Filipo 1 - Mazu Otchena a Mulungu

Malondjelo a Pawulo

¹ Unalremba gu miyo Pawulo vamohi na Timoteyo, nili azari a Yesu Kiristu. Nnoulrembelani nyo mwatene muli atu otchenihiwa, muli atu anafwanyeya muwari mwa Yesu Kiristu, munafwanyeya sidadi ya Filipo vamohi na mabixpu na adiyankoni anakala wewo.

² Malondjelo anaurumihedani hiyo ba ala. Nifunne ira sayi na murendele okumela wa Mulugu Babihu na Nabwiya Yesu Kiristu, jatene ejo jikale na nyo.

Yolobela ya Pawulo

³ Vanagarati miyo duumbuwelagani nyo, so inadizela ku mutamalela Mulugu.

⁴ Tempu ili yatene inaulobelelani miyo, nnoulobelelani muwari mohagalala

⁵ mwasiwa kuma siku noroma niromile nyo vwa Muselu Wapama fiyeda peno va, nyo munalaba mabasa olaleya Muselu Wapama vamohi na miyo.

⁶ Miyo eto dihikana ibaribari ira siku nnafuna za Yesu Kiristu, Mulugu wenno uromile laba mabasa apama muwari mwa nyo, unoza akwakwanelihede mabasaye siku neno.

⁷ Ili yofwanela duumbuweleni eno mwasiwa miyo nnouziveliwani valukulu mmirimani mwaga tchoira dahanakale mukadeya, ora yawendawenda miyo na mabasa oaoniheda atu ibaribari zela Muselu Wapama, daarunihaga ale karuniha, muwari mwa sayi da Mulugu, na nyenne eto mwalabave mabasa amohive dalaba miyo. Eto ora ila ili miyo mukadeya eni, munalabave nnga mabasa amohive anna miyo.

⁸ Mulugu gunadihidedela umboni zela usauwelani no uziveliwani unna miyo okumela wa Yesu Kiristu.

⁹ Miyo nnoulobelelani ira zivelana wenyu udowegeve sogolro, ku wonga muwandege zivelana muwari mwa zelru eto moonelramo.

¹⁰ Miyo nnalobela eno ira mwagaiziwile eto mwagairilena japama, siku nnafuna za Kiristu nafiya, siku neno mufwanyeye mwagali apamene, mwahanna imanya,

¹¹ mwagavahile misapo dapama muwari mwa kopolo da Yesu Kiristu. Evale unafuna teteliwa eto unafuna tamaleliwa gu Mulugu.

Mazu a Mulugu anadowa sogolro masiki muwari mwa makatamiho

¹² Miyo nnafuna nyo abalaga muiziwe ira hindiwa waga, miyo kalaga mukadeya, jatene jidiireyele jilabile ira Muselu Wapama adowegeve sogolro.

¹³ Tchoira eni agwarda a palasiyo vamohi na atu atene a uno kohomala iziwa ira dili mukadeya na mwasa wa Kiristu.

¹⁴ Eto abalihu oindjiva a uno, kagadionne ira dili mukadeya eni, koholimbiheya ira kamuroromelegeve Nabwiya. Malambwala, muwari molimbihiwa, analaleya mazu mohokayikela, mohoova hiyaniha na makalelo kanna atu wanle.

^15-16 Na ibaribari uli miyo uno kohokalawo makuru menli a atu anamulaleya Kiristu. Amohiwa anamulaleya Kiristu na mmirimani mwewa mwatene. Analaleya muwari modiziveliwa, muwari moiziwa ira miyo dili mukadeya na mwasa owonga ibaribari zela Muselu Wapama. Mbwenye kohokalawo amohiwa anamulaleya Kiristu muwari mokalelana nrima, muwari mofuna tatamula gaweya.

¹⁷ Aliwa mbwenye kinalaleya na mmirimani mwewa mwatene. So anamulaleya Kiristu muwari mofuna vioneyiheda eto mofuna wendjeda zuzuma waga mukadeya munafwanyeya miyo.

¹⁸ Kodi inafwanela dikukumuwe zela ejo? Nari. Akala atu anamulaleya Kiristu mofuna muziveliwiha Mulugu, akala anamulaleya movioneyiheda, miyo nnahagalala mwasiwa Kiristu unolaleyiwa mwa ibaribari. Eto miyo nnerege hagalala.

Yofuna ya Pawulo ali mutamalela Mulugu muwari mwa jatene

¹⁹ Tchoira miyo dihiiziwa ira jeji jinaireya, jinagomela dizelana vulumuwa waga na mwasa odilobelela wenyu eto na mwasa okamihediwa na Munemba wa Yesu Kiristu.

²⁰ Miyo ilukuluwa inafunetchetcha miyo, yodediha ilukulu inna miyo, ili ira dahakayena manyazo. So mbwenye nnafuna dilabe mabasaga na mmirimani mwaga mwatene ira Kiristu ateteliwe muwari mwa joira jaga. Masiki dikwe, masiki dikalewo, nnafuna Kiristu ateteliwe muwari mo kalawo waga.

²¹ Tchoira miyo ona waga, dakalawo, nnafuna dikalelewo ira Kiristu ateteliwe. Dakwa, dihidjavo kwaranya.

²² Ingumi yaga idowagave sogolro, nneregeve vaha misapo dapama. Eto inafuna miyo sakulra, akala dikalewove, owu hehi dikwe, kannawanda ona pama pama inafuna miyo sakulra.

²³ Jatene jofuneyave. Mbwenye sakulra waga wafuna ukale ira miyo didowe dakale na Kiristu, tchoira para miyo, kala na Kiristu tchapama kwaranya.

²⁴ Mbwenye inafuneya ira dikalewove na ingumi ya maningo ira diwandege ulimbihani.

²⁵ Muwari mokana ibaribari yoira dihikanave mabasa mwilamboni ya vati, dihiiziwa ira miyo nnohalave mwilamboni muno ira diwandege ulimbihani muwari mwa ibaribari yenno inahara hiyo eto hagalala wenyu udowege sogolro muibaribarini mwemo.

²⁶ Eto miyo nnafuna dikaleve na nyo ira mwadiona dizaga wa nyo akoka, muwande mutamalela Yesu Kiristu.

²⁷ So inafwanela muwendege na makalelo ofwanela zela Muselu Wapama wa Kiristu ira tempu inafuna miyo za duoneni owu masiki kadizile, divwege miselu dokumela wa nyo ira nyo muli olimbene movwanana eto munawenda na mirima dimohive, muzuzumelaga vamohi ira atu karoromele Muselu Wapama.

²⁸ Miyo eto inafwanela divwege ira nyo kamunakukumuwa zela yengo ili yatene inera ale anauidani. Kauonani ira kamunakukumuwa zela uidani unera atu ule, tchoira yenno tchi ionihedo ira anoza katolowe mbwenye nyo gunafuna vulusiwa muwari mwa kopolo da Mulugu.

²⁹ Tchoira Mulugu mwa sayi daye uuvahileni ira mmuroromele Kiristu eto uuvahileni ira muharahariwe na mwasa wa Kiristu ira Kiristu ateteliwe muwari mwa nyo.

³⁰ Harahariwa uwa unazela muwari mwa nyo wanaga kondo imohive yadionana nyo miyo eto inadivwelana nyo tchineneva.