Efezo 1 - Mazu Otchena a Mulungu

Malondjelo a Pawulo

¹ Unalremba gu miyo Pawulo, namarumiwa wa Yesu Kiristu mofuna mwa Mulugu. Nnoulrembelani nyo mwatene muli atu otchenihiwa, muli ororomeleya muwari mwa Yesu Kiristu munafwanyeya Efezo.

² Malondjelo anaurumihedani miyo ba ala. Difunne ira sayi na murendele okumela wa Mulugu Babihu na Nabwiya Yesu Kiristu, jatene ejo jikale na nyo.

Upama unna atu omuroromela Yesu muwari mwa Kiristu

³ Otamaleliwa akale Mulugu, Baba wa Nabwiya wehu Yesu Kiristu! Mwasiwa muwari mwa Yesu, Mulugu umala nireliha anivahaga mareliho matene zela minemba dehu. Mareliho anno anafwanyeya ilambo ya zulu.

⁴ Ira nikayena mareliho anno, Mulugu anisakunlre romelave wanle ahanapandutche zulu na ilambo ya vati ira nikale atu otchenihiwa, atu ohokana yotega vamentoni vaye muwari mwa Yesu. Mulugu muwari monizivela,

⁵ anisakunlre wanle ira muwari mwa Yesu Kiristu nibehediwe ira nikale ahimaye. Mulugu anisakunlre mofuna mwaye

⁶ ira nimutitimihege liye zela sayi dilukulu uniirele liye. Fwanyeya ira sayi dedo nnakumela muwari mwa Yesu, wenno Mulugu umuziveliwe liye.

⁷ Muwari mwa Yesu na sangiri naye, nihiwomboliwa. Muwari mowomboliwa, nihileveleliwa joviringaniha jehu. Jatene ejo jinazela mwa sayi dilukulu da Mulugu bahi,

⁸ dedo daniwendenle liye na manda menli, anivahaga zelru datene no onelramo watene,

⁹ aniiziwihaga yofuna yaye yohoiziweya, ku wonga mabasa afuna liye laba muwari mwa Kiristu.

¹⁰ Tchoira wanle Mulugu ohokanamo ira: <<Tempu yakwakwana, miyo nnafuna digumanihe jatene ja zulu masiki ja ilambo ya vati ira jatene mwinnya akale Kiristu.>>

¹¹ Jatene jinaireya, jinaireya muwari mofuna mwa Mulugu. Mulugu muwari mofuna mwaye unisakunle na hiyene aJudewu wanle ira niwande kana rayela zulu muwari mwa Yesu.

¹² Mulugu unisakunlre hiyo aJudewu ira nikale atu oroma muroromela Namatikeliwa ira niwande mutamalela zela undimuwa wohokala wa masika unna liye.

¹³ Na nyenne mwagavwile mazu a ibaribari, Muselu Wapama ouvulusani, nyo momuroromela Yesu. Evale muwari mwa Kiristu, Mulugu ohouvahani Munemba Otchena, audindagani na Munemba nnga mwalumbenle liye.

¹⁴ Munemba Otchena gu ipanda yonivaha ibaribari zela rayela unafuna hiyo vahiwa fiyeda siku nnafuna Mulugu awombola atwaye. Mulugu uniirele eji ira niwande mutamalela zela undimuwa wohokala wa masika unna liye.

¹⁵ Nona miyo dagavwile zela makalelo anamuroromela nyo Nabwiya Yesu eto na makalelo munaaziveliwa nyo atu atene otchenihiwa,

¹⁶ kannahiya mutamalela Mulugu na mwasa wa nyo, duumbuwelagani muwari molobela waga.

¹⁷ Ulobelelani uwa, nnanvepetcha Mulugu wa Nabwiya wehu Yesu Kiristu, Baba wa undimuwa watene ira auvaheni Munemba waye ira mukayena zelru no onelramo ira mumarihe muiziwa Mulugu.

¹⁸ Mmirimani mwenyu muhuroma masuwa zela ja Mulugu. Miyo nnoulobelelani ira muwande iziwa pama pama yoing'anela yenno Mulugu iniitanele liye no rayela wapama wohokala wa masika unafuna nyo za kana vamohi na atu atene otchenihiwa eto muwande iziwa

¹⁹ kopolo dohowanda pimeya da Mulugu dedo nnanikamihedana liye hiyo atu omuroromela. Liye alabilena kopolo dilukulu dedo

²⁰ anvenyihaga Kiristu mokwani ante dowa mugaratiha muwononi waye odjana, nimburo na utongi, ilambo ya zulu.

²¹ Zulu uli liye, utongi ugaratilena liye ukwaranya utongi watene, umwene watene, kopolo datene, matongelo matene. Nzina naye eto ti nzina nokwaranya mazina matene anawongiwa tempu ili hiyo ila nari mazina anaza kawongiwe tempu inafuna za.

²² Mulugu osakanya ira jatene jikale vati va manyalo a Kiristu, jitongiwe na liye. Mulugu eto amuhambihile ira Kiristu akale mwinnya wa jatene eto akale muru wa nikuru na atu omuroromela Yesu.

²³ Hiyo nili maningo aye eto Kiristu unonivaha makalelo matene aye eto mwa hiyo liye unamwada jofuna jaye mwatene mwene.