Eberewu 9 - Mazu Otchena a Mulungu

Makalelo a Musasa wa Yehova wa ilambo ya vati

^1-2 Muwari mwa yopangana yoroma yapanganne Mulugu, dohokalawo sanganiko dozela makalelo omutamalela Mulugu. Ohosakanyiwa Musasa wa Yehova mwilamboni ya vati. Musasole agawiwe pandi mbinli. Sala yoroma yaitaniwa Nimburo Notchena, vevo vakala yogoromeyavo panti na meza vaheliwa pawu dedo datapulela ira Mulugu uli vamohi na atwaye.

³ Mbwenye mutu akwaranya Nimburo Notchena nne afwanya kurtina yanembinli. Konde wa kurtina yanembinli ule ali nimburo naitaniwa Nimburo Notchenetchetcha.

⁴ Muwari mwa Nimburo Notchenetchetcha nne mwafwanyeya mwana basiya notumeyamo jonukela nasakanyiwe na oru eto mofwanyeya Kaxa ya Yopangana ya Nabwiya yasakanyiwe na oru. Eto muwari mwa Kaxa ile mohokala ikumbuzo ya Arawu yenno yapwetile, na mabwe osemiwa a yopangana, na yombwe ya oru mwafwanyeya mana.

⁵ Vazulu va tampa ya Kaxa ya Yopangana ile vohokomeliwa akerubi ambinli a oru kagatapunle mapepeluwa, kagudumeyaga tampa ya Kaxa ya Yopangana ile vevo vali wareya undimuwa wa Mulugu. Mbwenye hiyo muwari molremba karta ni, kahi ira nnafuna nuwandeleni makalelo a jatene.

⁶ Jatene ejo jagamanle sakanyediwa, anamakuta kovolowa malambo matene kwartu yoroma ile, aliwa hindaga mabasa kavahiwe atu na Mulugu.

⁷ Mbwenye avolowa Nimburo Notchenetchetcha akala mundimuwa wa anamakuta bahi. Liye eto avolowa va yaka fendo imohi bahi. Eto avolowaga, kahi ira avolowa ve eno ahatukunle yengo, nari. Avolowaga ovolowana sangiri, liye velela wa Mulugu ira akunele jotega jaye na jotega jaira atu kahaiziwaga ira yenna tchotega.

⁸ Muwari mwa makalelo matene anna, Munemba Otchena unaniwandela ira ja musasa oroma wa ilambo ya vati jilabagave, ndila yovolowa Mamburo Otchenetchetcha a zulu yali yahanahuliwe.

⁹ Jatene eji jali jofwalrafwaniha para tempu ili hiyo ila. Tchoira mwa tempu yenno mabasa kalaba anamakuta kavelelaga jovelela na mikuto, ejo kajawanda sakanyeda mmirimani mwa aliba mutamalela Mulugu ale ira kahakayena yowanganyeda zela vali atu.

¹⁰ Tchoira mabasa kalaba anamakuta malambo anno ali mabasa olaba zela jodja na jong'wa na mahuwelo a jengo na jengo jozela maningo bahi. Eto jatene ja wanle jilabile fiyeda ora yazile makalelo apama okwaranya makalelo a wanle ale.

Yesu unalaba mabasaye ilambo ya zulu

¹¹ Mbwenye tempu ili hiyo ila, Kiristu gu mundimuwa wa anamakuta wenno unasogolrelra jatene japama jizile tchineneva. Liye mbwenye ohovolowa Musasa wa Yehova mundimuwa, okwakwanela, wenno unafwanyeya ilambo ya zulu hiya wenno asakanyiwe na manda a atu unafwanyeya ilambo yopandutchiwa ya vati ila.

¹² Yesu avolowile mamburo otchena fendo imohi bahi. Liye avolowaga, kavolowile na sangiri na mbuzi, nne sangiri na ana ng'ombe, nari. Mbwenye avolowile na sangiri naye. Muwari mwa sangiri naye nne, liye ohowanda kwakwaneliheda ira hiyo nikale owomboliwene kala no kala.

¹³ Muwari mwa makalelo a wanle, muwari movelela mikuto diwa, fwanyeya ira kada mutu aviringaniha mangano, owokeliwa sangiri na mbuzi, na sangiri na ng'ombe ya mulombwana, vamohi na ndora na ng'ombe ya muhiyana yotumeyiwa. Ejo jalaba ira maningo a atu owokeliwa katchenihiwe. Akala sangiri na vinyama nohokana yalaba atu,

¹⁴ na ibaribari sangiri na Kiristu nnolaba kwaranya. Tchoira Kiristu ohowanda vivelela wa Mulugu agali mukuto ohokana yotega muwari mwa kopolo da Munemba Otchena wa Mukalakala. Nona sangiri na Kiristu nnowanda nihuwa mmirimani mwehu ira nahakayena yowanganyeda zela jotega jozana ukwa jaira hiyo mbwenye niwande mulaba Mulugu Okalawo.

