Ezodu 3 - Mazu Otchena a Mulungu

Mulugu ohomuitana Mozeji muwari mwa nikupu nohinda munlo

¹ Tempu yenno, Mozeji adjiha jifuwo ja moyaye Jetero, namakuta wa ilambo ya Midiyani. Siku nimohi, agatukunle jifuwo jile, ohowendana fiyeda mavirelo wa nzuwa wa isalesale, ante liye fiya Orebi wewo uli mwango wa Mulugu.

² Mwa enne Mungelro wa Yehova ohomutwanyuwela Mozeji muwari mwa nlumi na munlo vanikupuni. Mozeji ule againg'anne, ohoona nikupu nihindaga munlo, mbwenye nikupu niwa kanajaga.

³ Evale Mozeji ohoumbuwelaga eraga: <<Matikiniho nni anaireya eva? Nikupu hindaga munlo eto nikupu niwa kannaja. Nnafuna dikwivelevo ira daonetchetche pama.>>

⁴ Yehova Mulugu agaonne ira Mozeji unakwivela vanikupuni vale, ohomuitanaga vari va nikupu, liye ira: <<Mozeji, Mozeji!>> Liye rumela eraga: <<Miyo vano.>>

⁵ Evale Mulugu ohomuwongana eraga: <<Kufiyewo uno. Wungula xineli dawo, mwasiwa nimburo nili we ni, totchena.>>

⁶ Ohowongagave eraga: <<Miyo dili Mulugu wa makolo awo, Mulugu wa Abarahamu, Mulugu wa Izaki, eto Mulugu wa Jako.>> Mozeji agavwile eno, ohotawiha kovaye, aovaga ira unamuone Mulugu.

⁷ Evale Yehova ohowongagave eraga: <<Mwa ibaribari, dihiona goyi inna atwaga aIzarayeli mwilamboni mwa Ijipitu. Dihivwa nla wewa na mwasa olabihiwa na aIjipitu. Dihiiziwa ira aliwa annana zuzumihiwa.

⁸ Nona, miyo dihitita ira daavunele atwaga anafwanyeya mmandani mwa aIjipitu, daakumihemo mwilamboni mule, daadowena ilambo yapama na ilukulu wewo uli mukaka na nuwi pwi pwi, ilambo yenno unafwanyeya akuda Kana, aEti, aAmore, aFerizi, aEvi na aJebuzi.

⁹ Tchoira nla wa Ana Izarayeli uhufiya wa miyo. Na miyene dihiona tabutchiwa wewa zela aIjipitu jinaairela atu.

¹⁰ Eni miyo nnouruma weyo ira udowe wa Farawu, waakumihemo atwaga Ana Izarayeli muIjipitu muli atu.>>

¹¹ Evale Mozeji ohomuwakula Mulugu eraga: <<Miyo dili ani ira didowe wa Farawu, daakumihemo Ana Izarayeli muIjipitu?>>

¹² Mulugu ohomuwakula liye ira: <<Miyo nnokala na weyo. Eto ionihedo inafuna miyo uvaha yooniha ira miyo guurumile, tchi ila: Waakumihamo atwaga muIjipitu, munoza muditamalele miyo Mulugu vamwangoni vili hiyo va.>>

¹³ Evale Mozeji ohomuwakulaga Mulugu eraga: <<Davira, dafiya Ijipitu, daafwanya Ana Izarayeli, dera: <Mulugu wa makolo enyu gudirumile wa nyo>, nnga aIzarayeli kadifuka, kera: <Uurumile, nzina naye bani?>, nnga miyo dire bani?>>

¹⁴ Mulugu ohomuwakulaga Mozeji liye ira: <<MIYO DILI, WENNO DILI. Wadowa, waawandele Ana Izarayeli were: <Udirumile wa nyo gu MIYO DILI.> >>

¹⁵ Mulugu ohowongave na Mozeji liye ira: <<Wadowa, waawandele Ana Izarayeli, were: <Yehova wenno unafwanyeya agali Mulugu wa makolo enyu, Mulugu wa Abarahamu, Mulugu wa Izaki na Mulugu wa Jako gudirumile za wa nyo.> Tchoira nzina neno ti nzina naga nohomala. Eto ti nzina nnafuna miyo umbuweliwagana na atu anabaliwelegemo musogolro.

¹⁶ We tchiye. Wafiya waagumanihe andimuwa andimuwa a Izarayeli. Waawandele were: <Yehova, Mulugu wa makolo enyu, Mulugu wa Abarahamu, Mulugu wa Izaki na Mulugu wa Jako guditwanyuwele, liye kwi waawandele ira: <<Miyo dihimala upandani eto dihimala ona jatene jinaireliwa nyo muIjipitu.

¹⁷ Nona, dihilumbela ira duukumihenimo muIjipitu mwemo munatabutchiwa nyo, dudowenani ilambo yenno unafwanyeya akuda Kana, aEti, aAmore, aFerizi, aEvi na aJebuzi, wewo uli mukaka na nuwi pwi pwi.>> > >>

¹⁸ Mulugu ohowongagave eraga: <<Wadowa Ijipitu, andimuwa a aIzarayeli anovwa yowonga yawo. Era eno weyo na andimuwa andimuwa a aIzarayeli, muvenye mudowe wa mwene Farawu, mwawonge muire: <Yehova, Mulugu wa hiyo aEberewu gunitwanyuwenle. Nona nnavepa ira munihiye nidowe nawende ulrendo wa malambo mararu ira nifiye muisalesaleni, namukutele mikuto Yehova Mulugu wehu.> >>

¹⁹ <<Mbwenye dihiiziwa ira wadowa, wawonga eno, Farawu kanarumela ira aIzarayeli kavenyemo mwilamboni mwaye. Ira liye arumele, miyo nnomutonga na ndanda naga na kopolo.

²⁰ Na mwasa ohofuna uhiyani, nnoza ditapule muwono naga, daazuzumihe aIjipitu muwari mwa matikiniho aga matene anafuna miyo irana vari vewa. Muwari motongiwa na kopolo, pa evo vanafuna Farawu auhiyeni ira mudowege.

²¹ <<Miyo nnafuna disakanye ira aIjipitu kaufweweleni murima nyo aIzarayeli ira karumele inafuna nyo vepa. Nyo mwakumagamo mwilamboni mwa Ijipitu mule, kamunadowa eno, mwahatukunleve yengo, nari.

²² Tchoira kada muhiyana unerege dowa anfwanyege muhiyana nfwaye muIjipitu wenno umuwandamenlena liye nari mulendo uli vande vaye ira anvepege fwaramento dosakanyiwa na parata nari dosakanyiwa na oru vamohi na jowara jejo jinafunege nyo awariha ahiminyu a ahiyana nari a alombwana. Ayo ba makalelo munafuna nyo awaka aIjipitu jorayela jiwa.>>