Eberewu 5 - Mazu Otchena a Mulungu

Namakuta wehu unowanda nivulusa kala no kala

¹ Tchoira mutu ira akale mundimuwa wa anamakuta, Mulugu gunamusakulra muwari mwa atu atene ira aalabele afwaye zela ja Mulugu. Liye unokana mabasa ovelela jovelela na mikuto dokurumuwela jotega.

² Mundimuwa wa anamakuta asakulriwa, alabaga muwari mwa atu ohoiziwa yengo nari ale kaholowile, unowanda kana makalelo owenda mopwaseya na atu anaza velela mikuto ale, mwasiwa na liyene gu mutu oviringaniha.

³ Na mwasa wenno, na liyene kanagarati eno. Unovelela mukuto zela jotega jaye nnga mikuto dedo unavelela liye para afwaye.

⁴ Eto kalivo unavikaliha mundimuwa wa anamakuta ekave. So mutu ira akale mundimuwa wa anamakuta, unamuitana gu Mulugu. Masiki mulombwana Arawu ira akale mundimuwa wa anamakuta, amuitanne ali Mulugu.

⁵ Sawasawa na Kiristu. Ira liye akale mundimuwa wa anamakuta, kavivahile undimuwa waye ekave, nari. Liye ere hambihiwa na wenno awongile ira: <<We uli Mwanaga. Miyo peno duhubala.>>

⁶ Eto pandi imohi ya mMazuni Mulugu uhuwonga ira: <<Weyo uli namakuta wa mukalakala okumela nikuru na Melikezedeki.>>

⁷ Muwari mwa malambo Yesu awarile liye maningo, olobela no kuwa ulukulu na misodi anvepaga wenno awanda muwombola mokwani. Jalobela liye jovweya mwasiwa liye ohorumela irana jofuna ja Mulugu.

⁸ Masiki liye alive Mwana Mulugu, liye ofundja makalelo onvwelela Mulugu muwari mwa goyi daonihiwa liye.

⁹ Agamanle onihiwa goyi dile, liye okala mutu okwakwanela, wenno unawanda avulusa kala no kala atu anno ananvwelela.

¹⁰ Yesu eto unowanda avulusa atu kala no kala mwasiwa liye osakulriwa na Mulugu ira akale mundimuwa wa anamakuta okumela nikuru na Melikezedeki.

Yokokomeza ira atu omuroromela Yesu kahaperuwe

¹¹ Nihikana jengo jidjindji jinafuna hiyo wonga zela unamakuta wa Yesu. Mbwenye ili yorutcha ira nuwandeleni mwasiwa nyo muli atu orutchiwa onelramo.

¹² Tchoira ante ora ila yofwanela nnga mukale anamafundjiha eto kamuli. Eto futukula uwa inafuneya nnga agazile mutu mmohiwa ira aze auwumbutchedegeni jofundjiha joroma ja mazu a Mulugu. Ku wonga inafwanela muwelele nibele neno nahiyile nyo, hiya djaga tchima.

¹³ Tchoira mutu wenno unawamwave gu mwana. Kanawande iziwa mazu owonga zela upama Mulugu unafuna liye.

¹⁴ Mbwenye tchima ili para mutu olimba muwari mwa nroromelo wenno unawanda hiyanihavo upama na ubure mwasiwa liye ulemela hiyaniha yapama na yabure.