Efezo 5 - Mazu Otchena a Mulungu

Mazu amohi zela mawendelo a atu omuroromela Yesu

¹ Inafwanela mukale atu omusaziha Mulugu mwasiwa muli ahimaye anaaziveliwa liye.

² Inafwanela muwendege na makalelo ozivelana nnga eto Kiristu aniziveliwe liye, fiyeda velela ingumi yaye ira hiyo nikale pama. Ovivelela wa Mulugu ira akale yovelela yonukela pama eto ira akale mukuto wa Mulugu.

³ Mbwenye muwari mwa nyo atu otchenihiwa, kakalevo unavenda joraruwa, kakalevo unera jotakala, kakalevo unasilrilra. Tchoira kinafwanela hiyo atu otchenihiwa vweyagana jatene jejo.

⁴ Mwa hiyo eto kakalevo unawonga jotakala nari jengo johokana zelru. Nne kakalevo unafuna ateyiha afwaye muwari mowonga jowonga johokala pama mwasiwa ejo kajifwanenle. Mbwenye inafwanela nimutamalelegena Mulugu zela jengo jinaniirela liye.

⁵ Tchoira inafwanela mukayena ibaribari ira mutu watene unairana joraruwa, nari mutu wenno unairana jotakala, nari mutu wenno unasilrilra, atu anno mbwenye kinna yodediheda ira anoza kavahiwe pandi muUmweneni mwa Kiristu na Mulugu. Ule unasilrilra na ule unatamalela ikwamutu yosema gu mmohive.

⁶ Nyo kamunyengiwe na mazu ohokana sogolro. Tchoira uwali wa Mulugu unaazela atu ohonvwelela na mwasa wa jotakala jinera atu.

⁷ Nona nyo kamuwandane na atu anne.

⁸ Mwasiwa nyo wanle mwali muisini. Peno mbwenye mwa Nabwiya muli muwareyani. Muwendege nnga ahima a muwareyani.

⁹ Misapo dowenda no moneya ku irana jatene japama, jowongowa, ja ibaribari.

¹⁰ Mwagarati mukayegena youmbuwela ira: <<Ira Nabwiya aziveliwe jinera miyo, diirege avi?>>

¹¹ Nyo mwaona atu keragana jengo ja misapo dovunda da muisini, kamuvolowe vamohi na ejo. So inafwanela mwaawandele jabure jejo jinera atu.

¹² Tchoira tchi yengo ya manyazo wonga vatando jengo jabure jinerana atu mokoyeya.

¹³ Mbwenye namuwandela mutu zela ibure inera liye, ili nnga yengo ili yatene yafiya vali moneya, pa evale vanafuna yengwele oneya pama.

¹⁴ Tchoira yengo yenno inakala vevo vinafwanyeya moneya, inosanduwa ira imoneye jengo jimohi jiwa. Nona kawongaga ira: <<Karurumuwa maliba gona we. Uvenye mokwani ira Kiristu aumoneyege.>>

¹⁵ Nona inafwanela muing'ane pama eto mawendelo enyu. Kamuwendege nnga avuruvuru mbwenye mukalege atu owenda na zelru.

¹⁶ Kamumalege tempu vasayi mwasiwa malambwala ba malambo kazanle irana jotakala.

¹⁷ Nona nyo kamukalege avuruvuru, nari. Nyo muiziwege jofuna ja Nabwiya.

¹⁸ Kamulrezelrege na vinyu, tchoira uli lrezelra, irana jotakala uli wewo. Nyo mbwenye inafwanela muzaleliwe Munemba Otchena.

¹⁹ Inafwanela mutukule nyumbo dimohi diwa dohiyana-hiyana domutamalela Nabwiya, mwaalimbihegena afwinyu muwari mowonga mazu a nyumbo dedo eto inafwanela muimbege nyumbo dedo muwari momutamalela Nabwiya na mmirimani mwenyu mwatene

²⁰ eto inafwanela ora ili yatene nimutamalelegena Mulugu Baba zela jatene jinafwanyeyana hiyo movira mwa Nabwiya wehu, Yesu Kiristu,

²¹ eto inafwanela muwari momuriheda Kiristu, kada mutu omuroromela Yesu arumele tongiwa na atu omuroromela Yesu afwaye.

Makalelo a bandja na atu omuroromela Yesu

²² Nyo ahiyana inafwanela murumele tongiwa na amamuninyu nnga munarumela nyo tongiwa na Nabwiya.

²³ Tchoira mulombwana gu muru wa muhiyanaye nnga vire Kiristu na nikuru naye na atu omuroromela. Kiristu gu muru, nikuru naye ba maningo aye. Liye eto gu Nvulusi wehu.

²⁴ Sawasawa nnga hiyo atu omuroromela Yesu nnorumela tongiwa na Kiristu, inafwanela kada muhiyana arumelege tongiwa na mamunaye muwari mwa jatene.

²⁵ Nyo alombwana mwaaziveliwege ahiyaninyu na makalelo nnga Kiristu anizivenle liye hiyo atwaye omuroromela. Yesu ovelela ingumi yaye para hiyo ira

²⁶ anitchenihe monihuwa na mahindje anno anafwanyeya kagali Mazu.

²⁷ Yesu anihuwile ira awande kana atwaye oriya, ohofwanyeyana yodugudela nne makunyari nne jotakala jimohi jiwa. Ali ira hiyo atwaye nikale otchena eto nahafwanyeyegena yoziya.

²⁸ Na makalelo amohive nnga Kiristu unaniziveliwa liye hiyo atwaye omuroromela, inafwanela mulombwana amuzivelege muhiyanaye nnga munaziveliwela liye maningo aye. Ule unamuzivela muhiyanaye unaziveliwa maningo aye.

²⁹ Tchoira kalivo unaida maningo aye. Kada mutu unodja, unosasanyeda maningo aye nnga Kiristu unanidjiha liye hiyo, anisasanyedaga

³⁰ mwasiwa hiyo nili jano ja maningo aye.

³¹ Nona mulombwana unerege muhiya babaye na mmaye ira adowe ambande muhiyanaye, era eno, ambinlene anokala maningo mamohive bahi.

³² Gumana wewo unatonyiheda yengo ilukulu ya ibaribari yohoiziweya burebure. Dawonga ira maningwiwa anakalege mamohive, nnamuwonga Kiristu na nikuru na atu omuroromelaye.

³³ Zela nyo mbwenye, inafwanela kada mulombwana amuzivelege muhiyanaye nnga maningo aye. Eto kada muhiyana inafwanela amurihedege mamunaye.