Ezodu 13 - Mazu Otchena a Mulungu

Joroma baliwa jinafwanyeya jagali ja Mulugu

¹ Yehova ohowongaga na Mozeji eraga:

² <<Mwaavelelege ahiminyu arandji baliwa wa miyo. Yengo yatene yoroma baliwa yagali ya mulombwana, inafwanela muiziwe ira inakala yaga, masiki atu nari anavinyama.>>

Zela pwando ya pawu dohosakanyiwana leverina

³ Noira eno, Mozeji ohodowa awandela Ana Izarayeli eraga: <<Inafwanela muumbuwelege siku na peno. Peno ti siku nikumile nyo ilambo ya Ijipitu, muuzarini mwafwanyeya nyo. Yehova uhuwanda ukumihanimo mwilamboni mwali nyo mule na ndanda naye na kopolo. Yaka datene, nafiya siku nnga na peno, kamudjege yengo yoheliwa leverina.

⁴ Peno, mwedi oroma ula wa Abibi, ti siku munakuma nyo ilambo ya Ijipitu.

⁵ Yehova unoufiyihani ilambo ya akuda Kana, aEti, aAmore, aEvi na ilambo ya aJebuzi, ilambo yenno ulumbenle liye na makolo enyu ira auvaheni, inafwanyeya yagali ilambo inna mukaka na nuwi pwi pwi. Mwafiya ilambo yenno, inafwanela yaka datene afiya mwedi wenna, musakanyege pwando na makalelo ala:

⁶ Muwari mwa malambo matanu na menli, mudjege pawu dohosakanyiwana leverina. Eto nakwakwanaga siku nanetanu na mbinli, neno nnafwanyeya nagali siku nogomiheda, musakanyege pwando yomutamalela Yehova.

⁷ Muwari mwa malambo matanu na menli ale, mudjege pawu dohosakanyiwana leverina. Eto mwilamboni mwenyu mwatene kamufwanyeyege yengo yosakanyiwa na leverina eto nne leverina kafwanyeyegemo.

⁸ Siku neno nafiya, inafwanela mwaawandelege ahiminyu ira: <Nnairela eni muwari momuumbuwela Yehova zela japama janiirele liye nikumaga ilambo ya Ijipitu.>

⁹ Sakanya pwando yenno inaza ikale nnga ionihedo, kalaga nnga yengo inamangelela nyo mmandani mwenyu owu vakoveni venyu, yuuwumbutchedagani ira muwongege malamulo a Yehova. Mwasiwa Yehova ohowanda uvenyihani mwilamboni mwa Ijipitu na ndanda naye na kopolo.

¹⁰ Nona kada yaka inazege, nafiya siku neni, inafwanela mukwakwanelihedege mangano matene anna.

¹¹ <<Yehova aufiyihani ilambo ya Kana, yenno ilumbenle liye avaha ababinyu vamohi na nyo,

¹² inafwanela mwaavelelege wa Yehova anapongwe enyu atene arandji baliwa. Eto yatene yoroma reliwa ya jifuwo jenyu jatene, yagali ya mulombwana, inakala ya Yehova.

¹³ Mbwenye akala murandji reliwa wa buru, mwahafune mpuzeya, inafwanela mmuwombolege na mwana nibila. Mwahamuwombole, inafwanela mmukotole nikohi. Mbwenye zela atu, mwanapongwe uli watene oroma baliwa mmuwombolege.

¹⁴ Vasogolro munayege nyo, ahiminyu kaufukani ira: <Kodi mwasiwa gwa nni nyo iragana eni?>, inafwanela mwaawakulege ira: <Hiyo nnairela eni mwasiwa Yehova gwaniwombonle na ndanda naye na kopolo muIjipitu, muuzarini mwafwanyeya hiyo.

¹⁵ Tchoira Farawu ohoroma limba, kafunne nihiya hiyo ira nidowege. Evale Yehova ohaapa arandji baliwa atene a Ijipitu, roma ahima atene a alombwana arandji baliwa vamohi na anavinyama atene arandji reliwa. Nona hiyo velelaga jifuwo jehu ja alombwana joroma reliwa mosakanya mukuto wa Yehova. Eto arandji baliwa a ahimihu, nnaawombola na kobiri.

¹⁶ Nona awombola arandji baliwa unokala nnga ionihedo, kalaga nnga yengo inamangelela hiyo mmandani mwihu owu vakoveni vehu ira nahadiwale ira Yehova na ndanda naye na kopolo gwaniwombonle mwilamboni mwa Ijipitu.> >>

Makalelo Mulugu aasogolrelra liye aIzarayeli kagakumile muIjipitu

¹⁷ Mwene Farawu agaarumelihile aIzarayeli ira kakumemo mwilamboni mwa Ijipitu mule ira kadowege, Mulugu kaasogolrenlre ira kavire ndila yenno yavira ilambo ya aFilistewu, masiki yalive ndila yokwivela. Tchoira Mulugu ohoumbuwela ira: <<Atwala dera daavirihe ndila ya vakwikwi, anerege wopopihiwa na kondo. Era eno anerege umbuwela zelru dowelela mundulri ira kadowege Ijipitu wakoka wene.>>

¹⁸ Na mwasa wenno Mulugu ohaviriha ndila yotitikuwa ya muisalesaleni, pandi yenno wafwanyeya Bara Yofila. Ana Izarayeli eto kadowaga, kadowile ovisakanyedene nnga atu kadowaga kondoni.

¹⁹ Kakumaga mwilamboni mule, Mozeji ohotukulaga makuva a Joze, mwasiwa Joze ahanakwe ohalumbeliha Ana Izarayeli eraga: <<Mwa ibaribari Mulugu unoza aukamihedeni ira muvenyemo muIjipitu muno. Nnauvepani ira mwadowaga, makuvaga munahiye.>>

²⁰ Evale Ana Izarayeli kagakumile ilambo ya Sukoti, kohodowa manga misasa diwa ilambo ya Etamu, wandamelana muisalesaleni.

²¹ Na ntana, Yehova aasogolrelra Ana Izarayeli muwari mwa murambo oimela nnga nimbozo. Wadowa murambole, Ana Izarayeli kadowa wewo. Eto na mahiyu, Yehova aasogolrelra na munlo oimela nnga nimbozo ira kawandege wenda muulrendoni mwewa ntana na mahiyu.

²² Murambo oimela nnga nimbozo aoneya na ntana ule vamohi na munlo oimela nnga nimbozo aoneya na mahiyu ule, kajaahiyileve Ana Izarayeli.