Ezodu 10 - Mazu Otchena a Mulungu

Ntembelrelro nanetanu na taru: Mulugu ohorumiha miserebo

¹ Yehova ohomuwandela Mozeji eraga: <<Uvenye, udowe wawonge na Farawu na anamalabaye. Wadowa, aliwa kinavwa wonga wawo mwasiwa dihimala ummiha mirima diwa. Nnerela ira diwendjedeve jionihedo jaga ji,

² ira vasogolro weyo uwandege awandela ahimawo na azuliyo makalelo daayevihile miyo aIjipitu na jionihedo jaira miyo ira wewo na ahimawo a musogolro muiziwe ira miyo dili Yehova.>>

³ Mulombwana Mozeji na mbalaye Arawu kohovenya, aliwa dowa wa mwene Farawu. Kagafiyile, kohomuwandela ira: <<Yehova Mulugu wa aEberewu unawonga ira: <Kodi unaza uhiye alini vitukulela wawo vamentoni vaga? Waahiye atwaga ira kadowe kaditamalele!

⁴ Mbwenye weyo wakonda yengo yenno iwongile miyo, metchelo nnoziha miserebo mwilamboni mwawo mwatene.

⁵ Teya yatene ya mwilamboni mwawo kinaoneyege. Mwasiwa miserebo nnafuna miyo ruma ira dize mwilamboni mwawo nnozala ilambo yawo yatene ya Ijipitu. Eto miserebo doindjiva dedo nnafuna miyo rumiha nnerege dja jengo jejo jihanle muzongwe wa maralaza agavirile. Eto miserebo dile nnodja mitengo datene dili mwilamboni mwawo.

⁶ Miserebo nnafuna miyo rumiha nnozala mmba mwawo, na mmba mwa anamalabawo vamohi na mmba mwa aIjipitu atene. Jatene jene jinafuna ireya, jinakala jengo jokwaranya jejo makolo atene awo kaonile atu kuma ora yaromile atu kala mwilamboni muno.> >> Evale mulombwana Mozeji ohovenya, akumaga vamentoni va Farawu.

⁷ Mwa enne anamalaba a Farawu kohomuwongagana Farawu ira: <<Kodi munafuna mmuhiye mulombwanole ira anizihedegeve makatamiho fiyeda alini? Kodi nyo kamunaona ira ilambo ya Ijipitu ihimala nongeya? Kaahiyeni Ana Izarayeli kadowege ira kamutamalele Yehova Mulugu wewa!>>

⁸ Mwa enne Mozeji vamohi na Arawu kohodowiwagana wa mwene Farawu. Kagafiyile, mwenole ohawandelaga eraga: <<Nyo podi dowa mutamalela Yehova Mulugu wenyu. Mbwenye muwari modowa, miyo nnafuna diiziwe atu bavi anafuna dowa.>>

⁹ Evale mulombwana Mozeji ohomuwakulaga mwene ule eraga: <<Nadowaga nnodowa atenene, roma azombwe ehu vamohi na andimuwihu, ahimihu a alombwana vamohi na a ahiyana, mabila ehu, mbuzi dihu na ng'ombe dihu. Mwasiwa inafuneya nidowe namutamalele Yehova wehu muwari mosakanya pwando.>>

¹⁰ Evale mwene Farawu ohawakulaga eraga: <<Miyo dihiiziwa joumbuwela jenyu mwasiwa dihiiziwa ira dauhiyani mudowa, muhukana yengo yabure inafuna nyo irana. Mbwenye muza mudivwa diwongaga ira dowagani vamohi na ahiminyu, muiziwe ira Yehova uli na nyo.

¹¹ Akala nyo munafuna ira mudowe, muvenye alombwana ve, mudowe mwamutamalele Yehova tchoira tcheniyo inavepa nyo.>> Noira enne, mwene Farawu ohomutamangihaga Mozeji na Arawu vamentoni vaye.

¹² Evale Yehova ohowonga na Mozeji ira: <<Utapule ndanda nawo utonye ilambo yatene ya Ijipitu ira dize miserebo, dimarihemo jomela jatene jili mwilamboni jihiyile muzongwe wa maralaza.>>

¹³ Mwa tempu yenne Mozeji ohovenyiha ikumbuzo yaye, liye tonya ilambo yatene ya Ijipitu. Evale Yehova ohowombiha nipevo nokumela makumelo wa nzuwa, roma mabebehi, fiyeda ntana, ante mahiyu, fiyeda mmetcheloni muwa. Unde utchaga dohoneya miserebo dazile na nipevo nne.

