Ezodu 11 - Mazu Otchena a Mulungu

Mulugu ohomuwandela Mozeji ira amuwandele Farawu zela ntembelrelro nogomiheda.

¹ Yehova ohowonga na Mozeji ira: <<Nikalawo ntembelrelro nimohi nogomiheda nnafuna miyo muirela mwene Farawu na aIjipitu afwaye. Ntembelrelro neno nagaireyile, liye unouhiyani ira mukume mwilamboni mwaye. Eto uhiyani uwa, unakala moutamangihani.

² Inafwanela tchineneva udowe waawandele aIzarayeli ira mulombwana uli watene na muhiyana uli watene anfwanyege muIjipitu wenno umuwandamanilena liye, anvepege jengo josakanyiwa na parata nari na oru.>>

³ Mwa eno, Yehova ohosakanya ira aIjipitu kaafwewele murima Ana Izarayeli. Eto Mozeji ali mulombwana orihediwa ilambo ya Ijipitu, vamentoni va anamalaba a mwene Farawu vamohi na atu atene.

⁴ Evale Mozeji ohowonga na Farawu eraga: <<Yehova unawonga ira: <Miyo nnovira vari va mahiyu muIjipitu mwatene mwene,

⁵ daape arandji baliwa atene a aIjipitu. Roma mwana murandji wa Farawu mwene wa Ijipitu wenno unagarati vampandoni va umwene, nari mwana murandji wa muzari unatchila vantchiloni nari vinyama datene dirandji baliwa, jatene ejo jinoza jikwe.

⁶ Mwilamboni mwatene mwa Ijipitu munoza muvweye kuto dilukulu. Kuto edo kannababihege kalawo eto dedo davira, kadiza welela vweya kuto nnga dedo.

⁷ Mbwenye wa Ana Izarayeli unoza ufwanyeye omiyala wene. Nne wa aIzarayeli kuza ufwanyeya mwanambwa amuuwaga mutu nari mwanambwa ouwa jifuwo jiwa. Jeji jinafuna jiireye eno ira uwande iziwa ira miyo Yehova nnoahiyaniha aIjipitu na aIzarayeli.> >>

⁸ Mozeji ohomuwandelaga mwene Farawu ira: <<Jaireya eno, anamalabawo anoza wa miyo, kaze kadikokorele, kanigunyaga, keraga: <Mudowege nyo vamohi na atwinyu atene anauharani.> Era eno, miyo nnovenyamo mwilamboni muno.>> Evale Mozeji ohokumaga vali Farawu notakaleliwa wohokala wa masika.

⁹ Mwa eno, Yehova ohomuwandelagave mulombwana Mozeji eraga: <<Eni mwene Farawu kaza auvwelelani. Eto muwari mohofuna uvwelelani, ili ira miyo diwande indjiviha matikiniho aga ilambo ya Ijipitu.>>

¹⁰ Mozeji na Arawu kohoirana matikiniho matene vamentoni va Farawu. Mbwenye Yehova ohomuummiha mwene Farawu murima. Liye kaahiyile Ana Izarayeli ira kakumemo mwilamboni mwaye.