Eberewu 7 - Mazu Otchena a Mulungu

Melikezedeki gu mundimuwa omukwaranya Abarahamu

¹ Tchoira Melikezedeki unamuwonga hiyo ula, ali mwene wa sidadi ya Salemi. Eto mutu mmohive wenna ali namakuta wa Mulugu Okwaranya Jatene. Mundimuwa Melikezedeki eto gwenno agumanne na Abarahamu akumaga kondoni agamanle agondjiha amwene aawanana liye. Evale Melikezedeki agangumannena Abarahamu, ohomureliha.

² Eto Abarahamu ohotukula yanekumi ya jatene japile liye kondoni, nvaha Melikezedeki. Nzina na Melikezedeki ninna jotapulela mbinli. Yotapulela yoroma ku wonga mwene wa upama. Eto yanembinli ku wonga mwene wa sidadi ya Salemi. Salemi ku tapulela murendele. Ku wonga Melikezedeki ule ali mwene wa murendele.

³ Mundimuwa Melikezedeki nne babaye nne mmaye kiiziweyile, nne ziza naye kaniiziweyile. Nne tempu ibaliwe liye, nne tempu ikwile liye, kajiiziweyile. So liye wireve oneya nnga namakuta wa mukalakala nnga Yesu Mwana Mulugu.

Unamakuta wa Melikezedeki unafwanyeya wagali unamakuta undimuwa kwaranya unamakuta wa Levi

⁴ Hiyo nnowanda iziwa ira Melikezedeki ali mundimuwa ohokala wa masika, mwasiwa nnofwanya ira nikolo Abarahamu ohofiyeda nvaha yanekumi ya jatene japile liye kondoni.

⁵ Muwari mwa malamulo a Mozeji nnofwanya ira ale kabaliwe munlogoni mwa Levi, muwari mokala anamakuta, masiki aliwa kabaliwileve munlogoni mwa Abarahamu, aliwa kohokana direitu yoakosa abaliwa atene yanekumi ya jatene japa atu.

⁶ Mbwenye mulombwana Melikezedeki masiki ahalive wa nlogo na Levi, ohowanda watchela yanekumi mmandani mwa Abarahamu. Liye ohomureliha wenno awatchenle mapangano a Mulugu.

⁷ Mohowanganyeda nnowanda wonga ira ule unamureliha nfwaye guli mundimuwa mukwaranya wenno unamureliha liye. Ku wonga ira muwari mwa Melikezedeki na Abarahamu, mundimuwa ali Melikezedeki.

⁸ Zela anamakuta kakungiwe muwari mwa malamulo a Mozeji, aliwa anawatchela yanekumi kagali atu anaing'anela kwa. Mbwenye Melikezedeki ohowatchela yanekumi agali gu mutu ohidedeliwa umboni ira ukalawove.

^9-10 Eto nnowanda wonga ira Levi ora yali liye ahanabaliwe, na liyene ohonvaha Melikezedeki yanekumi muwari mwa Abarahamu. Tchoira Abarahamu anvahaga Melikezedeki yanekumi, ora yenno Levi alive ahanabaliwe mmaningoni mwa Abarahamu. Ku wonga Levi ahanarome watchela yanekumi, gwali murandji nvaha Melikezedeki.

Tempu ila tchi tempu ya unamakuta uxa na malamulo maxa

¹¹ Anamakuta anno kafwanyeya kagali aLevi, baawandela afwiwa malamulo a Mozeji. Mbwenye ahakale nnga atu kawandaga kala okwakwanela vamentoni va Mulugu muwari mwa unamakuta wa aLevi, unamakuta wewa kwamala, avolowagavo mutu mmohiwa ira akale namakuta molingana na nikuru na Melikezedeki. ALevi anno kakumile muzizani mwa Arawu kogokwakwana anno.

¹² Tchoira uli tchindja unamakuta, inofuneya ira ukale eto tchindja malamulo.