¹⁴ Miserebo dile dohomala zala ilambo yatene ya Ijipitu pwi pwi, aliwa fwanyeyaga mwatene mwene. Fwanyeya ira malambo a mundulri kadaoneyile miserebo pwi nnga edo dazile eto kadiza dioneya miserebo nnga edo.

¹⁵ Unde wa Ijipitu wohodiba na mwasa oindjiva wa miserebo dile. Evale dohotakuna jalo jatene na jovaha jatene na mitengo jahiyile muzongwe wa maralaza. Mmindani kamwahanleve yengo ititi, nne mitengo nne yomela ili yatene kajafwanyeyamo mwilamboni mwatene mwa Ijipitu.

¹⁶ Mwene Farawu ohaitanihaga Mozeji na Arawu mobaranya aawandelaga eraga: <<Miyo dihimutegela Yehova Mulugu wenyu vamohi na nyo.

¹⁷ Miyo nnauvepani ira muwande kurumuwela jotega jaga so fendo imohi ila bahi. Eto dafuna mudowe mwanvepe Yehova Mulugu wenyu ira awande kumihamo miserebo dowopiha nnafwanyeyana miyo di.>>

¹⁸ Evale Mozeji ohovenyagavo vamentoni va mwene Farawu vale, liye dowa nvepa Yehova ira akumihemo miserebo dile.

¹⁹ Evale Yehova ohowombihaga nipevo nlukulu na kopolo nokumela mavirelo wa nzuwa. Nipevo nne nohoungusulragamo miserebo datene, dowa tatilela Bara Yofila. Nipevo nne nagavirile muIjipitu mule, nne muserebo mmohi kahanlemo.

²⁰ Mbwenye Yehova ohoummihave murima wa Farawu. Liye kaahiyile Ana Izarayeli ira kadowege.

Ntembelrelro nanetanu na nnayi: Isi indimuwa

²¹ Evale Yehova ohowonga na Mozeji ira: <<Uvenyihede ndanda nawo zulu. Era eno miyo nnoziha isi indimuwa mwilamboni yatene ya Ijipitu ira atu kambambelege jengo.>>

²² Evale Mozeji ohovenyiheda ndanda naye zulu. Mwa enne yohoza isi indimuwa, mala dibiha mwilamboni mwatene mwa Ijipitu fiyeda malambo mararu.

²³ Mwa malambo anne, tchaonana mutu na nfwaye. Kalivo mutu awanda venya vali liye fiyeda malambo mararu. Mbwenye wali Ana Izarayeli wokalave moneya.

²⁴ Evale mwene Farawu ohomuitanaga mulombwana Mozeji amuwandelaga eraga: <<Muvenye, mudowe mwamutamalele Yehova. Mwadowaga, mwaatukule ahiminyu. So mbwenye mabila, mbuzi, na ng'ombe jatene jejo jinohala, kamunadowana!>>

²⁵ Mozeji mbwenye ohomuwakulaga mwene Farawu eraga: <<Kavali jowandeya. Inafwanela munirumelihe ira nidowena mikuto dehu na jovelela jehu jinafuna hiyo tumeya ira namutamalele Yehova Mulugu wehu.

²⁶ Eto hiyo nahanafiye wewule, kaniiziwile mwanainyama guvi nnafuna hiyo mukutela Yehova Mulugu wehu. Nona hiyo nnotukula jifuwo jihu jatene, nne ifuwo imohi kinahala mwilamboni muno.>>

²⁷ Mbwenye Yehova ohoummihave murima wa Farawu. Kaarumelihileve ira aIzarayeli kadowege.

²⁸ Evale Farawu ohowonga na Mozeji ira: <<Uvenyevo vali miyo va. Kuwelele za diona miyo akoka. Wawelela diona akoka, siku nimohive neno unokwa.>>

²⁹ Evale Mozeji ohowonga ira: <<Uwonga pama. Miyo kadiza duona akoka.>>