Galasiya 1 - Mazu Otchena a Mulungu

Malondjelo a Pawulo

¹ Unalremba gu miyo Pawulo, namarumiwa wa Yesu Kiristu. Muwari mokala namarumiwa, kadili namarumiwa orumiwa na nikuru na atu nne mutu uli watene wa mwilamboni muno. Mbwenye udirumile gu Yesu Kiristu na Mulugu Baba wenno umuvenyihile Yesu Kiristu mokwani.

² Miyo na abalaga dinna miyo uno nnorumiha malondjelo wa nyo makuru a atu omuroromela Yesu a ilambo ya Galasiya.

³ Malondjelo anaurumihedani hiyo ba ala. Nifunne ira sayi na murendele okumela wa Mulugu Babihu na Nabwiya Yesu Kiristu, jatene ejo jikale na nyo.

⁴ Yesu guwandile vivelela, liye za kwela jotega jihu ira awande niwombola mwa tempu yabure inna hiyo ila. Jatene ejo liye ohoirana mwemo nnga Babihu Mulugu mwafunele liye.

⁵ Mulugu eka atamaleliwe kala no kala. Ame!

Muselu Wapama gu mmohive

⁶ Miyo nnotikina mwasiwa vohosusa vene, muroma muhiya Mulugu wenno uuitanileni mwa sayi da Kiristu. Peno muhuperuwa, munahara muselu mmohiwa ahali Muselu Wapama.

⁷ Mbwenye iiziwile miyo tchoira miselu dapama kadiliwo minli. Muselu Wapama wa Kiristu gu mmohive. Mbwenye kohokalawo eto atu anauzuzumihani muwari moulaleyani jimohi jiwa, aliwa gombihaga Muselu Wapama zela Kiristu.

⁸ So mbwenye mutu wenno unalaleya muselu mmohiwa ahali Muselu Wapama wenno nulaleyileni hiyo, masiki akale hiyo vano, masiki akale mungelro okumela zulu aza alaleyaga muselu muxa ohokala wenno nulaleyileni hiyo, wenno atembelrelreye.

⁹ Sawasawa nnga mwawongele hiyo malambo a mundulrimu nagali na nyo, nnafuna diwonge akoka. Mutu wenno unafuna za sogolro aalaleyaga afwaye muselu mmohiwa hiya wenne muwandeliwe nyo, mutu wenno atembelrelreye.

¹⁰ Nyo mwadivwa diwongaga eno, kodi nnawonga ira atu kaziveliwege? Nari. Nnawongela eno ira Mulugu aziveliwege. Wanle miyo dali mutu oaziveliwiha atu. Mbwenye peno ahakale difunagave kala mutu oaziveliwiha atu, miyo kadakala muzari wa Kiristu.

Pawulo alaleya jejo jawandeliwe liye na Yesu

¹¹ Miyo abalaga nnafuna nnga muiziwe ira muselu duwandenleni miyo kahi muselu okumela mmuruni mwa mutu.

¹² Tchoira Muselu Wapama dulaleyileni miyo, kadiwatchenle na mutu, nne kalivo udifundjihile. Mbwenye miyo dulaleyileni muselu wenno diwandeliwe miyo na Yesu Kiristu.

¹³ Tchoira muhumala iziwa makalelo danna miyo tempu dawenda miyo na makalelo a aJudewu. Doholaba mabasa oharahara na uwali wohokala wa masika nikuru na Mulugu, miyo funaga nnga atenene kamale piwa.

¹⁴ Zela mangano matenene kanivahile makolo ehu aJudewu, miyo vano dohariha pama na mmirimani mwaga mwatene. Miyo eto dohakwaranya afwaga oindjiva a idadi yanna miyo.

¹⁵ Mulugu mbwenye, ohodisakulra dahanabaliwe. Noira eno, liye udiitana mwa sayi daye.

¹⁶ Muwari modiitana, Mulugu mofuna mwaye ohodioniha Mwanaye ira diwande mulaleya muwari mwa atu ohokala aJudewu. Kuma evale, kadadowile wa mutu mmohiwa ira adimarihedemo jimohi jiwa jahanle nari.

¹⁷ Nne miyo kadadowile Jeruzalemu ira dagumane na ale kali anamarumiwa wanle miyo dahanakale namarumiwa, nari. Mbwenye dadowile Arabiya. Noira eno, dohowelela Damaxiku akoka.

¹⁸ Vagamanle yaka taru tchi tempu yoroma dadowile miyo Jeruzalemu ira dangumanena Peduru. Wewule dohomalawo malambo kumi na matanu dagali vamohi na liye.

¹⁹ Mbwenye kadigumanne na anamarumiwa amohiwa, so mbwenye dangumannena Tiyagu Nabwiya mbalaye.

²⁰ Inawonga miyo, nnawonga vamentoni va Mulugu. Kannanama.

²¹ Evale miyo dohokuma porovinsiya ya Judeya, miyo roma wendawenda maporovinsiya mamohiwa a Siriya na Silisiya.

²² Muwari moira kadadibeliwile porovinsiya ya Judeya, miyo dohovenyavo atu omuroromela Yesu anafwanyeya muwari mwa Kiristu kahanadiiziwe kove na kove.

²³ So aliwa kera vwa wene ira: <<Wenno aniharaharetcha, peno unalaleya mazu anno afunetcha liye nnga kamale.>>

²⁴ Aliwa eto kohomutitimiha Mulugu na mwasa wa miyo.