Abarahamu

¹ Sara amanle yaka 127.

² Mwa enne ohokwa sidadi ya Kiriyati-Araba, yenno inaitaniwa Eboroni, mwilamboni mwa Kana. Agakwile, mamunaye Abarahamu ohodowa mmba amukumbanyaga eto amunlelaga muhiyanaye ule.

³ Noira eno, Abarahamu ohiyaga maningo a muhiyanaye mmba emule, liye dowa wonga na akuda Eti eraga:

⁴ <<Miyo nnakala muwari mwa nyo mbwenye dili mutu oza ilambo yenna eto dili mwanowenda. Nnauvepani ira mudigulihede teya ira diwande mukoyavo muhiyanaga.>>

⁵ Evale aEti ale kohomuwakulaga Abarahamu keraga:

⁶ <<Mbwiyeni munivuruwane inafuna hiyo wonga. Hiyo nnouonani ira nyo muli musogolrelri osakulriwa na Mulugu vari vehu. Hiyo nnourumelihani ira mudowe mwasakulre masiye orihediwa pama anafwanyeya muwari mwa hiyo, mudowe mwamukoye muhiyaninyu masiye anno. Eto muwari mwa hiyo kalivo unafuna ukondihani masiye aye ira mwahamukoye muhiyaninyu.>>

⁷ Evale mulombwana Abarahamu ohovenyaga, liye akokorela aEti anno kali annya a ilambwele.

^8-9 Liye awandela eraga: <<Akala na ibaribari nyo muhudifunana ira dimukoye muhiyanaga ilambo yenna, nnouvepani ira munvepe Eforoni mwana Zowari ira adigulihede nifukwe naye nnafwanyeya ilambo ya Makepela, mmagomelo mwa mundaye. Miyo nnompagalri liye kobiri yatene vamentoni venyu. Era eno anokala masiye aga ira miyo daakoyegemo abalaga.>>

¹⁰ Mwa ora yenno Eforoni amuwonga Abarahamu aligi vevale vamohi na aEti afwaye vevo vagaratilege atu, va mulango ovolowela wa sidadile. Evale liye ohomuwakulaga Abarahamu vamentoni va aEti atene kafwanyeya evale kavwaga, liye wonga eraga:

¹¹ <<Nari mbwiyeni ira dugulihedeni, kinakala. Kadivuruwaneni, nnouvahani mundole vamohi na nifukwe nnafwanyeya wewule vasayi bahi. Miyo nnouvahani vamentoni va atwaga atene kagali veva. Dowani mwamukoyemo mutwinyu wenno ukwile.>>

¹² Evale Abarahamu agavwile mazu a Eforoni, ohakokorelaga aEti atene, anno kafwanyeya kagali annya a ilambwele,

¹³ liye muwongana mulombwana Eforoni atu atene kavwaga, ira: <<Pepani kadivuruwane! Nnouvepa ira udirumelihe gula mundole. Uwonge peresu ira miyo digule, damukoyemo mutwaga ukwile.>>

¹⁴ Mbwenye Eforoni ohowonga na Abarahamu ira:

¹⁵ <<Kadivuruwaneni mbwiyeni. Mundole gwa kobiri da parata 400. Kodi va hiyo atu ambinli nagulihedana kobiri edo niirilevo nni? So inafwanela mudowe mwankoye muhiyaninyu wewule.>>

¹⁶ Evale mulombwana Abarahamu ohorumela gula mundole, liye pima kobiri yenno yawongile mulombwana Eforoni vamentoni va aEti atene, kobiri da parata 400, molingana na mpimo kalabana aliba malronda a tempu yenne.

Abarahamu ohomukoya muhiyanaye Sara

^17-18 Noira enne, Abarahamu ohovahediwa munda wenno ali wa mulombwana Eforoni afwanyeya ilambo ya Makepela makumelo wa nzuwa wa Mamere vamohi na nifukwe na mitengo datene dali mmindani mule na nimburo natene nene, liye tikeliwa vamentoni va aEti atene kafwanyeyaga evale kaing'anaga, nimburo neno nagumanne atu va mulango ovolowela wa sidadile.

¹⁹ Jagaireyile enne, mulombwana Abarahamu ohodowa mukoya muhiyanaye Sara nifukweni nafwanyeya mmundani mule, wandamelana Makepela, makumelo wa nzuwa wa Mamere, pandi ya Eboroni, mwilamboni mwa Kana.

²⁰ AEti atene kohomutikela mulombwana Abarahamu mundole vamohi na nifukwe nafwanyeya wandamelana mundole ira Abarahamu aakoyegemo atwaye.