Galasiya 6 - Mazu Otchena a Mulungu

Jokokomeza zela limbihana

¹ Abalaga mwamuona nfwinyu ira ugwana yotega, inafwanela ira ule unasogolrelriwa na Munemba Otchena adowe anvenyihe muwari mofwasa. Mbwenye polre polre tawiha ira na nyenne munaze mugwe na yotega.

² Eto inafwanela ira kada mutu awande dowa muwatchela nfwaye mutolro unna liye ira awandege kwakwaneliheda nlamulo na Kiristu.

³ Mbwenye mutu wenno unaviona ira: <<Miyo kadili wa masika>>, aalramwisaga afwaye agali liye kahi yengo, unavinyenga ekave.

⁴ Inafwanela kada mutu avitonge eto aviing'ane pama mabasa analaba liye. Era eno unowanda ziveliwa mabasa alabile liye hiyaniha no ziveliwa ira: <<Miyo kadili nnga uluwole.>>

⁵ Tchoira kada mutu unokana mutolro waye ira atukule.

⁶ Inafwanela ira mutu wenne unafundjihiwa mazu a Mulugu awande mukamiheda na makalelo matene wenne unanfundjiha.

⁷ Kamunyengiwe, Mulugu kanapetiwa. Tchoira inazala mutu, tcheniyo inafuna liye za handa.

⁸ Mutu wenne unafuna zala ja maningo, handa waye unagomela nongeya. Mbwenye mutu wenne unazala mwa Munemba, mwa Munemba wenno yohanda yaye unaza agomele vahiwa ingumi yohomala.

⁹ Kanigomeni irana jengo japama mwasiwa sogolro ukala handa. Malringana nahahiye irana japama, nnoza nihandeni.

¹⁰ Inafwanela niwande akamiheda atu atene na makalelo anawanda hiyo. Eto muwari moakamiheda atu atene mule, inafwanela nisimbwege kamihedana mukalele hiyo atu okana nroromelo.

¹¹ Kaing'anani maletira mandimuwa ala nnalremba miyo na ndanda naga.

Mazu ogomiheda

¹² Ale anaukanyihedani ira muineliwe so anafuna kateteliwe zela joira jiwa eto anatawa ira kafundjiha vulusiwa muwari mwa ukwa wa Kiristu, anaze kaharahariwege.

¹³ Eto ale anaineliwa kinawanda kwakwaneliheda malamulo. So aliwa anafuna ira nyo muineliwe ira kawande vititimiha zela nyo.

¹⁴ Kilivo yengo nnafuna miyo vititimihana. So titimiha waga, nnamutitimiha Nabwiya wehu Yesu Kiristu na ukwa waye vamuradini. Muwari mwa ukwa wa Kiristu, dihimwalana na jengo ja mwilamboni ya vati eto jengo ja mwilamboni ya vati jihimwalana na miyo.

¹⁵ Tchoira ineliwa, nari haineliwa, ejo kajinna mabasa. Inna mabasa ku pandutchiwa ira nikale atu axa.

¹⁶ Murendele na tangaranga da Mulugu jikale na atu atene anno anawenda muwari mokana ibaribari zela eji na atu anno anafwanyeya kagali aIzarayeli a Mulugu.

¹⁷ Kuma peno dowa sogolro, kakalevo mutu mmohiwa unafuna dizuzumiha mwasiwa mmaningoni mwaga mu muhukala madamba zela bubudeliwa nzina na Yesu.

¹⁸ Abalaga sayi da Nabwiya wehu Yesu Kiristu dikale muwari mwa minemba denyu. Ame! Kukala mazu a karta nalrembiwele atu omuroromela Yesu a Galasiya.