Eberewu 4 - Mazu Otchena a Mulungu

Yokokomeza ira nivolowe muwari movuma Mulugu unavaha liye

¹ Agali afwihu wanle kohoimwanana volowa, Mulugu univaha nipangano ira nivolowe movuma mwaye. Nona polre polre tawiha ira muwari mwa nyo unakalemo mutu mmohi unaimwanane volowa muwari movuma mwa Mulugu mule.

² Tchoira na hiyene nihimala laleyiwa Muselu Wapama molingana na aliwa. Mbwenye para aliwa, Muselu Wapama kawandeliwe atu kwaazenlena mpindu, mwasiwa aliwa kagavwile, kohoimwanana kana nroromelo.

³ Hiyo mbwenye nimuroromenle gunavolowa muwari movuma mwa Mulugu. Tchoira zela atu anne kahanamuroromela, masiki mabasaye opandutcha zulu na ilambo ya vati kagamanle wanle, Mulugu ohowonga ira: <<Miyo doholumbela na uwali waga ira: <Atu anne kiza eto kavolowa movuma mwaga.> >>

⁴ Tchoira mutu asaka mMazuni unowanda fwanya mazu kawongiwe zela siku na sabado ira: <<Nagafiyile siku nanetanu na mbinli, Mulugu ohovuma mwa mabasa matene alabile liye.>>

⁵ Eto zela atu ohokana nroromelo, nnovwa akoka mazu a Mulugu awongile liye ira: <<Atu anne kiza eto kavolowa movuma mwaga.>>

⁶ Atu oroma vwa Muselu Wapama kohoimwanana volowa muwari movuma mwa Mulugu na mwasa ohovwelela. Mbwenye kohokalawo tempu ili hiyo ila anawanda volowa.

⁷ Siku Mulugu nnafuna liye ira atu kavolowe muwari movuma waye ti siku na peno. Jejo Mulugu awongile muwari mwa Davi vagamanle yaka didjindji dene, awongaga mazu oira: <<Peno mwavwa nizu naye, kamuummihe mirima denyu.>>

⁸ Tchoira ahakale nnga Jozuwe awanda avaha aIzarayeli vuma, Mulugu kawongave na Davi zela vuma umohiwa wafuna za siku nimohi niwa.

⁹ Nona uhala eto vuma para atu a Mulugu. Vuma uwa unakala nnga vuma Mulugu avumile liye siku na sabado agamanle pandutcha jatene.

¹⁰ Tchoira wenno uvolowile vuma unavaha Mulugu unowanda vuma mwa mabasaye sawasawa nnga Mulugu avumile liye muwari mwa mabasa alabile liye.

¹¹ Nona inafwanela nizuzumele ira nivolowe muwari movuma wewo ira ahakalevo mutu unafuna gwana mulandu ohonvwelela Mulugu nnga jaira atu wanle.

¹² Tchoira Mazu a Mulugu ba mazu okana ingumi eto a kopolo eto ba mazu oirwa kwaranya supada nosayiheya wu na wu. Mazu a Mulugu anolata ante aliwa fiyeda mwalaniha kalawo wa mutu na muzimu waye eto anomwalaniha makuva na joxonda ja munikuvani eto anowanda hiyanihavo joumbuwela na jofuna jili mmirimani mwa mutu.

¹³ Mwa jatene jejo jipandutchiwe, kilivo yengo ili yokoyeya vamentoni va Mulugu. Mbwenye jatene jili vaheno vene, jatene jinnana oniwa na wenno unafuna hiyo za muwandelagamo jatene jiirile hiyo.

Yesu gu mundimuwa wa anamakuta wa tempu ili hiyo ila

¹⁴ Inafwanela nihidede pama ibaribari inna hiyo mwasiwa nihimukana mundimuwa wa anamakuta wehu ohokala wa masika wenno ugwenle afiya zulu, unafwanyeya agali Yesu, Mwana Mulugu.

¹⁵ Tchoira mundimuwa wa anamakuta unna hiyo kahi namakuta oimwanana nikumbanyeda zela jovuta jehu. Tchoira na liyene ohoroma xixiwa na makalelo matene nnga anaxixiwa hiyo, mbwenye liye kategile.

¹⁶ Nona tempu inasegedeya hiyo inafwanela niwande kwivela mohokayikela mpando wa umwene wewo unakumela sayi ira niwande wendeliwa tangaranga eto nifwanye sayi ira niwandege kamihediwa tempu inafuna hiyo nnga nikamihediwe.