Jenesesi 15 - Mazu Otchena a Mulungu

Mulugu ohosakanya nipangano nowandana na mulombwana Abaramu

¹ Jagamanle ireya ejile, mazu a Yehova kohozaga wa mulombwana Abaramu muwari momuoniha jengo mmuruni mwaye, eraga: <<Abaramu weyo kuove! Miyo dili defeza yawo youbarela mwa jowopiha jatene eto weyo unoza ukayena yotambilra ilukulu.>>

² Abaramu agavwile mazwale ohofuka eraga: <<So Nabwiya Yehova nyo munafuna mudivahe nni miyo dahanna ahima? Tchoira Eliyezeri wa Damaxiku gunafuna halana jengo jaga jinna miyo dagakwile.>>

³ Abaramu ohokalelave wonga, liye ira: <<Voira nyo kamudivahile mwana, unafuna halana jorayela jaga miyo dagakwile gu namalaba unafwanyeya vande vaga.>>

⁴ Evale Yehova ohomuwakulaga ira: <<Nari. Unafuna halana jorayela jawo, kahi mulombwana unamuwonga we. Mbwenye unafuna halana jorayela jawo, unakala mwana unafuna we mbala.>>

⁵ Noira enne, Mulugu omuwongana Abaramu ira akumele unde, liye wonga ira: <<Uing'ane zulu, uone akala unowanda kontari nyenyedi.>> Evale ohomuwandela ira: <<Ahimawo a musogolro anoza kakale nnga nyenyedi dedile!>>

⁶ Abaramu ohomuroromela Yehova. Mwa enne Yehova omuona Abaramu nnga wapama mwasiwa liye ohomuroromela.

⁷ Yehova ohomuwandelaga akoka eraga: <<Miyo dili Yehova, wenno uukumihile ilambo yafwanyeya we ya Uri ilambo ya aKalidewu ira dize duvahe ilambwela ikale yawo.>>

⁸ Evale Abaramu ohofuka eraga: <<So Nabwiya Yehova, kodi miyo nnafuna dikayena ibaribari na makalelo bavi ira munodivaha ilambwela ira ikale yaga?>>

⁹ Yehova ohomuwakula, liye kwi: <<Ira miyo dilumbele, udizelena mwana ng'ombe imohi ya muhiyana, na mbuzi ya muhiyana imohi, na nibila nimohi na mulombwana. Jatene jejo jikale ja yaka taru. Vamohi na kangayiwa imohi, na mwana nziya nimohi.>>

¹⁰ Evale mulombwana Abaramu ohodowana anavinyama atene anne wa Yehova. Agadowilena, ohoroma gwada kada inyama vari roma muruni ante mwilani. Ohotandaga ja metadi jile, malinya menli, wu na wu, kada inyama sogolro wa nfwaye. Mbwenye kangayiwa ile na nziya nne kagwadile, ahiyile jompumbula jene.

¹¹ Evale makuvi kozaga vevale vali anavinyama okwa vale, mbwenye mulombwana Abaramu otamangihaga.

Nabwiya ohomuwandela Abaramu zela uzari wa ahimaye

¹² Yagafiyile ora ya tchiguwo, mulombwana Abaramu ohozeliwaga kove dilukulu, liye roma gona. Muwari mogona mule, yohozaga isi yohokala ya masika eto liye ohoroma ova.

¹³ Mwa enne Yehova ohomuwandela Abaramu eraga: <<Inafwanela uiziwe ira ahimawo a musogolro anoza kakale atu oza mwilamboni mwa annya. Aliwa anoza kakale azari eto anoza kamale yaka 400 kaonihiwaga goyi.

¹⁴ Mwa eno, miyo nnoza daatonge atu anne anafune asakanya azari. Evale aliwa kakumaga mwilamboni mule, anoza kavenyemo no rayela wohokala wa masika.

¹⁵ Weyo unoza ukwe mwa murendele eto waganna yaka didjindji, udowe uli makolo awo anno kakwile.

¹⁶ Vavira yaka 400, ubure unna aAmore unokala ulukulu fiyeda daatonge. Jaireya eno, ahimawo anoza kawelele ilambo yenna inafwanyeya we ila.>>

¹⁷ Evale unde wohodibaga, zawo isi ilukulu. Mwa enne yohooneyaga yombwe yatuwelaga utchi vamohi na mwendje ahindaga munlo. Ejo joviraga vari va malinya menli a anavinyama ogwadiwa ale.

¹⁸ Siku nenne Yehova ohosakanyaga yopangana na Abaramu eraga: <<Nnoavaha ilambwela ahimawo a musogolro romela muhindje wa Ijipitu, fiyeda muhindje mulukulu wa Eufarati.

¹⁹ Miyo nnoza daavahe ilambo ya aKeni, aKenezi, aKadamune,

²⁰ ilambo ya aEti, ya aFerizi, ya aRefayina,

²¹ ilambo ya aAmore, akuda Kana, aJirigazi na ilambo ya aJebuzi.>>