Ezodu 22 - Mazu Otchena a Mulungu

Malamulo zela mutu aba yengo ya mwinnya nari adimeliha ya mwinnya

¹ Yehova ohomuwandelagave mulombwana Mozeji ira: <<Mutu aba ng'ombe nari nibila adowa apa nari aguliha, kada ng'ombe ibile liye, awelihe ng'ombe tanu eto kada nibila nibile liye, awelihe mabila mannayi.

² Mbava afwanyiwa agudjulaga mmba mwa mwinnya na mahiyu, abubudiwa ante afiyeda kwa, maliba mbubuda kanakana mulandu zela vuviha sangiri naye.

³ Mbwenye akala anfwanyile mbava ule na ntana, ambubuda afiyeda kwa, mutu wenno umpile unokana mulandu wa sangiri na nfwaye. <<Mbava uli watene inafwanela apagalri zela jatene jene jibile liye. Mbwenye ahakayena yengo ira apagalri, atukuliwe mwinnyiwene, agulihiwe akale muzari ira awande weliha zela jatene jibile liye jile.

⁴ Yengo ili yatene inabe mutu, podi kala ng'ombe nari buru nari nibila, afwanyeyana mwanainyamole agaliwove, mbava ule unaweliha jengo mbinli zela kada yengo ibile liye.

⁵ <<Mutu adjiha jifuwo jaye mmundani mwa nfwaye muli jodja owu hehi uva owu ahiya jifuwo jile jidowa jalupela mmundani mwa nfwaye, jidjamo jengo jinafwanyeya emule, maliba jifuwo jile unokumiha japama japama ja mmindani mwaye, jimohive nnga jejo jidjile atu, anvahe nfwaye.

⁶ <<Mutu ahindiha munlo, era eno, munlole abanda kokola alupela mmundani mwa nfwaye, atumeya kamba ya nfwaye nari jengo jali jahanahandiwe eto masiki jengo jili jahanabalihe, liye unopagalri jengo jatene jene jimanle ja mmundani mule.

⁷ <<Mutu atukula kobiri nari jengo jimohi jiwa anvaha nfwaye ira akoye, evale mbava adowa aba jengo jile, mbavole ahindiwa inafwanela awelihe jengo mbinli zela kada yengo ibile liye.

⁸ Mbwenye mutu ubile jengo jile ahaoneye, inafwanela maliba koya ule adowe vamentoni va anamatonga ira afukiwe pama pama akala utukunlevo gu liyene.

⁹ <<Nkani uli watene odjelrana, podi kala ng'ombe, nari buru, nari nibila nari kapa nari yengo imohiwene idimenle, mutu mmohi eraga: <Yengwela tchaga> eto nfwaye akondagana, makani anno inafwanela kadowiwena wa anamatonga. Kadowana wa anamatongale, mutu wenne anamatonga anamugwihena atu mulandu, liye unompagalri nfwaye jengo mbinli zela kada yengo yafuna liye mudjelra nfwaye.

¹⁰ <<Mutu mmohi atukula yengo adowa amukoyiha nfwaye masiki ikale buru, nari ng'ombe nari nibila nari mwanainyama imohiwene eto mwanainyama ule akwa eka nari arangala, nari atukuliwa na amadjuba wahali mboni uonile jiireyaga,

¹¹ mutu wenne akoyile alumbele vamentoni va Yehova ira: <Uirilena kahi miyo.> Evale mwinnyole arumele yolumbela ya nfwaye. Jaireya enne nfwaye ule kanapagalri zela yenno idimenle.

¹² Mbwenye mwanainyama ule aira biwa na mbava, maliba koyihiwa ule unompagalri mwinnya wa jengo jile.

¹³ Eto mwanainyama ule apiwa na anavinyama afwaye a mukokolani, mutule atukula maningo kahanle, adowa amutonyiheda mwinnya, era eno, kanapagalri zela yenno idimenle.

¹⁴ <<Mutu aboliha mwanainyama wa nfwaye, mwanainyama ule arangala owu hehi akwa mwinnya ule ahalivo, maliba boliha ule unompagalri mwinnyole.

¹⁵ Mbwenye mwinnya akala evo, liye kanapagalri. Akala liye ambolihile na kobiri, yopagalri yaye inakala kobiri yenno yavwananne atu zela boliha bahi.

Malamulo zela miselu dohiyana-hiyana

¹⁶ <<Mutu amunyenga namwali uli ahanagone na mulombwana eto uli ahanatomelriwe, amugonana, inafwanela apagalri pete, amutukule ira akale muhiyanaye.

¹⁷ Mbwenye babaye akonda na ntindi muteliha mwanaye ule, muzombole unompagalri babaye ule kobiri yolingana na pete inapagalri mutu ira amutele namwali uli ahanagone na mulombwana.

¹⁸ <<Kammuhiye muhiyana uli watene unalowa akalewo, so apiwe.

¹⁹ <<Mutu wenne unamugonihe mwanainyama, apiwe.

²⁰ <<Mutu wenne unavelele mukuto wa amilugu amohiwa ahali miyo Yehova, mutuyo atolotchiwe.

²¹ <<Kamwaasakanyege na makalelo abure atu oza, nne kamwaaonihege goyi. Tchoira na nyenne mwali atu oza ilambo ya Ijipitu.

²² <<Kammusakanyege na makalelo abure makwele uli watene wa muhiyana, nne mwanapawi.

²³ Mwasiwa nyo mwaasakanya na makalelo abure, aliwa kadivepa miyo muwari monla, miyo nnovwa nla wewa.

²⁴ Mwa eno, nnotakaleliwa na makalelo ohokala a masika, nnoupani nyo mwatenene na supada kondoni. Daupani, ahiyaninyu anokala amakwele eto ahiminyu anokala anapawi.

²⁵ <<Wamboliha kobiri mutu osimela unafwanyeya muwari mwa atwaga, kumukose ira auwelihede mowendjedeya nnga jinaireya na anamabolihiha kobiri amohiwa.

²⁶ Eto mutu aupinyolriha kapa yeye, masiki liye ahanawelihe kobiri ibolihile liye, inafwanela udowe wanvahede kapa ile unde wahanadibe.

²⁷ Tchoira kapa ile tcheniyo imohive inavikunelana liye. Weyo wagoniha waninyu kapaye ile, mahiyu anne liye kanawanda gona, mwasiwa kanakana yovikunelana. Mwa eno, liye anla wa miyo, nnovwa, mwasiwa miyo dili wa tangaranga.

²⁸ <<Kumululuvihe Mulugu nne kwaatembelrelrege asogolrelri a atwinyu.

²⁹ <<Kamudibeliwegena zana jovelela ja johanda ja mmundani mwenyu nari ja uva wenyu. Eto mudivahege ahiminyu atene a anapongwe oroma baliwa.

³⁰ Eto musakanyege yengo imohive zela ahima oroma reliwa a ng'ombe dinyu na mabila enyu. Inyama ya mulombwana yareliwa, mubabihege ihiya malambo matanu na menli yagali na mmaye. Mbwenye siku nanetanu na taru mudivahe miyo.

³¹ <<Nyo muli atwaga otchenihiwa. Na mwasa wenno nnouwandelani ira kamudjege anavinyama opiwa na anavinyama afwiwa a mukokolani. Mbwenye mwaatatilelege anambwa.>>