Filipo 4 - Mazu Otchena a Mulungu

Yokokomeza zela vwanana

¹ Nona nyo abalaga nnauziveliwani miyo eto nnausauwelani miyo, nyo muli hagalala waga eto muli yotambilra yaga. Nnafuna dukokomezeni nyo atu anauziveliwani miyo ira muimele pama muwari mwa Nabwiya.

² Miyo eto nnafuna duvepeni nyo arongolihu Evodiya na Sintiki ira muwande vwanana pama muwari mokala vamohi mwa Nabwiya.

³ Vamohive vevo eto miyo nnouvepa weyo nfwaga ulabile vamohi na miyo ira waakamihede ahiyana ambinli ala kakale atu ovwanana. Aliwa malambo a mundulrimu kalabetcha vamohi na miyo mabasa olaleya Muselu Wapama vamohi na Kelementi na afwaga amohiwa kalaba na miyo kagali atu okana maziniwa muLivuru na Ingumi.

Jokokomeza jimohi jiwa

⁴ Miyo nnoukokomezani ira muhagalalege muwari mwa Nabwiya ora ili yatene. Miyo nnafuna diwonge akoka ira inafwanela muhagalalege.

⁵ Inafwanela eto muwendege na makalelo ira atu atene kauonani na makalelo munaira nyo, kaiziwe ira muli atu opwaseya. Nabwiya uli vakwikwive.

⁶ Kamukukumuwe zela yengo ili yatene. So muwari mwa jatene, munvwihege Mulugu jatene jinafuna nyo. Ku wonga inafwanela mulobelege, munvepaga muwari momutamalela.

⁷ Mwairana eno, murendele wa Mulugu wenno unakwaranya onelramo wehu unolaba ira mmirimani mwenyu na joumbuwela jenyu jikale japama jene muwari mwa Yesu Kiristu.

⁸ Yengo yogomiheda inafuna miyo dukokomezeni nyo abalaga, nnafuna ira muumbuwelege jengo japama. Inafwanela muumbuwelege jengo ja ibaribari, jofwanela, jokwakwanela, jotchena, jofwanela ziveliwiwa, jofwanela rumeliwa, malringana ili yatene inafwanyeya yagali yapama, yofwanela teteliwa, muumbuwelege ejo.

⁹ Inafwanela muiregena jatene jufundjihileni miyo eto inafwanela muiregena jengo jatene duvahedileni miyo eto jatene jivwile nyo na miyo eto jatene jidionnena nyo diiragana. Mwairana jatene ejo, Mulugu wenno unavaha murendele unousogolrelrani.

Pawulo ohatamalela afwaye na mwasa wa jovaha janvahile atu

¹⁰ Miyo nnoziveliwa valukulu muwari mwa Nabwiya, mwasiwa kagavirile malambo oindjiva, nyo muhuwelela dikukumuwela miyo akoka. Mbwenye masiki vavirileve malambo madjindjene eno, kahi ira nyo kamwadikukumuwela. Na ibaribari modikukumuwela, so nyo mwere hakana makalelo ira mudikamihede.

¹¹ Miyo para wonga mazu anna, kahi ira dire segedeya. Mwasiwa dihimala fundja makalelo opwaseya muwari mwa jatene jinadifwanya.

¹² Dihimala fundja yenno atu adjindji yahaiziwile atu. Dihiiziwa makalelo opwaseya tempu inakana miyo jengo nari tempu yahanakana miyo jengo nari tempu inarayela miyo nari tempu inasimela miyo, nari tempu inakana miyo jodja pwi nari muwari mwa tempu inakana miyo ndala.

¹³ Miyo nnowanda irana jengo jatene muwari mwa wenno unadilimbiha.

¹⁴ Masiki eno, nyo mohosakanya pama mudikamihedaga tempu yasegedeya miyo.

¹⁵ Nnga mwemo nyo akuda Filipo mwaiziwele nyo, voroma vene vawenda miyo dilaleyaga Muselu Wapama, ora yavennye miyo porovinsiya ya Masedoniya, kanilivo nikuru nimohi niwa na atu omuroromela Yesu nadikamihedile na yengo ili yatene ira mabasa olaleya kadowege sogolro ahali nyo.

¹⁶ Masiki dagali Tesalonika, nyo mohowanda rumiha jengo jodikamiheda fendo mbinli dene.

¹⁷ Kannalrembela eno ira mudivahegeve jengo, hehi. So nnafuna murelihiweve zela misapo dapama nnavaha nyo.

¹⁸ Miyo dihimala watchela wa nyo jatene janvahedile nyo mulombwana Epaforoditu ira adivahe. Muwari mwa jengo jile jodihalela jatene danna miyo jihimala, kadinna yodihalela eto dihalana jengo pwi. Jovaha jenyu jili nnga yovelela yonukela pama, nnga mukuto ofwanela, oziveliwiwa vamentoni va Mulugu.

¹⁹ Mulugu waga unouvahanimo rayela wohokala wa masika unna liye ira mukayena jatene jofuneya muwari mwa Yesu Kiristu.

²⁰ Mulugu Baba wehu atitimihiwe kala no kala. Ame!

Mazu ogomiheda olanya

²¹ Mwaditchelutchele atu atene otchenihiwa, anno anafwanyeya muwari mwa Yesu Kiristu. Eto zela abalaga atene kali eva na miyo, na aliwene anoulondjelani.

²² Masiki atu atene otchenihiwa a uno, na aliwene anoulondjelani. Eto asimbwile kokomeza jolondjela ba atu a vande va Sezare.

²³ Sayi da Nabwiya Yesu Kiristu dikale na nyo mmirimani mwenyu. Ame! Kukala mazu a karta nalrembiwele atu omuroromela Yesu a Filipo.