Efezo 4 - Mazu Otchena a Mulungu

Inafwanela atu omuroromela Yesu kawendege vamohi

¹ Na mwasa wenno, miyo Pawulo dagali munyakadeya na mwasa omuhara Nabwiya nnafuna dukokomezeni ira mutukule mawendelo Nabwiya aniitanele liye ira niiregena.

² Muwendege na makalelo matene oviyeviha, opwaseya na afwinyu. Mukale ovilela na afwinyu. Mukale okurumuwelana muwari mozivelana.

³ Muzuzumelege ira muwandane no wandana okumela wa Munemba Otchena. Tchoira Munemba Otchena unanisogolrelra ira niwendege vamohi na murendele.

⁴ Hiyo atu omuroromela Yesu nili maningo mamohive. Nihikana Munemba mmohive. Mulugu uniitana ira nikayena yoing'anela imohive inadediha hiyo.

⁵ Hiyo atene nihikana Nabwiya mmohive, inaroromela hiyo tchi imohive, batiziwa wehu ku umohive.

⁶ Nihikana eto Mulugu mmohi wenno uli Baba wa jatene. Liye gunatonga jatene, gunafwanyeya mwatene mwene, gunakalihawo jatene.

⁷ Muwari mwa hiyo atu omuroromela Yesu, kada mutu ukana yolemelela Kiristu invahile liye vasayi.

⁸ Kalaga nnga ilrembiwe mMazuni ira: <<Agwelaga zulu ohatukula anamwindji a atu ohindiwa. Kohokalawo atu amohiwa eto aavahile liye jovaha.>>

⁹ Mazu anafwanyeya mMazuni oira: <<Agwelaga zulu.>> ku wonga nni? Mazwale anawonga ira Yesu aromile titela ilambo ya vati.

¹⁰ Agatitile, ohogwela dowaga ilambo ya zulu ante ilambo ya zulu-zulu ira awande mwada matongelo aye mwatene mwene.

¹¹ Ikala Yesu inivahile liye hiyo atu otchenihiwa. Inivahile liye, ba anamarumiwa, anamafiyiheda, anamalaleya, na anamakumbuza onifundjiha mazu

¹² ira muwari mwa atu anne, aliwa kawandege alimbiha atu otchenihiwa ira kalabege mabasa matene a Mulugu. Hiyo atene otchenihiwa nalabaga mabasa a Mulugu, pa evo vanafuna za ulukulihiwa maningo a Kiristu.

¹³ Ulukulihiwa wa maningo a Kiristu ku wonga ira hiyo atene omuroromela Yesu wendaga vamohi movwanana muwari mokana yororomela imohive eto ku wonga ira nnawenda muwari momuiziwa mutu mmohive, wenno unafwanyeya agali Yesu Mwana Mulugu eto ku wonga hiyo atene nnakala vamohi nnga sawa mmohive eka wa vande vaye eto ku wonga zaleliwa makalelo unna Kiristu.

¹⁴ Inafwanela nizaleliwe makalelo a Kiristu ira hiyo nahakaleve ahima eto nahakaleve nnga yengo yondunyiwa na mahindje omanganyeya na nipevo. Ku wonga kannanyengiwege na mafundjihelo ohiyana-hiyana, nari jonyenga jinawonga atu jomudowana mutu ndila dohokala pama.

¹⁵ Hiya nyengiwa na jonama, inafwanela ira kada mutu awonge ibaribari na nfwaye na makalelo ozivelana. Inafwanela niirena eno ira nisanduwe, nitukule makalelo matene a muru wehu Kiristu.

¹⁶ Hiyo nili jano ja maningo a Yesu. Liye ohonivaha mafarafadju onigumaniha hiyo jano vamohi ira niwendege nnga maningo mamohive. Kada yano yalabaga mabasa avahiwe liye, yalabaga na makalelo ozivelana, pa evo vanaza ulukula maningo a Yesu.

Makalelo maxa ofwanela ira atu omuroromela Yesu kawendegena

¹⁷ Peno va, nnafuna duwandeleni, dukokomezeni mwa nzina na Nabwiya ira kamusazihegeve mawendelo a atu ohomuroromela Yesu anno anawenda na joumbuwela jewa johokana mabasa.

¹⁸ Aliwa kinawanda onelramo yengo ili yatene. Na mwasa wa uvuruvuru unna atu eto na mwasa okana mirima dovanda, anawenda olapela wene na ingumi inavaha Mulugu.

¹⁹ Komala limba na jabure jinera atu. Anovivelela irana makalelo matene otakala, gonihana burebure vamohi na joira jimohi jiwa jotakala pwi. Kaona jotakala jatene jinera afwiwa, anosilrilra ira: <<Na hiyene nnga niiregena.>>

²⁰ Nyo mbwenye mumala fundjihiwa ira makalelo a Kiristu kahi eno!

²¹ Tchoira nyo muhumala vwa zela Yesu eto muhumala fundjihiwa mafundjihelo a ibaribari anafwanyeya na liye.

²² Muhufundjihiwa ira muwungule mawendelo enyu a wanle, anno kanongeyile eto anasimbwave nongeya muwari mwa jofuna jinaninyenga ira niiregena jotega.

²³ Mufundjihiwe ira murumele ira Mulugu atchindje joumbuwela jenyu, jikale joumbuwela jixa.

²⁴ Muware eto mawendelo maxa Mulugu apandutchile liye ira nifwalrafwanege na liye, nikayena makalelo apama a ibaribari eto otchena.

²⁵ Nona, kakalevo unafuna munyenga nfwaye. Mbwenye kada mutu awongege ibaribari na nfwaye. Tchoira nili jano ja maningo mamohive.

²⁶ Mwatakaleliwa, kamutegege. Kamuhiye nzuwa vira mwagalive otakaleliwene.

²⁷ Kammuhiye Diyabo kana makalelo ovolowa muwari mwenyu.

²⁸ Wenno abetcha, ahiye umbava waye, adowe alabe mabasa a ibaribari na mandaye ira akayena yengo ira adowe anvahe ule unna makatamiho.

²⁹ Muwari mwa milomo dinyu kamufwanyeyege jowonga joatakaleliwiha atu mbwenye inafwanela muwongege japama ira afwinyu kalimbihiwege. Muwari mwa jowonga jenyu jatene muwongege japama ira ale anavwa kakokomeziwe.

³⁰ Kammukumbanyihe Munemba Otchena wa Mulugu. Tchoira nyo muhudindiwa na Munemba Otchena fiyeda siku nnafuna nyo za womboliwa.

³¹ Nyo mbwenye muhiye makalelo matene onyunya, uwali, kangana, ruwana, luluvihana. Muhiye eto makalelo matene oidana.

³² Kada mutu inafwanela amuirelege nfwaye upama. Kada mutu ankumbanyege nfwaye. Mulevelelanege kada mutu na nfwaye nnga eto Mulugu uulevelenleni liye muwari mwa Yesu Kiristu.