Jenesesi 17 - Mazu Otchena a Mulungu

Tchindjiwa wa nzina na Abaramu

¹ Abaramu aganna yaka 99, Yehova ohomutwanyuwela, eraga: <<Miyo dili Mulugu wa Kopolo Datene. Uwendege na miyo, uvwelelege jofuna jaga.

² Miyo nnosakanya yopangana yaga na weyo ira vasogolro waabale ahima oindjiva.>>

³ Abaramu agavwile mazwale, ohoworama, agwihedaga kove yaye vati. Evale Mulugu ohowelela wonga na liye eraga:

⁴ <<Miyo nnosakanya yopangana yaga na weyo. Weyo unoza ukale babi wa malogo madjindji.

⁵ Roma peno, nzina nawo kunaitaniwege Abaramu, mbwenye nzina nawo unakala Abarahamu [ku wonga Baba wa atu oindjiva]. Mwasiwa miyo dihimala sakanya ira weyo uze ukale babi wa malogo madjindji.>>

⁶ <<Miyo nnoza duvahe ahima adjindji eto mwa weyo munoza mukume malogo vamohi na amwene.

⁷ Miyo nnosakanya yopangana yaga yohomala muwari mwa miyo na weyo vamohi na ahimawo a musogolro vamohi na ahimiwa kala no kala. Yopangana iwa tchi ila. Miyo nnokala Mulugu wawo vamohi na Mulugu wa ahimawo anabaliwelegemo musogolro.

⁸ Miyo nnoza duvahe weyo vamohi na ahimawo a musogolro ilambo yatene yenna ya Kana, ilambo yenna inafwanyeya we wagali mutu oza ira ize ikale yewa kala no kala. Eto miyo nnokala Mulugu wewa.>>

⁹ Mulugu ohomuwandelagave Abarahamu eraga: <<Zela wa weyo, uharihegemo yopangana yaga kala no kala, weyo vamohi na ahimawo anabaliwelegemo musogolro.

¹⁰ Yopangana yaga yenno inafuna we harihagamo weyo vamohi na ahimawo tchi ila: Mwaainelege alombwana atene anafwanyeya muwari mwa nyo.

¹¹ Mugwadegewo tembe nnakala sogolro wa yano ya ilombwana. Ineliwa unafuna nyo iragana inakala ionihedo ya yopangana yaga na nyo.

¹² Kuma peno dowa sogolro, mwana wa mwanapongwe uli watene unabaliwege vande vawo, akwakwanihaga malambo matanu na mararu, inafwanela aineliwe. Mwaainelege anapongwe atene muwari mwa nlogo nenyu na ahima obaliwa vande vawo, nari muzari unamugula we na atu a unde, ahali obaliwa vande vawo.

¹³ Ku wonga alombwana atene kaineliwe, roma obaliwa vande vawo nari oguliwa na kobiri. Yopangana yaga yozela ineliwa mmaningoni mwenyu tchi yopangana ya mukalakala.

¹⁴ Mbwenye mwana wa mwanapongwe uli watene ahanafune ineliwa, ahagwadiwe tembe nnakala sogolro wa yano ya ilombwana, inafwanela mutu wenno agwadiwemo muwari mwa mulogo waye, mwasiwa uviringaniha yopangana yaga.>>

¹⁵ Mulugu ohowongave na Abarahamu eraga: <<Muhiyanawo peno kunamuitanegeve Sarayi, mbwenye nzina naye nikale Sara [ku wonga mma wa amwene].

¹⁶ Mwasiwa miyo nnomureliha ira liye ambale mwana wa mwanapongwe na weyo. Na ibaribari miyo nnomureliha Sara eto unokala mma wa malogo ohiyana-hiyana. Eto muwari mwa ahimaye munoza mukume amwene.>>

¹⁷ Evale Abarahamu agavwile mazu a Yehova, ohokokoraga aoramihedaga kove yaye vati, liye teyaga ekave mmirimani mwaye eraga: <<Kodi johobabihaga ireya mulombwana okana yaka 100 liye mbala mwana? Kodi na ibaribari muhiyanaga Sara unoza ambale mwana agali liye unna yaka 90?!>>

¹⁸ Mwa enne Abarahamu ohowongaga na Mulugu eraga: <<Nnouvepani ira murumele ira Jomayili akale mwana wa nipangano vamentoni venyu.>>

¹⁹ Mbwenye Mulugu ohomuwakula Abarahamu eraga: <<Hehi. Na ibaribari muhiyanawo Sara unoza ambale mwanapongwe na weyo. Mwanole abaliwa, unvahe nzina na Izaki. Miyo nnaza disakanye yopangana yaga ya mukalakala na mwana wenno unafuna we mbala vamohi na ahimaye a musogolro.

²⁰ Mbwenye zela Jomayili unamuwonga we, dihivwa yovepa yawo. Miyo nnoza dimurelihe Jomayili eto nnoza dinvahe ahima adjindji. Liye unoza akale babi wa asogolrelri kumi na ambinli, na nlogo nindimuwa.

²¹ Mbwenye yopangana yaga nnafuna disakanye na Izaki mwana wenno unafuna mbala Sara yaka ya metchelo tempu yokala nnga ha yenna.>>

²² Evale Mulugu agamanle muwandela Abarahamu jatene ejile, ohomuhiyaga, liye dowaga.

Ineliwa wa atu atene a vande va Abarahamu

²³ Siku nimohive nenne Abarahamu ohoirana nnga mwemo mwamurumele Mulugu. Ohomutukulaga mwanaye Jomayili na ahima atene kabaliwe vande vaye nari atu aagunle liye na kobiri, malringana wenno afwanyeya agali mulombwana vande vaye, atene Abarahamu ohainela mogwada tembe nnakala sogolro wa yano ya ilombwana.

²⁴ Abarahamu aineliwaga anna yaka 99.

²⁵ Eto Jomayili aineliwe aganna yaka 13.

²⁶ Mulombwana Abarahamu na mwanaye Jomayili kaineliwe siku nimohive nenne

²⁷ vamohi na alombwana atene a vande vale masiki oguliwa na kobiri vamohi na alombwana kabaliwe vande vale, atene kohoineliwa siku nenne.