Ezodu 8 - Mazu Otchena a Mulungu

Ntembelrelro nanembinli: Mulugu ohoziha anyapule

¹ Noira enne Yehova ohomuwandela mulombwana Mozeji, liye ira: <<Udowe wamuwandele mwene Farawu ira: <Yehova unawonga ira: <<Waahiye atwaga ira kaditamalele.

² Mbwenye weyo waakondiha dowa, miyo nnononga ilambo yawo na anyapule.

³ Muhindje Nilu unozala anyapule. Anyapule ale anerege kuma mwiko kaze kafiye mmba mwawo, kwartuni wawo unagona we, ante anerege fiya vakamani vawo. Eto anerege dowa mmavande mwa anamalabawo atene, na atwawo atene eto anerege fiya muhofuni munawotcha nyo pawu na mmabasiyani munakandetcha nyo tirigu.

⁴ Anyapule ayo anafuna kauzele weyo na atwawo na anamalabawo atene.>> > >>

⁵ Yehova ohowongagave na Mozeji eraga: <<Umuwandele Arawu, avenyihe muwono waye agahidedile ikumbuzo mmandani mwaye, atonyena mihindje datene, dindimuwa na ding'ining'ini na mahindje a mmatiyani ira anyapule katavuwe, kagaweye mwilamboni mwatene mwa Ijipitu!>>

⁶ Evale Arawu ohovenyiha muwono waye, liye tonya mihindje datene da Ijipitu. Mwa enne anyapule kohotavuwa mmihindjeni mwatene, aliwa zala mwilamboni mwatene mwa Ijipitu.

⁷ Evale ang'anga okwima a Ijipitu kohoirana jimohive jejile muwari mwa masenga ewa. Na aliwene kohaziha anyapule ewa ilambo ya Ijipitu.

⁸ Evale mwene Farawu ohomuitaniha Mozeji na Arawu, liye awandela kwi: <<Munvepe Yehova ira aakumihemo anyapule ala mwa miyo na atwaga. Era eno miyo nnoahiya atwaye ira kadowege kamukutele Yehova mikuto.>>

⁹ Evale Mozeji ohonfukaga mwene Farawu ira: <<Tabo, miyo nnodowa danvepe Yehova ira aakumihemo anyapule ala mwa nyo na anamalabinyu vamohi na atwinyu na mmavande mwenyu, so kahale muhindje Nilu bahi. Nnga nyo mufunne ira dulobeleleni alini?>>

¹⁰ Evale mwene Farawu ohomuwakulaga mulombwana Mozeji ira: <<Jejo jikale metchelo.>> Mozeji ohomuwandelaga mwene Farawu ira: <<Ikale nnga mwemo muwongele nyo. Jaireya eno, nyo munoiziwa ira kaliwo Mulugu mmohiwa olingana na Yehova Mulugu wehu.

¹¹ Anyapule anokumamo mwa nyo na anamalabinyu vamohi na atwinyu atene. So mbwenye anafuna kahale muhindje Nilu bahi.>>

¹² Noira eno, mulombwana Mozeji na Arawu kohokumagavo vamentoni va mwene Farawu, aliwa dowaga. Kagadowile, mulombwana Mozeji ohonvepaga Yehova ira aakumihemo anyapule ale nnga mwapanganne liye na Farawu.

¹³ Evale Yehova ohoirana nnga mwemo mwavepele Mozeji. Noira enne, anyapule atene kafwanyeya mmamba, vatando na mmindani kohokwa atene.

¹⁴ Evale kohagudela kamba kamba eto ilambo yatene ya Ijipitu yohoroma nuka nrimba nabure.

¹⁵ Evale Farawu agaonne ira: <<Ibure ya anyapule ihivira>>, ohoummihave murimaye. Nnga mwemo mwawongele Yehova, Farawu kafunile vwa yowonga ya Mozeji na Arawu.

Ntembelrelro naneraru: Mulugu ohoziha tumbo

¹⁶ Evale Yehova ohomuwandela Mozeji ira: <<Wamuwandele Arawu wire: <Utukule ikumbuzwawo, ububudena vati ira tumbulru natene na Ijipitu nisanduwe nikale tumbo.> >>

¹⁷ Evale kohoirana. Arawu ohovenyiha muwono waye, aganna ikumbuzo mmandani mwaye, liye bubudana teya vati. Evale tumbulru natene mwilamboni mwa Ijipitu nohosanduwa kala tumbo. Mwa enne atu vamohi na jifuwo kohoroma kana tumbo.

