Eberewu 2 - Mazu Otchena a Mulungu

Yokokomeza ira nahalramwise vulusiwa Mulugu univahile liye

¹ Nawanda iziwa ira Mwana Mulugu ukana mabasa akwaranya angelro, inafwanela niwande hideda pama jatene jivwile hiyo zela Yesu tawiha ira nnaze niholowe.

² Tchoira wanle Mulugu ohavaha mpanganyo angelro ira kaawandele atu. Mazwale kawongile angelro kafwanyeya kagali mazu a ibaribari. Muwari mokala mazu a ibaribari, mutu uli watene unongile na wenne ahavwelenle mazu kawongile angelro, otongiwa zela yotega yatene yairile liye.

³ Akala wenno alramwisa mazu kawonga angelro wanle ohofiyeda tongiwa, nnga nalramwisa mazu azilena Nabwiya Yesu tchineneva ozela makalelo apama onivulusa, nnafuna nivulumuwe avi? Kavinawandeya. Fwanyeya ira aromile laleya Muselu Wapama onivulusa ali Nabwiya Yesu. Ale kavwile na Nabwiya Yesu banilaleyile hiyo, aliwa nivaha ibaribari.

⁴ Mulugu eto ohidedela umboni zela Muselu Wapama muwari mwa jionihedo na jotikiniha na jengo johiyana hiyana na jolemelela ja Munemba Otchena Mulugu ugawile liye mofuna mwaye.

Yesu muwari mosanduwa kala mutu uwanda za awombola atu

⁵ Zela ilambo ya sogolro inafuna za yenno inawonga hiyo, Mulugu kaasakunlre angelro ira aliwa kaze katongege ilambo yenno, nari.

⁶ Mbwenye mMazuni munofwanyeya umboni zela Yesu ira: <<Kodi mutu unafwanyeya agali nni ira nyo Mulugu mumbalrege? Eto mwana wa mutu unafwanyeya agali ani ira nyo mmukukumuwelege?

⁷ Nyo mohoroma muyeviha tempu ya vang'ono akwaranya angelro. Eto magomelo uwa muhuwanda muhambiha ira akale mutu okana undimuwa eto akale mutu oteteliwa,

⁸ nyo sakanyaga ira liye akayena utongi wa jatene jipandutchile nyo, ira jatene jikale vati va manyalo aye.>> Muwari monvaha utongi oira atongege jatene, kilivo yengo ili yatene Mulugu yahamuhiyedile liye. Eto fwanyeya ira tempu ili hiyo ila hiyo kannaona ira jatene jinatongiwa na liye.

⁹ Mbwenye hiyo nnamuona Yesu wenno wanle ayevihiwe malambo a vang'onove akwaranya angelro, peno eto uhumala hambihiwa ira akale mutu okana undimuwa eto akale mutu oteteliwa, mwasiwa muwari mwa sayi da Mulugu, liye ohokwa ira awande lawiha ukwa vamalroni va atu atene.

¹⁰ Tchoira yali yofwanela ira Mulugu wenno unafuna teteliwa muwari mwa jatene jene eto unakalihawo jatene jene, amuonihe Yesu goyi ira muwari mwa goyi dile, Yesu awande kala Namakunga wo vulusiwa wokwakwanela. Ali ira Yesu awandege atukula atu adjindji, aavolotchihege muwari mwa undimuwa wa Mulugu ira aliwa kakale ahima a Mulugu.

¹¹ Fwanyeya ira maliba atcheniha atu na aliba tchenihiwa, babiwa gu mmohive. Nona pa evo Yesu vanawanda liye aitana mohonyaswa atu aatchenihile liye na nzina na abalaga,

¹² liye wongaga na Mulugu ira: <<Miyo nnodowa davweyihe nzina nenyu vamentoni va abalaga. Nnouimbelani nyumbo doutamalelani vari va mutugumano.>>

¹³ Vamohi viwa Yesu ohowonga eraga: <<Miyo nnamunyindela Mulugu!>> Eto ohowonga ira: <<Kaing'anani. Miyo dili vano na ahima anno Mulugu udivahedile liye!>>

¹⁴ Fwanyeya ira voira ahimiwa anawenda muwari mwa sangiri na maningo, na liyene eto ohowanda tukula makalelo mamohive a sangiri na maningo ira awande kwa muwari momugondjiha wenno unna kopolo da ukwa unafwanyeya agali Diyabo.

¹⁵ Eto mwa eno liye ohavunela anno kafwanyeya muuzarini kalawo wewa watene kaovaga ukwa.

¹⁶ Tchoira tchi yengo yoiziweya pama pama ira liye kazile akamiheda angelro nari, mbwenye uzile akamiheda ale kabaliwe muzizani mwa Abarahamu.

¹⁷ Ira liye awande akamiheda ale kabaliwe muzizani mwa Abarahamu, yali yofwanela liye asanduwe, makalelo aye matene kakale olingana na abalaye. Ali ira awande kala mundimuwa wa anamakuta okana tangaranga, ororomeleya muwari mwa mabasa a Mulugu. Yali yofwanela liye kala namakuta wa makalelo anno ira awande sembeselra uwali wanna Mulugu zela jotega.

¹⁸ Liye eto unowanda akamiheda atu anne anaxixiwa mwasiwa na liyene ohoonihiwa goyi muwari moxixiwa.