Jenesesi 11 - Mazu Otchena a Mulungu

Balaletchiwa wa atu no mwalanihiwa wa viwongelo

¹ Mwilamboni mwatene, iwongelo yali imohive bahi eto atu atene makalelo ewa owonga ali mamohive.

² Mbwenye muwari mwa tempu yenne kohokalawo atu kavenyile pandi ya makumelo wa nzuwa, aliwa roma wendawenda. Mwa enne kawendawendaga kohofwanya nimburo notandeleya mwilamboni mwa Sinari, aliwa roma kala vevale.

^3-4 Evale kohowongaga mmohi na nfwaye, aliwa ira: <<Ndoweni niwombeni boloki, nitumeyeni pama, nimangeni sidadi yehu vamohi na nyumba yolapa ya agwarda, ifiye zulu ira nzina nehu nivweye eto ira nahamwadeyele mwilamboni ya vati.>> Evale kohoroma manga. Aliwa eto tchamangile na mabwe na simenti, nari. Vamalroni va mabwe kalabana boloki eto vamalroni va simenti kalabana alikataraya.

⁵ Mwa enne Yehova ohotita ira aone sidadi vamohi na nyumba yolapa ya gwarda, jejo jamanga atwale.

⁶ Evale Yehova ohowonga eraga: <<Mabasala ku roma wene. Aliwa eto kinaimwanana irana jatene jinaumbuwela atu mwasiwa atwala iwongelo yewa tchi imohive eto ba atu a nlogo nimohive.

⁷ Ndoweni nititeni, naviringanihe iwongelo yewa, kakayena viwongelo doindjiva ira kahawandege vwanana.>>

^8-9 Evale Yehova ohoviringaniha iwongelo yewa, kada atu kana iwongelo yewene. Noira enne, aliwa kohotchelela manga sidadile na mwasa oira tchavwanana. Mwa enne Yehova paabalaletchele liye mwilamboni ya vati. Sidadi yamanga atu ile yohovahiwa nzina na Babeli, mwasiwa Babeli ku wewo Yehova waviringanihile liye viwongelo da atu atene eto aabalaletchela atu mwilamboni yatene ya vati.

Makolo a Abaramu

¹⁰ Ula gu muselu wa mulombwana Semi. Semi aganna yaka 100 ohombala Arifaxade. Jejo jaireyile agakumile mmwadeyani, vagamanle yaka mbinli.

¹¹ Semi agambanle Arifaxade, ohomala yaka 500 dimohi diwa hiya yaka 100 doroma dile. Muwari mwa yaka dedile, ohabala ahima amohiwa, alombwana vamohi na ahiyana.

¹² Arifaxade aganna yaka 35, ohombala mulombwana Sela.

¹³ Arifaxade agambanle Sela, ohomala yaka dimohi diwa 403, hiya 35 doroma dile. Muwari mwa yaka dedile ohabala ahima amohiwa, alombwana vamohi na ahiyana.

¹⁴ Mulombwana Sela aganna yaka 30, ohombala Eberi.

¹⁵ Sela agambanle Eberi, ohomala yaka dimohi diwa 403, hiya 30 doroma dile. Muwari mwa yaka dedile ohabala ahima amohiwa, alombwana vamohi na ahiyana.

¹⁶ Mulombwana Eberi aganna yaka 34, ohombala Pelegi.

¹⁷ Eberi agambanle Pelegi, ohomala yaka dimohi diwa 430, hiya 34 doroma dile. Muwari mwa yaka dedile ohabala ahima amohiwa, alombwana vamohi na ahiyana.

¹⁸ Mulombwana Pelegi aganna yaka 30, ohombala Rewu.

¹⁹ Pelegi agambanle Rewu, ohomala yaka dimohi diwa 209, hiya 30 doroma dile. Muwari mwa yaka dedile ohabala ahima amohiwa, alombwana vamohi na ahiyana.

²⁰ Mulombwana Rewu aganna yaka 32, ohombala Serugi.

²¹ Rewu agambanle Serugi, ohomala yaka dimohi diwa 207, hiya 32 doroma dile. Muwari mwa yaka dedile ohabala ahima amohiwa, alombwana vamohi na ahiyana.

²² Mulombwana Serugi aganna yaka 30, ohombala Nahori.

²³ Serugi agambanle Nahori, ohomala yaka dimohi diwa 200, hiya 30 doroma dile. Muwari mwa yaka dedile ohabala ahima amohiwa, alombwana vamohi na ahiyana.

²⁴ Mulombwana Nahori aganna yaka 29, ohombala Tera.

²⁵ Nahori agambanle Tera, ohomala yaka dimohi diwa 119, hiya 29 doroma dile. Muwari mwa yaka dedile ohabala ahima amohiwa, alombwana vamohi na ahiyana.

²⁶ Mulombwana Tera aganna yaka 70, ohombala Abaramu, Nahori na Arani.

Ahima a mulombwana Tera

²⁷ Ula gu muselu wa mulombwana Tera. Tera ohombala Abaramu, Nahori na Arani. Arani eto ohabala ahimaye araru. Mmohi eriwa Lroti,

^28-29 mmohi eriwa Milika, mmohi eriwa Isika. Mulombwana Arani ohokwa mwilamboni mwabaliwe liye mwa Uri wewo wali aKalidewu, babaye Tera ahanakwe. Mwa enne Nahori ohovenya dowa mutela Milika, mwana mbalaye Arani. Eto Abaramu ohomutela muhiyanaye eriwa Sarayi.

³⁰ Mbwenye Sarayi kaanna ahima mwasiwa ali ngomwa.

³¹ Evale Tera ohomutukula mwanaye Abaramu na nijaliye Sarayi na muzuliye Lroti mwana Arani, aliwa kuma Uri, ilambo ya aKalidewu ira kadowe ilambo ya Kana. Kahanafiye Kana, kohoimelaga ilambo yeriwa Arani, aliwa roma kala wewule.

³² Mwa enne mulombwana Tera ohofiyeda kwa kagali Arani ule. Tera akwile aganna yaka 205.