¹⁵ Nona pa evo vanawanda Yesu kala namasogolrelra wa Yopangana Ixa vari va Mulugu na atu. Muwari mwa Yesu atu atene oitaniwa anowanda watchela jorayela johokana mala uwa, jejo japanganne Mulugu ira aavahe. Tchoira Yesu ohokwa ira aawombole aliba itaniwa zela mwa jotega jaira atu muwari moviringaniha yopangana yoroma.

¹⁶ Inakala nnga mutu unalremba karta naye zela makalelo ogawa jengo jaye, liye agakwile. Ira karta nne nilabe, yengo yoroma inafuneya ku kana ibaribari ira maliba lremba uhukwa.

¹⁷ Tchoira maliba lremba ule agaliwo, karta nne kannakana mabasa. So mbwenye mutule agakwile pinafuna karta nne laba yengo.

¹⁸ Sawasawa na jopangana ja Mulugu. Ira jopangana ja Mulugu jilabe, ukalawo unafuna kwa. Masiki yopangana yoroma iromiwaga wene, yaromiwe muwari movuviha sangiri na anavinyama.

¹⁹ Tchoira yopangana yoroma ile ira irome laba, jaireyile eni: Mozeji ababihile awandela atu malamulo matene anafwanyeya mmalamuloni. Evale liye tukula sangiri na ana ng'ombe na sangiri na mbuzi na mahindje na mawoya a nibila kagali ofila eto oumbuwela vang'ono, na nikupu na isopo, liye tukula mujelole bwiniha musangirini mule, roma woka livuru na yopangana nne eto liye awoka atu atene.

²⁰ Muwari moawoka atwale, Mozeji ohawandelaga ira: <<Sangiri ni ti sangiri nnatonyiheda ira peno nihiroma wenda na yopangana Mulugu urumile liye ira nyo muiregena.>>

²¹ Noira enne, na makalelo mamohive Mozeji ohowoka sangiri Musasa wa Yehova na fwaramento datene dalabana atu muwari momutamalela Mulugu.

²² Eto nasaka mazu anafwanyeya mmalamuloni, na ibaribari nnofwanya ira kwaji jatene jene jinatchenihiwa muwari mwa sangiri. Eto vahali vuviha sangiri, kavali leveleliwa jotega.

²³ Yali yofuneya ira jatene ja ilambo ya vati jejo jinalingana na jengo ja ilambo ya zulu jitchenihiwe muwari mwa sangiri na vinyama. Mbwenye jengo ja ibaribari jiwa jinafwanyeya zulu jafuna jitchenihiwe na mikuto dapama kwaranya sangiri na vinyama dile.

²⁴ Tchoira Kiristu kavolowile mamburo otchena kali mwilamboni ya vati muno kasakanyiwe na manda a atu. Mwasiwa mamburo a ilambo ya vati ila anafwalrafwaniha mamburo otchena a ibaribari anafwanyeya ilambo ya zulu. Kiristu mbwenye uvolowile zulu uwa wene ira awonge vamentoni va Mulugu zela wa hiyo.

²⁵ Eto Kiristu kavolowile ilambo ya zulu ira avivelele fendo didjindji dene nnga vini mundimuwa wa anamakuta unavolowa Nimburo Notchenetchetcha va kada yaka, avelelaga sangiri na mwanainyama, hiya sangiri naye.

²⁶ Tchoira ahakale nnga Yesu avelelaga mikuto va kada yaka, yerege funeya ira Kiristu akwe fendo didjindji dene kuma vapandutchiwe zulu na ilambo ya vati pakana fiyeda peno va. Mbwenye kiireyile eno. Yesu ohoza kwa fendo imohi bahi muwari mwa matempu ogomiheda ala ira muwari monikwela fendo imohi yenno, awande maliha jotega jehu.

²⁷ Eto sawasawa nnga kada mutu uvahiwe ira akwe fendo imohi bahi, amala atongiwe na Mulugu, sawasawa eto nnga Kiristu.

²⁸ Kiristu ukwile fendo imohi bahi ira awatchele jotega ja atu oindjiva. Liye unoza aze akoka. Mbwenye za waye wanembinli kahi ira unazela awatchele jotega. Azaga fendo yanembinli unazela ira aavuluse atene anno anamudediha mohagalala.