Jenesesi 12 - Mazu Otchena a Mulungu

Itaniwa wa Abaramu

¹ Yehova ohowonga na Abaramu eraga: <<Uvenye ilambo ili we, waahiye abalawo, na vande va babawo, udowege ilambo yenno inafuna miyo utonyiheda.

² Miyo nnosakanya ira mwa weyo mukume nlogo nindimuwa. Miyo nnoureliha, nnovweyiha nzina nawo ira atu amohiwa karelihiwe mwa weyo.

³ Miyo nnerege areliha ale anaurelihege eto nnerege atembelrelra ale anautembelrelrege. Eto malogo matene a ilambo ya vati anoza karelihiwe mwa weyo.>>

⁴ Abaramu agavwile mazwale, ohovenyihana nnga mwamurumele Yehova. Lroti ohodowaga vamohi na liye. Abaramu avenyaga ilambo ya Arani yakala liye, afwanyeyana yaka 75.

⁵ Ohomutukula muhiyanaye Sarayi, na Lroti mwana mbalaye, na jengo jatene japatile atu kagali wewule vamohi na anamalabiwa anno kaapatile atu Arani ule. Atene anne kohovenyihana, kadowaga ante aliwa fiya ilambo ya Kana.

⁶ Kagafiyile Kana, Abaramu ohowendawendaga ilambwele fiyeda Sikemu, ante liye dowa fiya vati va mutengo mulukulu wa karvaliyo afwanyeya More. Tempu yenno akuda Kana kafwanyeya wewule.

⁷ Evale Yehova ohomutwanyuwelaga mulombwana Abaramu, liye muwandela ira: <<Miyo nnouvaha ilambo yenna ira ikale ya ahimawo a musogolro.>> Noira enne, Abaramu ohomanga evale ibuwa ya mukuto wa Yehova wenno amutwanyuwenle.

⁸ Noira eno, Abaramu ohokwaranyagavo, liye dowa mwangoni, pandi ya makumelo wa nzuwa, dowa manga musasaye wewule, liye kalaga vari va Beteli na Ayi. Sidadi ya Beteli yali mavirelo wa nzuwa eto sidadi ya Ayi yali makumelo wa nzuwa, liye kala vari. Evale liye ohomangavo ibuwa ya mukuto wa Yehova eto oholobela na nzina na Yehova.

⁹ Noira eno, mulombwana Abaramu ohomaruwa, adowaga pandi ya Negebe.

Abaramu ohodowa Ijipitu

¹⁰ Tempu yenne mwilamboni mwa Kana mohokala ndala ilukulu. Na mwasa wenne, mulombwana Abaramu ohovenyihanaga na muhiyanaye, aliwa dowaga Ijipitu.

¹¹ Evale kafunaga fiya Ijipitu ule, Abaramu ohomuwandelaga muhiyanaye eraga: <<Muhiyanaga miyo dihiiziwa ira weyo usimbwa riya bure.

¹² Akuda Ijipitu kauona, anoiziwa ira uli muhiyanaga. Aliwa kaiziwa ira weyo uli muhiyanaga, afwase anodipa miyo ira kautele.

¹³ Mbwenye ira jejo jahaireye, nnauvepa ira uwongege ira: <Ula gu murongolaga.> Waira eno miyo nnowatcheliwa pama na mwasa wa weyo eto nnowanda wombowa mwa weyo.>>

¹⁴ Evale aliwa kavolowaga muIjipitu mule, atu a wewule na ibaribari kohomuona Sarayi ira ohotabwa riya.

¹⁵ Eto asogolrelri a Farawu kagamuonne Sarayi, kohoroma muwandela Farawu zela makalelo anna liye. Na mwasa wenne, kohomutukula mwadi Abaramu, aliwa mudowana vande va Farawu.

¹⁶ Mwa enne mwene Farawu na mwasa omuziveliwa Sarayi, ohomuwatchela pama Abaramu. Farawu ohonvaha mabila, ng'ombe, aburu a alombwana na aburu a ahiyana, anamalaba a alombwana na anamalaba a ahiyana, vamohi na akamelo.

¹⁷ Mbwenye Yehova ohonvaha maurenda ohokala a masika mwene Farawu vamohi na vande vaye vatene na mwasa wa Sarayi mwadi Abaramu.

¹⁸ Evale Farawu ohomuitana Abaramu, liye nfuka ira: <<Kodi jeji jidiirele we ji nni? Mwasiwa gwa nni uza wahadiwandelaga ira Sarayi gu muhiyanawo?

¹⁹ Mwasiwa gwa nni uza uwongaga ira: <Wenna gu murongolaga.>? Na mwasa wa jowonga jawo, miyo dohomutela ira akale muhiyanaga. Mbwenye voira gu muhiyanawo, umutukule umudowegena!>>

²⁰ Evale Farawu oharuma anamalabaye ira kanvelele mulombwana Abaramu na muhiyanaye. Anamalaba a mwene Farawu ale kohonvelelaga mulombwana Abaramu kankumihaga mwilamboni mule ira adowege na jengo jaye jatene.