^13-14 Tchoira namakuta awongiwa ira: <<Ukala namakuta unafuna za molingana na nikuru na Melikezedeki.>> gu Nabwiya wehu. Tchoira Nabwiya ukumile nlogo nimohi niwa nene, neno nali nahanarome kana mabasa a vaibuwani. Nlogo neno nnafwanyeya nagali na Juda. Eto zela nlogo neni, Mozeji kawongile ira anerege laba mabasa a unamakuta.

¹⁵ Voira uhuza namakuta muxa okumela nikuru na Melikezedeki, inowanda iziweya pama ira unamakuta wa aLevi kwaali wokwakwanela.

¹⁶ Mbwenye unamakuta wa Namakuta muxa uzile tchineneva kuzenle muwari mobaliwa munlogoni neno nnawongiwa mmalamuloni, nari. So mbwenye liye uwandile kala namakuta muwari mwa kopolo daye dinna liye, zela liye kana ingumi yohowanda tolotchiwa.

¹⁷ Tchoira mazu a Mulugu anomuhidedela umboni zela unamakuta waye ira: <<We uli namakuta wa mukalakala olingana na nikuru na Melikezedeki.>>

¹⁸ Fwanyeya ira nlamulo na wanle noheliwa mmambalo mwasiwa nohovuta eto kanawanda mukamiheda mutu.

¹⁹ Voira malamulo tchawandile kwakwaneliheda yengo ili yatene, vamalroni va malamulo nihiwanda vahiwa yoing'anela ixa, unafwanyeya agali mutu unamuing'anela hiyo. Eto muwari mwa mutu wenno, hiyo nnowanda mukwivela Mulugu.

^20-21 Eto fwanyeya ira zela anamakuta a wanle, Mulugu kalumbenle ira unamakuta wewa gwa mukalakala. Mbwenye zela namakuta muxa wenno unafwanyeya agali Yesu, Mulugu ohomuwongana yolumbela yaye inafwanyeya mMazuni ira: <<Nabwiya uhulumbela eto kaza atchindja. Liye uhuwonga ira: <We uli wa namakuta mukalakala.> >>

²² Muwari mwa yolumbela ya Mulugu, ku tapulela Yesu unonivaha ibaribari ira Yopangana Ixa ili pama hiyaniha na Yopangana ya Wanle ivirile.

²³ Zela Yopangana ya Wanle, anamakuta kohoindjiva na mwasa oira kokwa, amala zagawo amohiwa. Namakuta mmohive kawanda laba dowagave sogolro.

²⁴ Mbwenye Yesu kuma varomile liye laba unamakuta waye pakana na vanove, pakana mukalakala, liye unohidedave unamakuta waye mwasiwa liye unokalawo kala no kala.

²⁵ Nona liye unowanda avulusa mokwakwanela anno anafuna mukwivela Mulugu muwari mwa liye. Tchoira liye ukalawove kala no kala ira aalobelelege atwale vari va aliwa na Mulugu.

²⁶ Yesu gu mundimuwa wa anamakuta ofuneya ira nimukayena. Mwasiwa liye gotchena, ohokana yotega eto ohokana yodugudela. Liye ohomwalanihiwa na atu otega, liye teteliwa zulu wokwaranya zulu.

²⁷ Liye kanalingana na andimuwa a anamakuta amohiwa, nari. Tchoira andimuwa a anamakuta amohiwa anarometcha velela mikuto zela jotega jewa malambo matene. Kamala eno, aliwa roma velelaga mikuto para jotega ja atu. Mbwenye namakuta wehu, jejo kanairana. Tchoira liye muwari movivelela liye mwinnya, umala velela mukuto okwakwanela fendo yoroma eto fendo yogomiheda.

²⁸ Andimuwa a anamakuta kahambihiwa muwari mwa malamulo, atene kakala aliba tegave. Mbwenye vasogolro va malamulo, muwari molumbela walumbenle Mulugu, puzile liye muhambiha Mwanaye kala mundimuwa wa anamakuta wenno uli okwakwanela malambo a mukalakala.