Eberewu 6 - Mazu Otchena a Mulungu

¹ Mwa eno, inafwanela hiyo fundja wehu zela Kiristu ukale wodowa sogolro nnga mutu aulukulaga. Hiya welelaga jofundja jejo jifundjile hiyo wanle. Kaniwelele wongaga jengo joroma, ja aliserisi. Ku wonga kaniwelele fundja zela twaruwa mwa joira jokwa no muroromela Mulugu.

² Nari kaniwelele jofundja zela jobatiziwa nne jofundjiha jimohi jiwa zela makalelo oahela atu manda, nne zela mavenyelo wa atu kakwile nne zela matongelo ogomiheda.

³ Mulugu anikamiheda, hiyo mbwenye nnodowa musogolrove.

⁴ Mwasiwa kohokalawo atu ani kagwa, kahawandaga venyihiwa ira katwaruwe akoka. Tchoira aliwa kohoroma watchela ibaribari ya Mulugu, koholawiha jovahiwa ja zulu eto kohokana pandi na Munemba Otchena.

⁵ Aliwa eto koholawiha upama uli muwari mwa mazu a Mulugu eto koholawiha kopolo nnafuna zana Mulugu tempu yogomiheda inafuna za.

⁶ Noira eno, aliwa gwa, hiyaga ibaribari. Kaira eno mbwenye kinawandeya ira kavenyihiwe fendo yanembinli ira katwaruwe. Mwasiwa aliwa anamukomela Yesu Mwana Mulugu vamuradini akoka. So mbwenye anagomela nongeya na mulandu unna atu. Tchoira aliwa banampetiha Mwana Mulugu.

⁷ Tchoira inakala nnga munda wenno unarumbweliwetcha muzongwe, amala avaha jovaha japama fiyeda aliba lima ale kaziveliwa, mundoyo Mulugu unomureliha.

⁸ Mbwenye avaha minga na makaruwe bahi, mundoyo kanna mabasa. Unahala vang'ono ira atembelrelreye eto magomelo uwa unotumeyiwa.

⁹ Wa nyo mbwenye abalihu oziveliwiwa, hiyo nihikana ibaribari ira jengo ja munlo jinawonga hiyo ji kajinaufwanyani. Jinafuna ufwanyani ti jengo japama jokumela muwari movulusiwa.

¹⁰ Tchoira Mulugu gu Mulugu otonga pama. Liye kanalramwisa jatene jaira nyo momuumbuwela liye, mwaakamihedaga afwinyu otchenihiwa, mwaalabelaga eto mwaaziveliwaga. Eto tcheniyo inairana nyo na vanove. Jatene ejo Mulugu kanalramwisa.

¹¹ Hiyo eto nnafuna ira kada mutu muwari mwa nyo awendegeve na makalelo anno fiyeda magomelo. Tchoira mwakanave makalelo anno, munowanda kana ibaribari yatene ira munoza mukayena yoing'anela inaing'anela hiyo.

¹² Muwari mokana ibaribari zela yoing'anela inna hiyo, kamunakala atu oimwa mbwenye munaasazihege afwinyu anno anawanda vahiwa japama Mulugu apanganne liye mwasiwa aliwa kohokana nroromelo no vilela.

Mapangano a Mulugu ba mapangano a ibaribari

¹³ Fwanyeya ira Mulugu asakanyaga nipangano na Abarahamu, na mwasa oira kaaliwo mutu mmohiwa omukwaranya Mulugu, liye oholumbela na nzina naye eraga:

¹⁴ <<Na ibaribari miyo nnoureliha eto nnoza daaindjivihe ahimawo a musogolro.>>

¹⁵ Mwa enne mulombwana Abarahamu ohoroma dediha muwari movilela ante liye fiyeda vahiwa yapanganne Mulugu.

¹⁶ Tchoira atu karunihagana bure, kafunaga maliha runihana wewa, anolumbeletcha na nzina na mundimuwa oakwaranya aliwa. Mutu alumbela enne, tapulela ira iwongile liye tcha ibaribari.

¹⁷ Nona Mulugu na liyene ira awande aoniha ale kafuna watchela nipangano naye ira mwa ibaribari jofuna jaye kajinatchindjeya, agawongile nipangano naye, liye eto ohowendjeda yolumbela yaye.

¹⁸ Mulugu wenno ahananama univaha nipangano naye nohotchindjeya na yolumbela yaye yohotchindjeya, ku wonga jengo mbinli johotchindjeya ira hiyo aliba tamangela wa Yesu ira nivuneliwe niwande limbiha kopolo ira nihidedegeve yoing'anela yenno ilumbenle Mulugu ira anivahe.

¹⁹ Yoing'anela yenno inna hiyo tchi yengo ya ibaribari inawanda hiyo hideda pama ira kalawo wehu ukale woimela wene mohokayikela. Tchoira yoing'anela yehu inodowa kwaranya kurtina ante volowa muwari mwa Nimburo Notchenetchetcha.

²⁰ Yesu onisogolra, liye volowa muwari mwa Nimburo Notchenetchetcha ira anikamihede hiyo. Tchoira liye unafwanyeya agali mundimuwa wa anamakuta wa mukalakala olingana na unamakuta wa Melikezedeki.