Jenesesi 21 - Mazu Otchena a Mulungu

Baliwa wa Izaki

¹ Yehova ohoza mukamiheda Sara nnga mwawongele liye eto Yehova ohokwakwaneliheda nipangano naye na Sara molingana na mwemo mwapanganne liye.

² Abarahamu agamanle ulula, Sara ohokana vambani, mbala mwanapongwe, mokwakwanela na ora yenno nnga yawongile Mulugu.

³ Abarahamu ohonvaha mwanaye wenno ambanle liye na Sara nzina na Izaki.

⁴ Izaki agakwakwanihile malambo matanu na mararu, Abarahamu ohomuinela nnga mwemo mwamurumele Mulugu.

⁵ Tempu yenno yabaliwa Izaki, Abarahamu anna yaka 100.

⁶ Evale Sara ohowonga eraga: <<Mulugu uhuditeyiha eto atu atene kavwa jatene jiireyile, anoteya vamohi na miyo.>>

⁷ Sara eto ohowonga ira: <<Kalivo mutu afuna muwandela mamunaga Abarahamu ira: <Muhiyanawo Sara unoza akayena mwana mutete owamwa.> Mbwenye masiki mamunaga uulunleve, dihimbalela mwana.>>

Abarahamu ohomulanya muzaraye Agari vamohi na mwanaye Jomayili

⁸ Izaki ohoulukula fiyeda hiya wamwa. Siku nenne Izaki ahiyile liye wamwa, Abarahamu ohomusakanyelaga pwando ilukulu.

⁹ Mbwenye Sara ohomuona Jomayili mwana wenno Abarahamu ambanle liye na muIjipitu Agari amuteyaga Izaki.

¹⁰ Na mwasa wenne, Sara ohomuwandelaga mamunaye Abarahamu eraga: <<Kamutamangiheni muzari ula vamohi na mwanayene. Mwasiwa hiyo nakwa kavali wandeya ira mwana wa muzari avahiwe pandi ya jorayela jihu vamohi na mwanaga Izaki!>>

¹¹ Abarahamu agavwile mazu a muhiyanaye, kaziveliwe nne vang'ono, mwasiwa na Jomayili wenne afuna liye mutamangiha ali eto mwanaye.

¹² Mbwenye Mulugu ohomuwandelaga Abarahamu eraga: <<Weyo kukumbanye zela mwanawo Jomayili vamohi na muzari wawo Agari. Urumele jejo jiwongile muhiyanawo Sara, mwasiwa mwa Izaki pu mwemo munafuna za kumela ahimawo a musogolro.

¹³ Eto zela mwana wenno umbanle we na muzarawo, kukumbanye mwasiwa miyo nnosakanya ira akale nlogo nindimuwa mwasiwa na liyene gu mwanawo.>>

¹⁴ Noira enne, mmetcheloni muwa na mabebehene, mulombwana Abarahamu ohovenya, liye tukula pawu na kantilu osakanyiwa na tembe mwagali mahindje, liye nkapatchiha Agari. Eto ohonvaheda mwanaye ule, liye muruma ira adowege. Evale Agari agatamangihiwe, ohovenya apupuruwaga, awendaga muwari mwa kokola ya Beriseba.

¹⁵ Kawendagave, mahindje mukantiluni mule kohofiyeda mwezo omala, aliwa kana ntona nohokala na masika. Evale Agari ohomuhiya mwanaye ule mutchindo mwa mwana nikupu eni.

¹⁶ Liye susavo dowa sogolro, liye kala volapela vene na nimburo namuhiyile liye mwanaye ule, aumbuwelaga ira: <<Miyo kannafuna muing'anaga mwanaga akwaga.>> Evale ohogaratigi sogolro wa mwanole, liye tomola kuto roma nla.