¹⁸ Ang'anga okwima ale na aliwene kohoxixa saziha jimohive jejile muwari mwa masenga ewa ira kasakanye tumbo, mbwenye kofiyeda imwanana. Eto tumbo dile dohokalave mwa atu vamohi na jifuwo.

¹⁹ Mwa enne ang'anga okwima ale vaimwananne atu, komuwandela Farawu ira: <<Yotikiniha yenna inaireya muwari mwa ibuno ya kopolo da Mulugu.>> Mbwenye Farawu murimaye afwanyeyave oummene. Nnga mwemo mwawongele Yehova, Farawu kafunile vwa yowonga ya Mozeji na Arawu.

Ntembelrelro nanennayi: Mulugu ohoziha pondolre

²⁰ Yehova ohomuwandela mulombwana Mozeji ira: <<Metchelo na mabebehene uvenye udowe wagumane na mwene Farawu tempu inadowa liye muhindje Nilu. Wamuwandele ira: <Yehova unawonga ira: <<Waahiye atwaga kadowege ira kaditamalele.

²¹ Mbwenye weyo waakondiha atwaga dowa, miyo nnorumiha pondolre dohokala da masika wa weyo vamohi na anamalabawo vamohi na atwawo atene na mmba mwawo, mmba mwa anamalabawo eto na mmba mwa aIjipitu atenene munomala zala pondolre. Eto masiki teya ili yatene vinanyingalege atu vinerege zala pondolre ve.

²² Mbwenye siku niwa nafiya, miyo nnogwada ilambo ya Gozeni wewo unakala atwaga ira wahafwanyeye pondolre. Nnoirana eno ira weyo uwande iziwa ira miyo Yehova nnafwanyeya ilambo yenna.

²³ Miyo nnoahiyanihavo atwaga na atwawo. Ionihedo yenna inoireya metchelo.>> > >>

²⁴ Mwa enne Yehova ohoirana na ibaribari. Dohoza pondolre didjindji ilambo ya Ijipitu romana mmba mwa Farawu na mmba mwa anamalabaye vamohi na ilambo yatene ya Ijipitu. Mwa enne atu a ilambo ya Ijipitu kohosanyeya na mwasa wa pondolre dile.

²⁵ Evale Farawu ohomuitaniha Mozeji na Arawu, liye ira: <<Dowani mwamukutele mukuto Mulugu wenyu. Mbwenye muirena mwilamboni muno, kamukumemo!>>

²⁶ Mozeji mbwenye ohomuwakulaga mwene Farawu eraga: <<Kavali wandeya ira hiyo nnokuta mikuto dihu ilambo yenna ya Ijipitu. Mwasiwa mikuto nnafuna hiyo nimukutelege Yehova Mulugu wehu nnokala yengo yotakaletchetcha vamentoni va aIjipitu. Mwa eno, hiyo nera nivelele mikuto dedo nnafwanyeya dagali yengo yotakaletchetcha vamentoni vewa, aliwa anagomela nipa na mabwe.

²⁷ Mbwenye inafwanela niwende ulrendo wa malambo mararu ira nidowe muisalesaleni, namukutele Yehova Mulugu wehu nnga mufunele liye.>>

²⁸ Evale Farawu ohowonga, liye ira: <<Miyo nnouhiyani ira mudowe muisalesaleni, mwavelele mikuto wa Yehova Mulugu wenyu. So mbwenye kamudowe olapela wene. Eto nnavepa ira mudilobelele.>>

²⁹ Evale Mozeji ohomuwakulaga ira: <<Miyo dakumaga eva, nnodowa danvepe Yehova ira akumihemo pondolre di. Metchelo pondolre di nnokumamo mwa nyo eto mwa anamalabinyu na mwa atwinyu. So mbwenye malringana mwahawelela ninyenga akoka, mwaakondiha aIzarayeli ira kahadowe kavelele mikuto wa Yehova.>>

³⁰ Evale Mozeji ohovenyagavo vamentoni va Farawu vale, liye dowa nvepa Yehova.

³¹ Eto Yehova ohoirana nnga mwemo mwanvepele mulombwana Mozeji. Pondolre dile dohokuma mwa Farawu vamohi na anamalabaye vamohi na atwaye atene. Nne pondolre imohi tchahanlemo.

³² Farawu mbwenye ohoummihave murimaye mwakoka mwene nnga verile liye. Kaahiyile aIzarayeli ira kadowege.