Jenesesi 13 - Mazu Otchena a Mulungu

Mwalana wa Abaramu na muzuliye Lroti

¹ Evale mulombwana Abaramu ohovenyaga ilambo ya Ijipitu na muhiyanaye na jatene janna liye, liye dowa pandi ya Negebe. Eto muzuliye Lroti ali vamohi na liye.

² Mulombwana Abaramu ali mutu orayeletchetcha, ohokana ng'ombe didjindji, vamohi na parata na oru.

³ Noira eno, ohokuma Negebe, liye dowaga ante fiya vari va Beteli na Ayi wewo wababihilege liye manga musasaye voroma vene.

⁴ Eto ali wewo wababihilege liye manga ibuwa ya mukuto. Agafiyile wewule, oholobela na nzina na Yehova.

⁵ Eto na mulombwana Lroti wenne awenda na Abaramu, na liyene ohokana mabilaye, ng'ombe daye na misasa daye mwakala anamalabaye.

⁶ Evale ilambo yafwanyeya atu yohayevela. Kavali wandeya ira ambinlene kakalegeve vamohive mwasiwa jorayela jiwa johotabwa indjiva.

⁷ Evale vohoza wanawana zela wa anamakumbuza a Abaramu na a Lroti aye. Mwa tempu yenne eto ilambo yali atu ile, kohafwanya anamurala, akuda Kana na aFerizi kakala wewule.

⁸ Mwa enne Abaramu ohowonga na Lroti eraga: <<Kavikale kangana zela miyo na weyo, nne anamakumbuzaga na anamakumbuzawo, mwasiwa nili amohive.

⁹ Ilambo yatene tchenna. Nimwalane. Usakulre ilambo inafuna we. Waya pandi ya muwononi oromana, miyo nnaya pandi ya muwononi odjana. Eto waya pandi ya muwononi odjana miyo nnaya pandi ya muwononi oromana.>>

¹⁰ Evale mulombwana Lroti ohoroma ing'ana pandi datene. Mwa enne againg'anne tcherela ya muhindje Jordawu, ohoona ilambo yorambalala yoira deduu, kuma Jordawu fiyeda Zowari. Yali ilambo yokana mahindje madjindji eto yali nnga munda wa Yehova, nari ilambo yapama ya Ijipitu. (Tchoira tempu yenne ali Yehova ahanatolotche Sodoma na Gomora.)

¹¹ Evale Lroti ohosakulra ilambo yotandeleya yafwanyeya tcherela ya Jordawu ile. Liye venya dowaga pandi ya makumelo wa nzuwa. Mwa enne kohomwalanaga.

¹² Abaramu ohala liye kalaga pandi ya Kana. Lroti ohodowa kalaga pandi ya sidadi dowandamelana Jordawu. Eto Lroti ohosusihave misasa daye, adowaganave ante wandamelana sidadi ya Sodoma.

¹³ Mbwenye eto atu a Sodoma ule kali atu a makalelo abure, atu omutegela Yehova na makalelo ohokala a masika.

Nipangano na Mulugu na Abaramu

¹⁴ Lroti agamwalanile na Abaramu, Yehova ohomuwandela Abaramu eraga: <<Katukula meswawo, uing'ane ilambo yatene, uing'ane pandi ya makumelo wa nzuwa na mavirelo wa nzuwa, na pandi ya norti, na pandi ya suli.

¹⁵ Tchoira ilambo yatene inaona we, nnouvaha weyo vamohi na ahimawo a musogolro ira ikale yewa kala no kala.

¹⁶ Miyo nnoaindjiviha ahimawo a musogolro ira kakale nnga tumbulru nnafwanyeya mwilamboni ya vati. Voira tumbulru nnafwanyeya mwilamboni kalivo unawanda kontari, ahimawo na aliwene kiza kakontareyaga.

¹⁷ Uvenye uwendawendege pandi datene mugomenle ilambwela. Tchoira miyo nnafuna duvahe ilambo yenna.>>

¹⁸ Evale Abaramu agarumiwe enne, ohotamihaga misasa daye, liye dowa kalaga wewo unafwanyeya mitengo da karvaliyo da Mamere sidadi ya Eboroni. Agali wewule ohomanga ibuwa ya mukuto wa Yehova.