Eberewu 8 - Mazu Otchena a Mulungu

Yesu gu namakuta wa Yopangana yapama yokwaranya Yopangana ya Wanle

¹ Ilukuluwa inawonga hiyo muwari mwa jatene jeji tchoira nihikana mundimuwa wa anamakuta wenno uli zulu ugaratile muwononi odjana wa mpando wa Umwene wa Mulugu wa Kopolo.

² Liye unalaba mabasa mamburo otchena muwari mwa Musasa wa Yehova wa ibaribari wenno ukungiwe na Nabwiya hiya musasa okungiwa na atu.

³ Voira mundimuwa wa anamakuta uli watene unahambihiwa ira avelelege wa Mulugu jovelela vamohi na mikuto, yali yofuneya ira mundimuwa wehu Yesu akayena yenno yafuna liye velela.

⁴ Ahakale nnga Yesu akala mwilamboni ya vati, liye kakala namakuta. Tchoira kohokalawo anamakuta anafwanyeya mwilamboni ya vati anno anavelela jovelela mokwakwanela na makalelo anawonga malamulo.

⁵ Anamakuta a mwilamboni ya vati muno jinalaba atu jinakala nnga yofwalrafwaniha, jinakala nnga nfulri wa musasa wa ibaribari unafwanyeya ilambo ya zulu. Tchoira Mozeji afunaga imetcha Musasa wa Yehova, liye owandeliwa na Mulugu ira: <<Uing'ane pama ira uwande sakanya jatene molingana na makalelo duonihile miyo mwangoni uno.>>

⁶ Eto fwanyeya ira Kiristu mabasa uvahiwe liye bokwaranya mabasa kalaba anamakuta a wanle, sawasawa nnga yopangana ikungile Kiristu vari va Mulugu na atu tchapama kwaranya Yopangana ya Wanle. Tchoira yopangana inalabana Kiristu isakanyiwe na mapangano apama kwaranya mapangano a Yopangana ya Wanle.

⁷ Ahakale nnga yopangana yoroma ikala yokwakwanela, kavakala sayela yopangana imohiwa yanembinli.

⁸ Mbwenye ira Mulugu asakanye yopangana imohiwa, liye ere ona ira atu kohoviringaniha yopangana yoromele. Mwa enne pawonga liye ira: <<Kavuruwanani inafuna miyo wonga dagali Nabwiya! Inoza ifiye tempu inafuna miyo sakanya Yopangana Ixa mwa aIzarayeli na akuda Juda.

⁹ Eto Yopangana Ixa inafuna miyo sakanya kinakala nnga yopangana yenno dasakanyile miyo na makolo enyu daahidedile miyo na ndanda naga ora yaakumihamo miyo muIjipitu. Na mwasa oira aliwa tchafunne wenda na yopangana yaga, nona daahiya dagali Nabwiya.

¹⁰ Mbwenye malambo a Yopangana ya Wanle kagamanle, miyo nnoza disakanye Yopangana Ixa na aIzarayeli. Yopangana ixa inafuna miyo sakanya dagali Nabwiya tchi ila. Miyo nnotukula malamulo aga, divolotchihe mmuruni mwewa. Nnoza dilrembe malamulo aga mmirimani mwewa. Era eno, miyo nnokala Mulugu wewa, eto aliwa anokala atwaga.

¹¹ Siku niwa naza nifiya, kalivo unafunege muwandela nfwaye owu mbalaye ira: <Inafwanela umuiziwe Nabwiya.> Tchoira atene anoza kadiiziwe miyo romela ahima fiyeda andimuwiwa.

¹² Mwasiwa goira miyo nnoza daawendele tangaranga, daalevelele jotega jiwa. Miyo eto kadiza diumbuwelave jotega jewa akoka.>>

¹³ Mulugu awongaga zela Yopangana Ixa, ku wonga tempu yowenda na Yopangana ya Wanle yafuna imale. Eto eni tempuwa ihifiya ira yenno yafuna mala igome. Ihiwaheya eto ihanle vang'ono ira idimele wene.