Jenesesi 2 - Mazu Otchena a Mulungu

Mulugu ohovuma agamanle mabasaye

¹ Mwa eno, zulu na ilambo ya vati na jatene jinafwanyeya mwatene mwene johomala sakanyiwa.

² Mulugu agamarihile mabasaye matene, siku nanetanu na mbinli ohovuma mwa mabasa matene alabile liye.

³ Mwa enne Mulugu ohoreliha siku nanetanu na mbinli eto ohotcheniha siku nenne ira nikale siku nohiyana na malambo amohiwa, mwasiwa siku nenne Mulugu ohovuma mwa mabasaye opandutcha jatene jene ja ilambo ya vati. Jenesesi kapitulu 1 ante kapitulu 2:3 unawonga zela mapandutchiwelo a jatene mogwada. Mbwenye kapitulu 2:4 anawonga makalelo Mulugu aapandutchile liye atu na makalelo a nimburo Mulugu amuhenle liye mutu oroma. Ku wonga mazwala kinawonga zela mapandutchiwelo a jatene, so mbwenye pama pama anawonga zela mutu oroma. Kapitulu 1 unakala nnga mutu awongaga muselu mogwada mwene ira: <<Udje uhugula mota.>> Kapitulu 2 unakala nnga mutu awongaga makaleluwa ira: <<Gula uwa mota, aromile ira eni, eni, eni fiyeda liye kana mota mmandani mwaye.>> Kapitulu 1 unawonga ira: <<Aapandutchile atu gu Mulugu.>> Mbwenye kapitulu 2 unawonga makaleluwa Mulugu airile liye ira awande mukalihawo mutu. Eto kapitulu 2 mmohive unawonga zela nimburo Mulugu asakannye liye ira atu kakalegemo vamohi na makalelo a muhiyana oroma.

Zela Jenesesi kapitulu 1 na 2 Makalelo a atu oroma

⁴ Ala ba mapandutchiwelo a ilambo ya zulu na ilambo ya vati. Yehova Mulugu agapandutchile ilambo ya vati vamohi na ilambo ya zulu,

⁵ makupu a mukokolani kali kahanamele eto jalo ja mmindani jali jahanamele mwilamboni ya vati. Tchoira Yehova Mulugu ali ahanarumbwihelemo muzongwe, nne eto mutu olima teya ali ahanakalemo.

⁶ So mbwenye vati vokuma ifunga yenno yanyetiha teya yatene.

⁷ Evale Yehova Mulugu ohomuwomba mulombwana na teya. Liye nvuzela na mwelra mpunoni, nvaha ingumi. Mwa enne mutule ohoroma kala yengo ya ingumi.

⁸ Evale Yehova Mulugu ohokana munda azanlemo liye mitengo afwanyeya muEdeni, pandi ya makumelo wa nzuwa. Mwa enne ohomutukula mulombwana wenno amuwombile liye, muhela mmundani mule.

⁹ Yehova Mulugu ohomeliha mmundani mule mitengo dohiyana-hiyana, mitengo datene doriya waing'anaga vamohi na mitengo dofwanela dja. Eto vari va munda vale vohokala mitengo minli. Mutengo mmohi ali Mutengo Ovaha Ingumi, mmohiwa ali Mutengo Oiziwiha Upama na Ubure.

¹⁰ MuEdeni mule mohokala muhindje mmohi anyetiha munda watene wenne. Muhindjele eto ohovaruwa, aliwa kalamo mihindje minnayi.

¹¹ Muhindje oroma aitaniwa Pizoni. Muhindje wenno awerewera ilambo ya Havila mwemo mwafwanyeya oru mudjindji.

¹² Oru afwanyeya wewo ali oru wapama. Wewo eto wohokala perefume wa peresu yokwima na mabwe ofuneyetchetcha anaitaniwa onikisi.

¹³ Muhindje wanembinli aitaniwa Jiyoni. Muhindje wenno awerewera ilambo ya Kuxi.

¹⁴ Muhindje waneraru unaitaniwa Tigere, unavira pandi ya makumelo wa nzuwa wa Asiriya. Muhindje wanennayi gu Eufarati.

¹⁵ Yehova Mulugu ohomutukula mutule, liye muhela mmundani afwanyeya muEdeni mule ira alimege eto aing'anelege.

¹⁶ Yehova Mulugu ohonvaha mulombwanole nlamulo eraga: <<Udjege jovaha ja mitengo datene mofuna mwawo,

¹⁷ mbwenye Mutengo Oiziwiha Upama na Ubure, kudje. Tchoira siku nnafuna we dja, mwa ibaribari unokwa.>>

¹⁸ Yehova Mulugu eto ohowonga, liye ira: <<Kinakala pama ira mulombwana akalege eka. Nnafuna dimusasanyele nkamihedaye omufwanelela.>>

¹⁹ Nomala enne, Yehova Mulugu ohatukula anavinyama atenene anawenda mwilamboni na mbalrame datene nnavava zulu jejo jawombile liye na teya, liye dowana vamentoni va mulombwana Adawu ira aone nzina tivi afuna liye vaha kada inyama. Mwa enne kada inyama nzina navahiwa liye, aitaniwegena neno.

²⁰ Evale Adawu ohoroma vaha mazina anavinyama a vande vamohi na mbalrame datene nnavava zulu na anavinyama atene a mukokolani. Mbwenye zela pandi ya mulombwana Adawu, liye kaanna nkamihedi waye omufwanelela.

²¹ Evale Yehova Mulugu ohomugoniha mulombwana Adawu kove dilukulu mayiji. Evale mulombwanole agagonne, Yehova ohokumihawo mbaru imohi ya mulombwanole, nomala liye fungavo na munoku nnga mwakalele atu.

²² Mwa mbaru yakumihile liye wa mulombwana ile, Yehova Mulugu ohomusakanyana muhiyana, liye mudowana wa mulombwana Adawu.

²³ Evale mulombwana Adawu agamuonne muhiyanole, ohowongaga eraga: <<Peno mbwenye! Ula makuva okumela makuva aga. Eto gu munoku wa munoku waga! Liye unaitaniwege: <Muhiyana>, mwasiwa Mulugu umukumihile muwari mwa mulombwana!>>

²⁴ Nona mulombwana unerege muhiya babaye na mmaye, adowe ambande muhiyanaye, era eno, ambinlene anokala maningo mamohive bahi.

²⁵ Fwanyeya ira tempu yenne, mulombwana na muhiyanaye kawenda mandave dimbwiri eto tchanyaswelana.