Ezodu 4 - Mazu Otchena a Mulungu

Mulugu ohonvaha Mozeji kopolo doirana jionihedo

¹ Evale Mozeji ohowakula ira: <<So mbwenye dafiya wewule, aIzarayeli kiza kadiroromela eto kiza kavwa yowonga yaga. So aliwa kadivwa, anodiwakula ira: <Yehova kautwanyuwele.> >>

² Yehova ohonfukaga Mozeji ira: <<Inna we mmandani mwawo tchi nni?>> Mozeji ohowakula, liye ira: <<Dinna miyo ila ikumbuzo.>>

³ Yehova kwi: <<Katatilela vati vo.>> Agatatilele vati, ikumbuzo ile yohosanduwaga kala nyowa. Evale Mozeji ohoroma tawa nyowele.

⁴ Evale Yehova ohomuruma Mozeji ira: <<Katapula muwono wawo uhinde mwilani wo.>> Agahindile mwilani ule, nyowele yohosanduwaga kala ikumbuzo akoka.

⁵ Noira eno, Yehova ohowonga eraga: <<Iyo tchi ionihedo yoroma ira aIzarayeli karumele ira uutwanyuwele gu miyo Yehova, Mulugu wa makolo ewa, Mulugu wa Abarahamu, Mulugu wa Izaki, Mulugu wa Jako.>>

⁶ Yehova ohowonga akoka ira: <<Uvolotchihe ndanda nawo mukamizani, uhinde vamirimani vawo vo.>> Mozeji agavolotchihile, agahindile vamirimani vaye, agakumihilevo, ndanda nne nohokana maranya, kala notchena nnga ntondje.

⁷ Noira eno, Mulugu ohoira: <<Kawelihedavo ndanda nawo vamirimani vawo.>> Mozeji agawelihedilevo, vofuna kumiha, akumihile ndanda nne nagali nnga mwakalele maningo aye matene.

⁸ Evale Mulugu ohowonga, liye ira: <<Wafiya wewo, aIzarayeli kahafune jouroromela eto kahafune rumela ionihedo yenno yoroma, kaona yanembinli anororomela.

⁹ Mbwenye wafiya, waona kahawandaga roromela kagaonne jionihedo mbinli jo, eto kahavwe yowonga yawo, urunge mahindje a muhindje Nilu, utatilele vati voumma. Mahindje anafuna we tatilela vati ale, anosanduwa, kakale sangiri vati voumma vale.>>

¹⁰ Noira eno, Mozeji ohomuwakula Yehova eraga: <<Ii, Nabwiya! Miyo kannawanda wonga pama roma wanle pakana penova varomile nyo wonga na miyo namalaba wenyu. Dilive mutu oguguma, kannawanda wonga pama.>>

¹¹ Mbwenye Yehova ohomuwakulaga Mozeji eraga: <<Kodi usakanyile milomo da mutu bani? Bani umusakanyile mutu ohowonga, mutu ohovwa, mutu oona, nari ohoona? Kahi miyo Yehova?

¹² Nona kavenya udowe, tchoira miyo nnoukamiheda wonga, eto nnerege ufundjiha inafunege we wonga.>>

¹³ Mbwenye Mozeji ohowakulaga, liye ira: <<Ii, bwiyeni! Musakulreni mutu mmohiwene unanfuna nyo ira asogolrelre mabasayo, hiya miyo.>>

¹⁴ Evale Yehova ohotakaleliwa na makalelo ohokala a masika zela Mozeji, liye ira: <<Kodi Arawu wa nlogo na Levi ule, kahi mbalawo? Miyo dihiiziwa ira liye unowanda wonga pama. Liye eni unaza ira agumane na weyo. Liye auona unoziveliwa valukulu.

¹⁵ Eto weyo unerege kumiha mazu umuwandelege Arawu ira awongege vamalroni vawo. Miyo nnosogolrelra mulomo wawo na mulomo waye eto nnoufundjihani ambinlene yengo munafunege nyo ira.

