Filipo 2 - Mazu Otchena a Mulungu

Inafwanela atu omuroromela Yesu kasazihege viyeviha wa Yesu Kiristu

¹ Mwaona ira munalimbiheya mwa Kiristu eto muwari moziveliwiwa na Kiristu, muhupwaseya eto muhukana Munemba Otchena unawendana nyo eto muhukana ziveliwa para afwinyu eto munafuna aliwa kaone upama,

² inafwanela nyo nnga mukalele nyo, mukayena zelru dimohive, mukayena zivelana umohive, mukale owandanene eto mukayena mirima dimohive. Inafwanela muirena jatene ejo ira dagavwile makalelo anaira nyo, hagalala waga uwande kala hagalala okwakwanela.

³ Kamuiregena yengo ili yatene yotatamula gaweya eto kamuiregena jovitukulela. Mbwenye inafwanela mukale oviyeviha, kada mutu amuonege nfwaye nnga mundimuwa omukwaranya liye.

⁴ Inafwanela eto kada mutu ahakukumuwelege jayeve bahi. Inafwanela eto awande kukumuwela ja nfwaye.

⁵ Inafwanela zelru denyu dikale nnga zelru danna Yesu Kiristu.

⁶ Zelru danna liye, masiki liye agannave makalelo a Mulugu, kasakile kala sawasawa na Mulugu, nari.

⁷ Liye owanda viyeviha, liye sakanya ira ahakale yengo, sanduwa kana makalelo a namalaba, baliwa na makalelo nnga anabaliwa atu.

⁸ Agabaliwe na makalelo nnga anabaliwa atu, liye oviyeviha akoka, muwari monvwelela Mulugu liye fiyeda mwezo okwa eto ukwa uwa wagali komeliwa vamuradini.

⁹ Nona Mulugu ohomutitimiha valukulu, anvahaga nzina neno nnakwaranya mazina matene ira

¹⁰ nibodo nili natene nnafwanyeya zulu nari ilambo ya vati nari vati va ilambo ya vati kavwa nzina na Yesu, kakokorele nzina neno,

¹¹ eto nlumi nili natene nize niwonge ira Yesu Kiristu gu Nabwiya. Jatene ejo jinalaba ira Mulugu Baba atitimihiwe.

Jomoneya ja mwilamboni

¹² Nona nyo afwaga nnauziveliwani miyo, inafwanela na nyenne munvwelelegeve Mulugu nnga mweretcha nyo tempu yali miyo na nyo. Eto tempu ila yahali miyo na nyo, muwendegeve na makalelo ofwanelela zela vulusiwa wenyu na makalelo oova eto na makalelo ongurumela.

¹³ Tchoira Mulugu unalaba muwari mwa nyo ira muwandege funa vamohi no laba jofuna jaye.

¹⁴ Muwari mwa jatene jene jinaira nyo, inafwanela muiregena vahali ng'ong'oha eto mwahanna kangana

¹⁵ ira muwande kala atu ohokana imanya, atu apama, ana Mulugu ohokana yotega mwawendaga muwari mwa nlogo nogomba, noviringana. Mwaira eno, mwawendaga munokala nnga jomoneya mwilamboni ya vati vamentoni va atu ogombale.

¹⁶ Moneya uwa, ku tapulela laleya mazu onvaha mutu ingumi. Mwairana eno, siku nnafuna za Kiristu nafiya, miyo nnowanda ziveliwa mwasiwa kaditamangele vasayi eto kadilabele vasayi.

¹⁷ Masiki ingumi yaga imale, ikutuliwe nnga yovelela ya jong'wa vazulu va mukuto unavelela nyo muwari mwa nroromelo nenyu, nnowanda ziveliwa eto nnowanda hagalala vamohi na nyo.

¹⁸ Inafwanela na nyenne muwande ziveliwa eto muwande hagalala vamohi na miyo.

Yofuna ya Pawulo yoaruma atu ira kadowe kaapande aFilipo

¹⁹ Miyo dihikana yodediha ira Nabwiya Yesu afuna, dimurume Timoteyo ira aze wa nyo tchineneva, aupandeni ira aza adiwandelamo zela makalelo aufwanyileni liye, na miyene diwande limbiheya.

²⁰ Inafunela miyo muruma Timoteyo tchoira uli miyo uno, kadinna mutu mmohiwa unafuna za ukukumuwelani na mmirimani mwaye mwatene nnga liye.

²¹ Mwasiwa afwaye atene dinna miyo uno, kinavenda jofuna ja Yesu Kiristu, so anavenda jofuna jewa bahi.

²² Mbwenye nyo muhumala iziwa ira Timoteyo gu mutu wa makalelo ofwanela eto muhuiziwa ira liye unalabetcha vamohi na miyo mabasa olaleya Muselu Wapama nnga mwana unalaba liye vamohi na babaye.

²³ Nona tcheniyo inafunela miyo muruma tchineneva ira aze wa nyo. Mbwenye dahanamurume, nnafuna dione makalelo bavi anafuna gomela mulandu waga uno.

²⁴ Miyo eto nnomunyindela Nabwiya ira tchineneva nnoza difiye wewo damwinnya.

²⁵ Miyo eto dihionamo ira ili yofuneya muruma mbalaga Epaforoditu wenno mwamurumile nyo ira aze adikamihede makatamiho danna miyo. Liye eto unalaba mabasa amohive analaba miyo eto unawana kondo imohive inawana miyo.

²⁶ Nnafuna dimurume mwasiwa liye eni unousauwelani. Vamohive vevo liye unoukukumuwelani mwasiwa liye ohovwa ira nyo munokukumuwela urenda anna liye.

²⁷ Na ibaribari liye afwanyeya agali murenda eto afuna kwa. Mulugu mbwenye ohomuwendela tangaranga eto kamuwendenle ekave. Mulugu eto odiwendela tangaranga na miyene. Tchoira ahakwe, miyo eto dogokana kukumuwa valukulu.

²⁸ Nona miyo eto dili okozeyene ira dimurume ira mwamuona azaga, nyo muwande hagalala eto na miyene divume.

²⁹ Inafwanela mmuwatchele mohagalala nnga nfwinyu wa muUmweneni mmohive mwa Nabwiya. Mwaarihedege eto atu atene okala ha liye.

³⁰ Tchoira nfwihu Epaforoditu afuna kwela zela laba mabasa a Kiristu. Voira nyo mwatene kamuwandile za dikamiheda miyo, liye ovelela ingumi yaye muwari mozana jejile jamurumilena nyo ira aze adivahe.