Filemoni 1 - Mazu Otchena a Mulungu

Malondjelo a Pawulo

¹ Unalremba gu miyo Pawulo, munyakadeya na mwasa olaleya mazu a Yesu Kiristu. Eto nnalremba vamohi na mbalihu Timoteyo. Nnoulrembela weyo Filemoni, mbalihu nnamuziveliwa hiyo eto wenno unalaba mabasa amohive na hiyo.

² Eto nnoulrembela weyo murongolihu Afiya na weyo mbalihu Arkipu wenno unawana kondo imohive yenno inawana hiyo. Eto nnoalrembela nikuru na atu omuroromela Yesu anagumana vande va weyo Filemoni.

³ Malondjelo anaurumihedani hiyo ba ala. Nifunne ira sayi na murendele okumela wa Mulugu Babihu na Nabwiya Yesu Kiristu, jatene ejo jikale na nyo.

Lobela wa Pawulo

⁴ Miyo dalobelaga, dauumbuwela weyo Filemoni, nnomutamaleletcha Mulugu waga na mwasa wa we.

⁵ Tchoira dihimala vwa zela nroromelo ninna we umuroromelaga Nabwiya Yesu eto makalelo unaaziveliwa we atu atene otchenihiwa.

⁶ Miyo eto nnalobela ira uwendegeve na nroromelo kwaranya neno ninna we. Tchoira muwari mowendave na nroromelo ninna we, tchi tempu inafuna we mariha onelramo jatene japama jinna hiyo mokala muwari mwa Kiristu.

⁷ Tchoira miyo, mbalaga dihimala vwa makalelo anaazivela we atu otchenihiwa, waalimbihaga mmirimani mwewa. Dagavwile ejo, na miyene dihiwanda hagalala no pwaseya.

Vepa wa Pawulo

^8-9 Miyo Pawulo, nnafwanyeya dagali munyakadeya na mwasa wa Yesu Kiristu eto dagalive oulula, masiki dagalive mundimuwa ovahiwa utongi ofwanela uruma yenno ili yofwanela irana, mbwenye na mwasa ouzivela nnauvepa.

¹⁰ Nnauvepa ira umuwatchele mwanaga Onezimo wenno dimbanle miyo dagali mukadeya.

¹¹ Malambo a mundulrimu mulombwana Onezimo kaulabelave yengo yooneya. Peno mbwenye liye gu mutu okana mabasa ooneya pama para weyo eto para miyo.

¹² Miyo dimurumaga mulombwana Onezimo ira awelele wa we, ili nnga nnamuruma murima waga.

¹³ Dogoziveliwa nnga Onezimo akale na miyo ira alabege mabasa vamohi na miyo ora ili miyo munyakadeya na mwasa olaleya Muselu Wapama. Liye erege dikamiheda vamalroni vawo.

¹⁴ Miyo mbwenye dafuna nnga we udikamihede muwari mwa Onezimo mofuna mwawo muwari mwa upama wawo hiya Onezimo adikamihedege we wahaiziwile.

¹⁵ Ira mulombwana Onezimo akume wa we muwari mwa malambo mangasi mangasi, afwase ali ira vasogolro weyo uwande mukana akoka kala no kala

¹⁶ agali mbalihu oziveliwiwa, hiya mukana agali muzari bahi. Miyo nnomuziveliwa pama pama eto na wenne unomuziveliwa kwaranya, tchoira unomuziveliwa zela ja ilambo ya vati eto unomuziveliwa zela muwari mwa Nabwiya.

¹⁷ Nona akala we unadiona nnga dili nfwawo olaba mabasa amohive a Nabwiya, miyo nnouvepa ira wamuona azaga, umuwatchele nnga unadiwatchela miyo.

¹⁸ Akala malambo a mundulrimu liye ohoupudja, akala liye ukana mangawa ali matene na weyo, nnouvepa ira wahamukose liye. So udikose miyo.

¹⁹ Miyo dagali Pawulo nnolremba mazwala na ndanda naga ni. Unafuna pagalri mangawa anna liye gu miyo vano. We eto kudiwale mangawa unna we na miyo, moira aulaleyile makalelo ovulusiwa ali miyo.

²⁰ Pu mwemo mbalaga. Muwari moira nili vamohi muwari mwa Nabwiya, miyo nnafuna uirena iwongile miyo. Uirena ira dagavwile, dilimbiheye muwari mwa Kiristu.

²¹ Dalrembaga eni, dihimala iziwa ira inawonga miyo, na ibaribari weyo unoirana eto dihiiziwa ira unomuwatchela Onezimo na makalelo kwaranya nnga muwongele miyo.

²² Vamohive vevo miyo dafuna udisakanyele kwartu yogonamo. Tchoira muwari modilobelela unadilobelela we ira dize uli we wo, miyo dihikana yoing'anela ira vasogolro Mulugu unorumela yovepa yawo.

Mazu ogomiheda

²³ Epafaraji wenno unafwanyeya vamohi na miyo mukadeya na mwasa omulaleya Yesu Kiristu, unoulondjela.

²⁴ Eto Markuji, Aristarku, Demaji na Lukaji, anno anafwanyeya kagali afwaga analaba vamohi na miyo uno, na aliwene anoulondjela.

²⁵ Sayi da Nabwiya Yesu Kiristu dikale na nyo mmirimani mwenyu. Kukala mazu a karta nalrembiwele Filemoni.