Efezo 3 - Mazu Otchena a Mulungu

Pawulo ohokana mabasa oalaleya atu yengo yokoyeya

¹ Miyo Pawulo na vanove dilive munyakadeya na mwasa omuhara Yesu Kiristu eto na mwasa oulaleyani nyo atu ohokala aJudewu. Na mwasa wa jatene Mulugu juireleni liye-

² Miyo nnaona nnga nyo mumala vwa izo Mulugu idivahile liye ira dulaleyeni.

³ Mulugu udiwandela yengo yokoyeya. Yenguwa tcheniyo ilrembile miyo vang'ono eva.

⁴ Mwaileri mazwala, munofwanyamo ibaribari yenno Mulugu idiwandenle liye zela jengo jokoyeya jafuna Mulugu irana muwari mwa Kiristu.

⁵ Wanle atu tchawandeliwe zela yengo yokoyeya zela Kiristu na makalelo matene nnga tempu ili hiyo ila. Tchoira tempu ili hiyo ila, muwari mwa Munemba Otchena, Mulugu uwanda aiziwiha anamarumiwaye otchenihiwa na anamafiyihedaye otchenihiwa ibaribari yaikoyile liye roma wanle.

⁶ Yengo yokoyeya yali ira muwari morumela Muselu Wapama, atu ohokala aJudewu anokana yoing'anela imohive vamohi na aJudewu eto anokala jano ja maningo mamohive eto anowatchela nipangano nimohive neno nnafwanyeya muwari mwa Yesu Kiristu.

⁷ Mulugu mwa sayi daye, udirumile ira dilaleye Muselu Wapama wenno muwari mwa kopolo daye.

⁸ Miyo dili mutu mung'ining'ini kwaranya atu atene otchenihiwa. Masiki eno Mulugu udivahile sayi ira diwande alaleya atu ohokala aJudewu zela rayela undimuwa wohokala wa masika unafwanyeyana Kiristu.

⁹ Wanle Mulugu, Namapandutcha wa jatene, yofuna yaye yakoyile liye aiziwile eka. Mbwenye malambwala, Mulugu mwa sayi daye, udivaha ira daaonihe atu atene yofuna yenno yakoyile liye.

¹⁰ Yofuna yaye ali ira tempu ili hiyo ila andimuwa na amwene anafwanyeya mamburo a zulu-zulu, kaonege zelru dohiyana-hiyana da Mulugu dimwadeyaga muwari mwa hiyo atu omuroromela Yesu.

¹¹ Mulugu yofuna yaye yanna liye kuma malambo a mukalakala a mundulrimu, okwakwaneliheda muwari mwa Nabwiya wehu Yesu Kiristu.

¹² Muwari mwa hiyo muroromela Yesu, muwari movira mwa liye, hiyo nnowanda fiya vamentoni va Mulugu molimbiha murima.

¹³ Nona miyo nnouvepani ira mwahakukumuwe zela goyi dinna miyo, ineriha goyi dinna miyo nnalaba ira nyo mukale pama.

Lobela wa mulombwana Pawulo

¹⁴ Na mwasa wa jatene Mulugu juireleni liye, miyo dagali Pawulo nnokokora na mabodo aga vamentoni va Baba

¹⁵ wenno uli Baba wa malogo matene a zulu nari malogo matene a ilambo ya vati.

¹⁶ Miyo nnonvepa ira muwari mwa upama undimuwa unna liye, aulimbiheni kopolo muwari mwa Munemba waye Otchena mmirimani mwenyu.

¹⁷ Nnonvepa eto ira muwande sogolrelriwa na Kiristu mmirimani mwenyu muwari mwa nroromelo ira zivelana ugarateye pama pama muwari mwa nyo. Muwari mokana zivelana wohokala wa masika,

¹⁸ tchi tempu inafuna atu atene otchenihiwa kakayena kopolo dowanda onelramo makalelo Kiristu ananizivela liye. Nnanvepa Mulugu ira awande uiziwihani zivela wa Yesu, makalelo arambalalile Yesu moniziveliwa, makalelo alapile Yesu moniziveliwa, makalelo aulukunle Yesu moniziveliwa, makalelo adihile Yesu moniziveliwa,

¹⁹ eto nnolobela ira mukayena ibaribari zela zivela wa Kiristu wewo unakwaranya onelramo wehu ira muwande zaleliwa makalelo anna Mulugu.

^20-21 Mulugu ukana kopolo daye dinalabana liye muwari mwa hiyo. Muwari mwa kopolo daye, liye unowandetchetcha jatene kwaranya nnga jinavepa hiyo, kwaranya eto nnga jinaumbuwela hiyo. Nona hiyo atu omuroromela Yesu inafwanela nimutamalelege Mulugu movira mwa Kiristu matempu matene, kala no kala. Ame!