Efezo 2 - Mazu Otchena a Mulungu

Mulugu univulusa ora yawenda hiyo okwene ira niwande irana jengo japama jinafuna liye

¹ Nyo wanle mwali okwene muwari mwa joviringaniha na jotega

² ejo jawendana nyo, muwendaga ndila ya ilambwela ya vati. Mwamuhara musogolrelri wenno unasogolrelra minemba dabure wenno unaasogolrelra atu ohonvwelela Mulugu.

³ Wanle hiyo atene nawenda na atu anno. Nairanave jengo jaziveliwa hiyo, jofuna ja maningo, hiyo iragana jengo jaumbuwela hiyo oka. Zela baliwa wehu, hiyo nalive ahima ofuna tongiwa na uwali wa Mulugu vamohi na atu atene.

⁴ Mbwenye Mulugu muwari mwa tangaranga dilukulu dinna liye eto muwari moniziveliwa valukulu,

⁵ tempu yawenda hiyo okwene niiragana joviringaniha jehu, liye uwanda nivaha ingumi. Mulugu uhunivaha ingumi ixa anigumanihaga vamohi na Kiristu. Mwa sayi daye muhuvulusiwa.

⁶ Mulugu univenyiha vamohi na Kiristu, nigaratiha vamohi na Kiristu mamburo a zulu-zulu, anigumanihaga vamohi na Yesu Kiristu.

⁷ Mulugu unigumanihile vamohi na Yesu Kiristu ira vasogolro matempu anafuna za, awande nioniha upama waye na sayi daye dohowanda pimeya.

⁸ Tchoira na nyenne muhuvulusiwa muwari mwa sayi da Mulugu eto muwari mwa nroromelo. Muwari movulusiwa mule, kilivo iirile nyo ira Mulugu auvuluseni. Vulusiwa tchi yengo yovahiwa na Mulugu.

⁹ Kunazela joira jehu. Nona kalivo unawanda vitukulela.

¹⁰ Tchoira hiyo nili yengo isasannye liye, nipandutchiwe akoka muwari mwa Yesu Kiristu ira niiregena joira japama jejo Mulugu asakannye liye wanle ira hiyo niiregena.

AJudewu na atu ohokala aJudewu ba amohive muwari mwa Kiristu

¹¹ Nona nyo atu ohobaliwa mwa aJudewu, umbuwelani makalelo mwanna nyo wanle. Mwasiwa nyo wanle mwaitaniwa aluku na atu anne kaineliwe na makalelo a maningo mmandani mwa afwiwa.

¹² Muumbuwele, mwasiwa nyo wanle kamwali vamohi na Kiristu. Mwali eto unde wa mpingo wa Izarayeli. Zela jopangana ja Mulugu na mapangano aye, nyo kamwalimo. Kamwanna yaing'anela nyo. Mwawendave mwilamboni ya vati mwahanna wandana na Mulugu.

¹³ Agali nyo wanle mwali olapela wene na Mulugu, peno mbwenye, muwari mwa sangiri na Kiristu, muwari mogumanihiwa na Yesu Kiristu, Mulugu uwanda uzanani kala na liye.

¹⁴ Tchoira Yesu Mwinnya guwandile niwandaniha hiyo aJudewu na atu ohokala aJudewu, liye gudjulavo ntchihi nali vari ira awande nigumaniha, nikale mpingo mmohive.

¹⁵ Liye ohogudjulavo ntchihi nali vari muwari mogomiha sanganiko na mangano anne kafwanyeya mmalamuloni. Ali ira awande atukula atu ambinli, aagumanihe na liye mwinnya ira ampandutche mutu muxa. Yesu ohosakanyeda murendele ira

¹⁶ hiyo ambinli niwandane na Mulugu vamohi, nikale nningo nixa nimohive monikwela vamuradini, amalihaga idana wanna atu.

¹⁷ Yesu ohoza alaleya atene makalelo owandana na Mulugu nyo atu mwafwanyeya olapela wene na liye vamohi na atu a vakwikwi na liye.

¹⁸ Tchoira mwa Yesu, muwari mwa Munemba mmohive, hiyo aJudewu na nyo atu ohokala aJudewu, atene nnowanda fiya ora ili yatene vamentoni va Baba.

¹⁹ Nona nyo atu ohokala aJudewu kamulive alendo, kamuli amarala. Muli atu a nikuru na Mulugu vamohi na atu atene otchenihiwa eto muli anamurala vande va Mulugu.

²⁰ Inakala nnga manga nyumba ya mabwe. Nibwe nindimuwa na vamwendoni gu Yesu Kiristu. Aliserisi ba anamarumiwa na anamafiyiheda. Nyo atu ohokala aJudewu muli mabwe anamangiwana vazulu va aliserisi.

²¹ Nyumba yatene inalimbihiwa na Yesu. Nyumbiwa innana mangiwave, kalaga Nyumba Yotchenihiwa ya Nabwiya.

²² Nyo atu ohokala aJudewu muwari mogumanihiwa na Yesu munnave mangiwana vamohi na hiyo aJudewu omuroromela Yesu ira nikale nyumba imohive mwemo munakala Mulugu muwari mwa Munemba waye.