Galasiya 5 - Mazu Otchena a Mulungu

Jokokomeza ira atu omuroromela Yesu kawendege nnga atu okutchiwa

¹ Kiristu unikutcha ira niwendege na makalelo a atu okutchiwa. Nona kamurumele kapatchihiwa uzari akoka.

² Muvwe pama, miyo dagali mulombwana Pawulo inafuna miyo duwandeleni. Nyo mwarumela ira aliwa kauineleni ira mukale pama vamentoni va Mulugu, Kiristu kanaukamihedani yengo.

³ Miyo nnafuna duwandeleni akoka ira ule unarumele ira kamuinele, unokana mabasa okwakwaneliheda malamulo matene.

⁴ Nona ule unafuna kala wapama vamentoni va Mulugu muwari mwa malamulo uhumala mwalana na Kiristu eto uhumala tatila sayi da Mulugu.

⁵ Hiyo mbwenye muwari mwa Munemba Otchena, muwari mwa nroromelo, nihikana yodediheda ira Mulugu unoza anifwanye nagali atu apama vamentoni vaye.

⁶ Tchoira mutu uli muwari mwa Yesu Kiristu, akala uineliwa owu hehi kaineliwe, jejo kajinna mabasa. So ilukuluwa inafuneya mutu akayena nroromelo eto muwari mwa nroromelo aaziveliwege afwaye.

⁷ Nyo eto wanle mohoroma tamanga pama. Nnga uzile utitani sogolro wenyu ira mwahavwelelege ibaribari bani?

⁸ Zelru dedo mbwenye kadikumile wa Mulugu wenno uuitanileni, nari.

⁹ Inowongiwetcha ira: <<Leverina wa vang'onove unonyakuwiha masa matene.>>

¹⁰ Voira nyo muli muwari mwa Nabwiya, miyo dihiiziwa ira mwavwa mazu nnawonga miyo ala, kamunakana youmbuwela imohiwa. So mbwenye mutu wenno unaukukumulani unotongiwa masiki akale ani.

¹¹ Miyo abalaga nnoharahariwa, mbwenye kannaharahariwela muwari moira miyo na vanove nnawonga nkani oira mutu ira avulusiwe inafwanela aineliwe, nari. Ahakale eno, muselu wa ukwa wa Kiristu vamuradini kakala muselu oagwagwadutcha atu.

¹² Zela ale anaukukumulani na joineliwa jo, miyo dafuna nnga aliwa kakapalriwe.

¹³ Nyo abalaga muhuitaniwa ira mukale atu okutchiwa. Mbwenye muwari mokala atu okutchiwa, kamunukede kutchiwa wenyu ira ukale dugumento noirana jofuna ja maningo. So mbwenye inafwanela muwandege kamihedana muwari mozivelana.

¹⁴ Tchoira wonga malamulo matene mogwada ku wonga muziveliwa mutu uli watene nnga munaviziveliwela we wa mwinnya.

¹⁵ Mbwenye mwahakayena makalelo ozivelana, mwaroma lumana, mwaroma takunana, polre polre. Mwasiwa munomala tolotchana.

Jokokomeza ira nisogolrelriwe na Munemba hiya sogolrelriwa na jofuna ja maningo

¹⁶ Miyo mbwenye nnafuna dukokomezeni ira muwende na Munemba. Mwawenda na Munemba, kamunairana jofuna ja maningo.

¹⁷ Tchoira jofuna ja maningo jinowana na jofuna ja Munemba. Eto jofuna ja Munemba jinowana na jofuna ja maningo. Muwari mwa jengo mbinli ji, kavili vwanana. Jofuna jehu ja maningo jinafuna jinihiyihe ira nahairegena jofuna japama jinafuna hiyo irana.

¹⁸ Mbwenye akala nyo munasogolrelriwa na Munemba, kamunatongiwa ira muwende na malamulo.

¹⁹ Joira ja maningo jihimala iziweya. Ti ji: Raruwa, irana jotakala, unyambi,

²⁰ labana vikwamutu josema, lowana, idana, haraharana, kalelana nrima, iragana jengo muwari mwa uwali, visogolriha, kangana, wanawana,

²¹ silrilra, lrezelra, dowaga vamainelo na jotakala jimohi jiwa jokala ha jeji. Miyo nnafuna dulimbiheni nnga daulimbihileni miyo malambo a mundulrimu ira ale anairana nnga ha jeji kiza kavahiwa pandi muUmweneni mwa Mulugu.

²² Mbwenye musapo wa mutu unasogolrelriwa na Munemba Otchena unafwanyeya agali zivelana, hagalala, murendele, vilela, muirela nfwawo upama, irana japama jatene, kana nroromelo,

²³ wenda mopwaseya na afwawo, no viwendiha pama. Kanilivo nlamulo nnakameliha jeji.

²⁴ Zela hiyo atu nnafwanyeya nagali atu a Yesu Kiristu, nihimala tukula makalelo anne nanna hiyo wanle a jofuna ja maningo, jatene ejile nihimala komela vamuradini.

²⁵ Voira Munemba gunanivaha ingumi ixa, inafwanela eto niwendege na Munemba.

²⁶ Kanikaleni atu ovitukulela, kagana makalelo owanihedana no kalelagana nrima mmohi na nfwaye.