¹⁶ Liye unerege dowana jowonga jawo vamentoni va aIzarayeli. Liye unerege wonga mazu awo eto weyo unokala nnga ha miyo Mulugu vamentoni vaye.

¹⁷ Wadowaga, udowena eto ikumbuzo inafwanyeya mmandani mwawo iyo. Mwa ikumbuzo iyo unerege irana jionihedo.>>

Mozeji ohowelela Ijipitu akoka

¹⁸ Noira eno, Mozeji ohowelelaga wa moyaye Jetero. Agafiyile wa moyaye ule, ohonvepa eraga: <<Miyo dera diwelele mundulri, daaone abalaga muIjipitu akala na vano kaliwo angumive.>> Moyaye Jetero ohomurumeliha eraga: <<Kadowa mwa murendele.>>

¹⁹ Mozeji ahanagundeye ilambo ya Midiyani ira adowege Ijipitu, Yehova ohowonga na Mozeji akoka eraga: <<Atu atene anne kafuna upa, kohomala kwawo. Nona tchiye uwelele Ijipitu.>>

²⁰ Evale Mozeji ovenya, liye mutukula muhiyanaye na ahimaye anno kafwanyeya kagali anapongwe, agweliha vaburuni, aliwa dowaga ilambo ya Ijipitu. Kagundeyaga, Mozeji ohotukula mmandani mwaye ikumbuzo yenne yamurumile Mulugu ira atukule.

²¹ Yehova ohomuwandela Mozeji, liye kwi: <<Wafiya Ijipitu, udowe wamuonihe Farawu jotikiniha jatene duvahile miyo ira uiregena. Mbwenye miyo nnovandiha murima wa Farawu ira aharumele ira aIzarayeli kadowege.

²² Yaireya eno, wamuwandele Farawu wire: <Yehova unawonga ira: <<Miyo dihinkana mwanaga oroma unafwanyeya agali aIzarayeli.

²³ Nnouwandela ira umuhiye mwanaga adowege, aditamalele. Mbwenye weyo wamukondiha mwanaga dowa, bahi eto, nnompa mwanawo murandji baliwa.>> > >>

²⁴ Fwanyeya ira mulombwana Mozeji vamohi na muhiyanaye kagali muulrendoni mwewa kadowaga Ijipitu, aliwa kagaimenle nimburo nimohi eni ira kagone, Yehova ohozaga ira ampe mulombwana Mozeji.

²⁵ Evale muhiyanaye Zipora ohovenyaga liye tukula nibwe noirwa, liye muinelana mwanaye tembe nnakala sogolro wa yano ya ilombwana, liye tukula yenne yamugwadilege liye mwanaye ule amuinelaga, liye sakwinyana manyalo a Mozeji, liye ira: <<Weyo uli mamunaga wa sangiri!>>

²⁶ Muhiyanole awongele mazu anne na mwasa omuinela mwanaye ule. Mwa enne Yehova ohomuhiya Mozeji kampile.

²⁷ Yehova ohowonga na Arawu eraga: <<Kavenya udowe isalesaleni ira wagumane na Mozeji.>> Evale Arawu ogundeya, liye nfwanya Mozeji Mwangoni wa Mulugu. Evale Arawu ohomulondjela Mozeji, anvahaga beju.

²⁸ Mozeji ohomuwandela mazu matene amulanyedile Yehova ira awongege. Ohomuwandelamo eto jionihedo ejo jamurumile Yehova ira airegena.

²⁹ Evale Mozeji na Arawu kovenya, aliwa dowa Ijipitu. Kagafiyile, kohagumanihaga andimuwa atene a Ana Izarayeli.

³⁰ Kagamanle gumana, Arawu ohawandela mazu matene Yehova amulanyedile liye Mozeji. Nomala eno, Arawu ohooniha jionihedo vamentoni va aIzarayeli.

³¹ Nomala eno, Ana Izarayeli kohororomelaga mazu a Arawu. Aliwa kohomutamalela Yehova, kaoramihedaga kove diwa vati mwasiwa kohovwa ira: <<Yehova uhuupandani eto umala ona goyi dinna nyo.>>