Galasiya 2 - Mazu Otchena a Mulungu

Pawulo ohogumana na anamarumiwa amohiwa

¹ Eto dagakumile sidadi ya Jeruzalemu, miyo dohomala yaka kumi na nnayi dahanawelelewo akoka. Evale miyo diwelelagawo, dadowile vamohi na Barnabe eto dohomudowana mulombwana Titu.

² Eto ira didowe Jeruzalemu, dadowelewo mwasiwa dohowandeliwa ira diyewo muwari moonihiwa na Mulugu. Eto dadowelewo ira daagumanihe vewa vene ale kaoneya nnga andimuwa, daawandelemo Muselu Wapama unalaleya miyo muwari mwa atu ohokala aJudewu. Miyo daova ira dahaawandele, mabasa alabile miyo anagomela nongeya eto masiki didowege sogolro, jinalaleyege miyo kajinavweyege pama.

³ Eto fwanyeya ira masiki Titu alive muGerego, aliwa tchamukanyihedile ira aineliwe na makalelo a aJudewu, nari.

⁴ Mbwenye kohokalamo atu amohiwa kavioniheda nnga abalihu omuroromela Yesu agali aliwa kere zembelamo ira kaone kutchiwa wa hiyo atu nnafwanyeya muwari mwa Kiristu, amala kanitukule, kaniwelihede muuzarini mwali hiyo.

⁵ Mbwenye jatene jagaireyile eno, hiyo mbwenye nohokonda valukulu, kanarumenle nne vang'onove. Hiyo nohowanda runiha mwasiwa hiyo natawiha ira afwihu kavwa ira Titu uhuineliwa, anotatila ibaribari zela Muselu Wapama. Tcheniyo yanikondihile.

⁶ Eto fwanyeya ira muwari mwa ale kaiziweya nnga andimuwa omuroromela Yesu sidadi ya Jeruzalemu, dagaawandenle makalelo analaleya miyo, aliwa tchanna yengo ira karunihe. Dawongaga ira kaiziweya nnga andimuwa, kannasimbwa balra akala ba andimuwa, so iiziwile miyo, tchoira Mulugu kanna nsakulro.

⁷ Hiya diruniha, andimuwale kohoona ira sawasawa nnga Peduru ohovahiwa ira aalaleyege aJudewu Muselu Wapama, na miyene eto dohovahiwa ira daalaleyege atu ohokala aJudewu Muselu Wapama.

⁸ Miyo eto dihiiziwa ira jatene ejo, aliwa kohowonga pama. Tchoira Mulugu mmohive alabile mabasaye muwari mwa Peduru zela kala namarumiwa wa aJudewu gu mmohive alabile mabasaye muwari mwa miyo zela atu ohokala aJudewu.

⁹ Fwanyeya ira andimuwa andimuwa, anno anafwanyeya kagali mulombwana Tiyagu na Peduru na Juwawu kagaonne ira Mulugu na sayi daye udirumile ira daalaleye atu ohokala aJudewu, aliwa kohodiwatchela miyo na Barnabe na manda menli nnga abali. Atu kwi: <<Nyo mulimbihede alaleya atu ohokala aJudewu. Hiyo mbwenye nnafuna naalimbihede aJudewu.>>

¹⁰ So kanivepile ira: <<Hiyo nnafuna nnga mwahaadiwale atu osimela anafwanyeya muwari mwa Kiristu.>> Eto yengo yenno miyo dohokana mmirimani mwaga ira diiregena.

Pawulo ohomusumulula Peduru vatando vene

¹¹ Miyo dagadowile ilambo ya Antiyokiya, mulombwana Peduru agazile, miyo dohomusumulula kove na kove mwasiwa liye ogwana mulandu na joira jaye.

¹² Tchoira azaga wene, liye adja vamohi na atu ohokala aJudewu. Mbwenye kagazile atu kawendetcha na Tiyagu wanle anno kasimbwa riheda ineliwa, Peduru ohoroma konda dja vamohi na atu ohokala aJudewu afwaye, liye kala vaye vene mwasiwa liye aaova ale kazile ale.

¹³ AJudewu atene omuroromela Yesu kohoiziwa ira hiyo podi dja vamohi na atu ohokala aJudewu omuroromela Yesu. Eto kagaonne ungongomwa wa mulombwana Peduru, na aliwene kohoroma muhara Peduru viringaniha waira liye. Ante mwinnyiwene Barnabe, ohiya ibaribari, liye haraga ja ungongomwa jaira afwaye.

¹⁴ Mbwenye miyo dagaonne ira jinera afwaga kahi jolingana na ibaribari inafwanyeya muwari mwa Muselu Wapama, miyo dohowanda wonga na Peduru vatando vamentoni va atene ira: <<Katiye Peduru, we uli muJudewu eto unawendetcha nnga mutu ahali muJudewu. Nnga unawanda avi akanyiheda atu kahali aJudewu ira kawendege nnga aJudewu?>>

¹⁵ Miyo dohomuwandela Peduru na afwaye ira: <<Hiyo nili aJudewu mobaliwa. Kanili atu otega nnga atu ohokala aJudewu.

¹⁶ Masiki eno hiyo nihiiziwa ira mutu kanakala wapama vamentoni va Mulugu muwari mwa joira jaye joharihamo malamulo, mbwenye unakala wapama momuroromela Yesu Kiristu. Hiyo nimuroromenle Yesu Kiristu ira niwande kala apama momuroromela liye bahi hiya vikaliha apama vamentoni va Mulugu muwari moharihamo joira ja malamulo. Tchoira kalivo unaza akale wapama vamentoni va Mulugu muwari moharihamo malamulo.>>

¹⁷ Hiyo nagali atu otega nnafuna nnga nikale apama vamentoni va Mulugu muwari mwa Kiristu. Mbwenye akala Kiristu unonikaliha pama hiyo atu otega, kodi moira eno Kiristu gowandana na jotega? Nne vang'ono.

¹⁸ Akala miyo nnamanga yenno ibwanyunle miyo, nnavioneyiheda ira dili mutu oviringaniha.

¹⁹ Muwari mwa malamulo miyo dohowanda onelramo ira: <<Kadiwende na malamulo.>> Pa evale vahiyile miyo wenda na malamulo ira diwande wenda na Mulugu.

²⁰ Miyo dihikomeliwa vamuradini vamohi na Kiristu. Dawendaga eni, unawenda kahi miyo. So gu Kiristu unakala mwa miyo. Eniva dawendaga na maningwagala, miyo nnawenda muwari momuroromela Mwana Mulugu wenno udizivenle, wenno uwandile vivelela za dikwela miyo vano.

²¹ Miyo kannaruniha sayi da Mulugu. Tchoira akala mutu unakala wapama vamentoni va Mulugu muwari mohara malamulo, era eno, Kiristu ukwele vasayi.