¹⁷ Na mwanaye wenne ohonlaga. Evale Mulugu ohovwa nla wanla mwanole. Mwa enne zulu mungelro wa Mulugu ohomuitanaga Agari eraga: <<Agari! Kodi unakukumuwela nni? Kuove mwasiwa Mulugu uhumala vwa nla wa mwanawo vevo vinafwanyeya liye.

¹⁸ Kavenya wamutukule mwanawo ule umuhele mmandani mwawo, tchoira miyo nnoza dimukalihe babi wa nlogo nindimuwa.>>

¹⁹ Noira eno, Mulugu ohomugudubulra Agari meso, liye ona isime ya mahindje. Evale ohotukulaga kantilu anna liye, dowa zaliha mahindje, liye mung'wiha mwanaye ule.

^20-21 Evale kohomaruwaga, aliwa dowa kalaga kokola ya Parani. Mulugu ohomusogolrelra mwanole fiyeda liye ulukula. Mwanole ali mutu owanda voka mafumo. Mmaye eto ohodowa muteliha na muhiyana mmohi wa ilambo ya Ijipitu.

Abarahamu ohosakanya nipangano na Abimeleki

²² Mwa tempu yenne mulombwana Abimeleki na musogolrelri mundimuwa wa anyakondo aye aitaniwa Fikoli, kohodowaga wa mulombwana Abarahamu. Kagafiyile wa Abarahamu, Abimeleki ohowongaga eraga: <<Miyo nnaona ira Mulugu uli na weyo mwa jatene jinaira we.

²³ Nnauvepa ira na makalelo mamohive nnga upama nnauirela miyo, na wenne udiirele upama miyo vamohi na atu a ilambo yenna unakala we wagali mutu oza. Mwa eno, miyo nnouvepa ira peno veva ulumbele vamentoni va Mulugu ira kuza udinyenga miyo nari ahimaga dinna miyo nari azulaga.>>

²⁴ Evale Abarahamu ohorumelaga eraga: <<Miyo nnolumbela ira nnoirana.>>

²⁵ Evale Abarahamu ohomuwandela Abimeleki ira: <<So mbwenye yengo yahadizivenle tchoira anamalabawo bazile diwaka isime ya mahindje.>>

²⁶ Evale Abimeleki ohomuwakulaga Abarahamu eraga: <<Miyo kadimuiziwile wenno wirile jejo eto nne weyo kuzile diwandela. Miyo peno eni nnaroma wene vwa zela jejo.>>

²⁷ Noira enne, Abarahamu ohotukulaga mabila na ng'ombe, liye nvaha Abimeleki. Evale ambinlene kohosakanya yopangana ira kawandane.

²⁸ Evale mulombwana Abarahamu ohosakulraga mabila matanu na menli a ahiyana mwa jifuwo jaye jile, liye hiya ikukuru yewene.

²⁹ Mulombwana Abimeleki agaonne enne, ohonfuka Abarahamu eraga: <<Kodi mwasiwa gwa nni tukulaga mabila matanu na menli ala we hiyaga pandi yewene?>>

³⁰ Abarahamu ohomuwakulaga eraga: <<Mabila matanu na menli dihenle miyo pandi yewene ala, nnafuna duvahe para ikale umboni ira isimela tchaga eto utimbile gu miyo.>>

³¹ Kuma siku nenne, isimele kohoroma itana na nzina na Beriseba [ku wonga lumbela] mwasiwa ali nimburo nalumbenle Abarahamu na Abimeleki.

³² Kagamanle sakanya yopangana yowandana Beriseba ule, Abimeleki vamohi na Fikoli musogolrelri mundimuwa wa anyakondo aye, kohovenyihana aliwa welela waniwa.

³³ Abarahamu ohozalaga mutengo mmohi eni uneriwa tamarga Beriseba ule, liye lobelaga wewule na nzina na Yehova, Mulugu wa Mukalakala.

³⁴ Evale mulombwana Abarahamu ohomala tempu ilukulu ilambo ya aFilistewu ile agali mutu oza.